ក្នុងពិធីប្រគល់វិញ្ញាបនបត្របញ្ចប់ភូមិសិក្សាថ្នាក់មតេ្តយ្យភាសាខ្មែរ ភាសាអង់គ្លេស និងបណ្ណសរសើរដល់សិស្សពូកែ ប្រចាំឆ្នាំសិក្សា ២០២៣-២០២៤ នៃសាលារៀនសហគមន៍២១ កាលពីចុងសប្តាហ៍នេះ លោកឧកញ៉ា ប៉ិច បូឡែន អគ្គនាយកបណ្តាញគ្រឹះស្ថានអប់រំ វេសឡាញ អេឌ្យូខេសិនគ្រុប មានប្រសាសន៍ថា ជាទិសដៅរបស់សាលារៀន​សហគមន៍​២១ គឺផ្តោតទៅលើបំណិនជីវិតសតវត្សទី២១ ដូច្នេះសិស្សដែលរៀននៅទីនេះ ចាប់តាំងពីថ្នាក់មត្តេយ្យឡើងទៅ ពួកគេនឹងទទួលបាននូវចំណេះដឹងផ្នែកហិរញ្ញវត្ថុ បំណិនជីវិត ក៏ដូចជាបំណិនបច្ចេកវិទ្យា ដែលនឹងជួយពួកគេក្នុងការអភិវឌ្ឍខ្លួន និងអាជីពទៅថ្ងៃអនាគត។

លោកឧកញ៉ា ប៉ិច បូឡែន មានប្រសាសន៍បញ្ជាក់ថា សាលារៀនសហគមន៍២១ គឺជាសាលារៀនមួយ នៃបណ្តាញសាលារៀនវ៉េសឡាញន៍ តែអ្វីដែលសាលារៀននេះផ្តោតសំខាន់ គឺទៅលើបំណិនជីវិតសតវត្សទី២១ ដែលជាមូលដ្ឋាន នៃការរៀបចំកម្មវិធីសិក្សារបស់ប្រទេសជាច្រើននៅលើពិភពលោក ដើម្បីអាចជួយឱ្យយុវជនរីកចម្រើនក្នុងការងារ ឬប្រកបមុខរបរបាន ពោលគឺយុវជនទាំងអស់នឹងមានគំនិតច្នៃប្រឌិត ចេះគិតស៊ីជម្រៅ មានចំណេះដឹងហិរញ្ញវត្ថុ ចេះប្រាស្រ័យទាក់ទង ក៏ដូចជាបច្ចេកវិទ្យាជាដើម។ ហេតុនេះហើយនៅក្នុងកម្មវិធីសិក្សារបស់សាលារៀនសហគមន៍២១ ចាប់តាំងពីថ្នាក់មត្តេយ្យសិក្សាឡើងទៅ គឺមានដាក់បញ្ចូលជាស្រេចនូវកម្មវិធីបំណិនជីវិត ដោយបង្រៀនឱ្យកុមារចេះគ្រប់គ្រងហិរញ្ញវត្ថុ ចេះពិចារណា មានការប្រាស្រ័យទាក់ទងល្អ ក៏ដូចជាចំណេះដឹងបច្ចេកវិទ្យាផងដែរ។

បើតាមប្រសាសន៍របស់លោកឧកញ៉ា ប៉ិច បូឡែន ជាចក្ខុវិស័យធំបំផុតរបស់សាលារៀនសហគមន៍២១ គឺក្នុងទិសដៅលើកកម្ពស់វិស័យអប់រំ និងអភិវឌ្ឍវិស័យសេដ្ឋកិច្ចសហគមន៍តាមរយៈការបណ្តុះបណ្តាល ជំនាញវិជ្ជាជីវៈដល់សិស្សានុសិស្ស។ “ចក្ខុវិស័យរបស់ពួកយើង មិនត្រឹមតែរៀនអប់រំទេ តែពេលសិស្សឡើងទៅដល់លើ ពួកគាត់អាចរៀនជំនាញបច្ចេកទេស និងវិជ្ជាជីវៈបាន… មានជំនាញច្រើនដូចជាពាក់ព័ន្ធសំណង់ ឌីជីថល ទេសចរណ៍ បដិសណ្ឋារកិច្ច ជំនួញ ការកែច្នៃចំណីអាហារ ចុងភៅ សូម្បីដំណើរការហាងកាហ្វេ ក៏ចាត់ទុកជាការបណ្តុះបណ្តាលបច្ចេកទេស និងវិជ្ជាជីវៈដែរ”។

លោកឧកញ៉ា ប៉ិច បូឡែន មានប្រសាសន៍ថា ឆ្លងកាត់បទពិសោធន៍ជាសហគ្រិន លោកមើលឃើញថា កម្លាំងយុវជនជាច្រើនបានចេញទៅធ្វើការងារនៅក្រៅប្រទេស ដូច្នេះសិស្សដែលបញ្ចប់ការសិក្សានៅសាលារៀនសហគមន៍២១ ពួកគេនឹងមានសមត្ថភាព ដោយអាចបន្តទៅរៀននៅមហាវិទ្យាល័យក៏បាន ចង់ជួយឪពុកម្តាយនៅក្នុងការប្រកបមុខរបរក៏បាន ឬក៏ចង់ទៅជាកម្លាំងជំនាញក្រៅប្រទេស ក៏ទៅក្នុងនាមជាអ្នកជំនាញខ្ពស់ ពោលគឺសិស្សដែលរៀននៅសាលារៀនសហគមន៍២១ នឹងក្លាយជាកម្លាំងសេដ្ឋកិច្ច ដោយមានបំណិនសតវត្សទី២១ និងបំណិនជំនាញ។

បើតាម កញ្ញា ប៉ិល មករា នាយិកាប្រតិបត្តិការ នៃសាលារៀនសហគមន៍២១ ឱ្យដឹងថា សាលារៀនសហគមន៍២១ ត្រូវបានបង្កើតដំបូងនៅក្នុងឆ្នាំ២០២២ ហើយមកដល់បច្ចុប្បន្ន សាលាមានសាខាចំនួន៧ ដែលស្ថិតនៅជាយរាជធានីភ្នំពេញ ក៏ដូចជាតាមស្រុកមួយចំនួននៅក្នុងខេត្តកណ្តាល ក៏ដូចជាខេត្តកំពង់ធំ។

កញ្ញា មករា បញ្ជាក់ថា ក្នុងទិសដៅលើកកម្ពស់វិស័យអប់រំ និងអភិវឌ្ឍវិស័យសេដ្ឋកិច្ចសហគមន៍ សាលារៀនសហគមន៍២១ បានដាក់ឱ្យអនុវត្តកម្មវិធីអប់រំចំណេះទូទៅខ្មែរចាប់ផ្តើមពីកម្រិតមត្តេយ្យសិក្សា ដល់ថ្នាក់ទី១២ តាមស្តង់ដាគុណភាព របស់ក្រសួងអប់រំ យុវជន និងកីឡា និងអនុវត្តកម្មវិធីអប់រំភាសាអង់គ្លេសតាម កម្មវិធីសិក្សាអាមេរិកាំង ពីកម្រិតមត្តេយ្យ ដល់កម្រិតខ្ពស់។ លើសពីនេះទៅទៀត សាលារៀនបានដាក់បញ្ចូលកម្មវិធី សិក្សាបន្ថែម ជាច្រើនទៀត នឹងជួយផ្តល់ឲ្យសិស្សានុសិស្សនូវជំនាញនៃសតវត្សទី ២១ លើកម្មវិធីសិក្សាគោល រួមមាន ៖ កម្មវិធី Money Tree ដែលផ្តល់នូវចំណេះដឹងហិរញ្ញវត្ថុ ដែលផ្តោតលើការគ្រប់គ្រង និងការប្រើប្រាស់លុយកាក់ បានត្រឹមត្រូវ និងការការពារខ្លួនពីសម្ពាធសម្ភារនិយមក្នុងសង្គម។ កម្មវិធី The Leader_In_Me សិក្សាពីទម្លាប់ទាំង ៧ របស់បុគ្គលឆ្នើម ដែលនឹងដឹកនាំ សិស្សានុសិស្ស ឲ្យមានចំណេះដឹង និងជំនាញក្នុងការត្រិះរិះពិចារណា ការប្រាស្រ័យទាក់ទងគ្នា ការដោះស្រាយបញ្ហា គំនិតច្នៃប្រឌិត និងការបង្កើតថ្មី ការសហប្រតិបត្តិការ ការធ្វើការងារជាក្រុម មានសីលធម៌ សុជីវធម៌ល្អ មានផ្នត់គំនិត ឈានមុខគេ និងមានភាពជាអ្នកដឹកនាំ និងកម្មវិធីសិក្សាកុំព្យូទ័រ ដែលផ្តល់នូវជំនាញបច្ចេកវិទ្យា និងជួយឱ្យសិស្សចេះប្រើប្រាស់ចំណេះដឹងកុំព្យូទ័រមូលដ្ឋាន សម្រាប់ការសិក្សា រួមមានការយល់ដឹងពីសមាសភាគកុំព្យូទ័រ ការរៀបចំអត្ថបទ ការធ្វើបទបង្ហាញ ការស្រាវជ្រាវឯកសារ និងការប្រើប្រាស់អ៊ីនធឺណែត អ៊ីម៉ែលជាដើម៕