សម្រាប់ឆ្នាំ២០២៥នេះ ទិវាជាតិអប់រំបណ្តុះបណ្តាល​បច្ចេកទេស និងវិជ្ជាជីវៈ គ្រោង​នឹង​ប្រព្រឹត្ត​ធ្វើ​នៅ​ថ្ងៃទី១៥ ខែមិថុនា ក្រោម​ប្រធានបទ “TVET បង្កើតឱកាស​ការងារ សាងក្តីសង្ឃឹម​ដល់យុវជន” ស្រប​តាម​យុទ្ធសាស្រ្ត​បញ្ចកោណ​ដំណាក់កាលទី១ ដែល​បាន​កំណត់យក​អាទិភាព​គន្លឹះទី១ គឺ មនុស្ស ដោយ​បានផ្តោតសំខាន់​លើ​ការកសាង និង​អភិវឌ្ឍ​មូលធនមនុស្ស​ប្រកប​ដោយគុណភាព សមត្ថភាព ជំនាញ​វិជ្ជាជីវៈ​ច្បាស់លាស់ គំនិតច្នៃប្រឌិត និង​ភាព​ប្រកួតប្រជែងខ្ពស់ ដើម្បី​សម្រេច​ឱ្យ​បាន​នូវ​គោលដៅ “ពលរដ្ឋ​ម្នាក់​មានជំនាញ​មួយ​យ៉ាង​តិច​ប្រចាំជីវិត”។

តាមរយៈ​សារាចរលេខ ១៣សរ ចុះថ្ងៃទី២៣ ខែឧសភា ឆ្នាំ២០២៥ ដើម្បីឱ្យការរៀបចំទិវាជាតិនេះ ប្រព្រឹត្ត​ទៅ​ដោយ​រលូន រាជរដ្ឋាភិបាល​កម្ពុជា ​បានធ្វើ​ការ​អំពាវនាវ​ដល់ក្រសួង ស្ថាប័ន និង​ភាគីពាក់ព័ន្ធ ចូលរួមធ្វើការ​ផ្សព្វផ្សាយ និងសូម​ចូលរួមសហការគាំទ្រ និង​អនុវត្ត​កម្មវិធី​គោល​នយោបាយ​អាទិភាព​របស់​រាជរដ្ឋាភិបាល ជាពិសេស​កម្មវិធី​បណ្តុះបណ្តាល​ជំនាញ​វិជ្ជាជីវៈ និង​បច្ចេកទេស​ដល់​យុវជន​មក​ពី​គ្រួសារក្រីក្រ និង​គ្រួសារ​រងហានិភ័យ ចំនួន​ប្រមាណ ១.៥លាននាក់ ព្រមទាំង​បុគ្គល នៃសេដ្ឋកិច្ច​ក្រៅ​ប្រព័ន្ធ និង​ក្នុងប្រព័ន្ធ ដោយ​ធ្វើ​ការ​ផ្សព្វផ្សាយ​ឱ្យ​បានទូលំទូលាយ និង​មានប្រសិទ្ធភាព​ខ្ពស់ ដើម្បី​ជំរុញ​យុវជន​ឱ្យ​មក​ចុះ​ឈ្មោះ​ចូលរៀន​ក្នុង​កម្មវិធី​នេះ​កាន់តែ​ច្រើន។

ជាមួយគ្នានេះ គ្រឹះស្ថានអប់រំបណ្តុះបណ្តាលបច្ចេកទេស និងវិជ្ជាជីវៈ ទាំងអស់ ត្រូវជំរុញគ្រូបច្ចេកទេសឱ្យបង្កើនការស្រាវជ្រាវ និងកិច្ចសហការជាមួយសហគ្រាស គ្រឹះស្ថាន វិស័យឧស្សាហកម្ម ដើម្បីទទួលបាននូវ ចំណេះដឹងថ្មីៗទាក់ទងនឹងបច្ចេកវិទ្យាចុងក្រោយដែលជាតម្រូវការទីផ្សារការងារជាក់ស្តែង ហើយ ធ្វើការផ្ទេរចំណេះដឹងទាំងនោះ តាមវិធីសាស្ត្របង្រៀនថ្មីៗប្រកបដោយប្រសិទ្ធភាពក្នុងការជួយ បង្ហាត់បង្រៀនដល់សិស្ស និស្សិតឱ្យងាយយល់ ស្រួលចាំ ឆាប់ចេះ និងអាចអនុវត្តបានប្រកបដោយ គុណភាពខ្ពស់។

ដោយឡែក អាណាព្យាបាល មាតាបិតា និងភាគីពាក់ព័ន្ធនានា សូម​ចូលរួមជំរុញកូន ឬយុវជនឱ្យមកចុះឈ្មោះចូលរៀន ក្នុងកម្មវិធី TVET ១,៥លាននាក់ និងលើកទឹកចិត្តពួកគាត់សិក្សាកម្មវិធីនេះ ឱ្យបានចប់សព្វគ្រប់ ស្របតាមអភិក្រមរបស់ សម្តេចធិបតី “រៀនឱ្យចប់ ឱ្យចេះ ឱ្យមានការងារ”។

សូមជំរាបជូនថា រាជរដ្ឋាភិបាលកម្ពុជាបានកំណត់យកថ្ងៃទី១៥ ខែមិថុនា ជារៀងរាល់ឆ្នាំ ជាទិវាជាតិអប់រំបណ្តុះបណ្តាល បច្ចេកទេសនិងវិជ្ជាជីវៈ ក្នុងគោលបំណងដើម្បីលើកកម្ពស់ការអប់រំបណ្តុះបណ្តាលបច្ចេកទេសនិងវិជ្ជាជីវៈ និង ធ្វើការផ្សព្វផ្សាយទៅដល់សិស្សានុសិស្ស និស្សិត យុវជន មាតាបិតា អាណាព្យាបាល និងវិស័យឯកជន ឱ្យបានយល់អំពី សារៈសំខាន់នៃ “ការអប់រំបណ្តុះបណ្តាលបច្ចេកទេសនិងវិជ្ជាជីវៈ (Technical Vocational Education and Training) ហៅថា ជីវេត (TVET)” ក្នុងការជំរុញការបណ្តុះបណ្តាលកម្លាំងពលកម្មជំនាញប្រកបដោយគុណភាព និង ប្រសិទ្ធភាពឱ្យឆ្លើយតបទៅនឹងតម្រូវការទីផ្សារការងារទាំងក្នុងនិងក្រៅប្រទេស៕