សិស្សពី​ប្រទេស​កម្ពុជាសរុបចំនួន ៤៩០នាក់ បានទទួលជ័យលាភីមេដាយ ពីកម្មវិធីប្រកួត​គណិតវិទ្យាអូឡាំព្យាដ សិង្ហបុរី-អាស៊ី អន្តរជាតិ (SASMO) ឆ្នាំ២០២៤នេះ ដោយ​ក្នុងនោះ មានបេក្ខជន ១១៦នាក់ ទទួលបានមេដាយមាស, បេក្ខជន ១៧១នាក់ ទទួលបានមេដាយប្រាក់ និងបេក្ខជន ២០៣នាក់ ទទួលបានមេដាយសំរឹទ្ធ។

នៅក្នុងពិធីប្រគល់មេដាយ និងវិញ្ញាបនបត្រដល់បេក្ខជនជ័យលាភី គណិតវិទ្យាអូឡាំព្យាដ សិង្ហបុរី-អាស៊ី អន្តរជាតិ (SASMO) ២០២៤ កាលពីថ្ងៃទី២៦ ខែឧសភា លោក សរ រិទ្ធី អនុប្រធានសមាគម និងតម្រង់ទិសសិស្សមធ្យមសិក្សាកម្ពុជា បានលើកឡើងថា ការរៀបចំឱ្យមានព្រឹត្តិប្រកួតប្រជែងដែលមានលក្ខណៈវិទ្យាសាស្រ្តនេះ គឺពិតជាសមស្របទៅនឹងយុទ្ធសាស្រ្តបញ្ចកោណរបស់ប្រមុខរាជរដ្ឋាភិបាលកម្ពុជា ដែលតែងតែលើកទឹកចិត្តដល់គ្រឹះស្ថានអប់រំសាធារណៈ និងឯកជនទាំងអស់ឱ្យខិតខំបន្ដចូលរួមក្នុងការជំរុញគ្រប់សកម្មភាពក្នុងវិស័យអប់រំ។ ទន្ទឹមគ្នានេះ ត្រូវផ្តោតការយកចិត្តទុកដាក់ទៅលើការអភិវឌ្ឍមូលធនមនុស្ស ការបង្កើនភាពប្រកួតប្រជែង ការអភិវឌ្ឍវិស័យឯកជននិងការងារ ការអភិវឌ្ឍប្រកបដោយភាពធន់ ចីរភាព បរិយាប័ន្ន និងការអភិវឌ្ឍសេដ្ឋកិច្ច និងសង្គមឌីជីថល។

អនុប្រធានសមាគម និងតម្រង់ទិសសិស្សមធ្យមសិក្សាកម្ពុជា ក៏បានសម្តែងនូវការអបអរសាទរយ៉ាងកក់ក្តៅបំផុត ជូនចំពោះបេក្ខជនជ័យលាភីទាំង៤៩០នាក់ ដែលទទួលបានមេដាយមាស ប្រាក់ និងសំរឹទ្ធ ហើយក៏បានលើកទឹកចិត្តដល់បេក្ខជនទាំង៨៨១នាក់ផ្សេងទៀតដែលមិនទទួលបានជយលាភី បន្តការខិតខំប្រឹងប្រែងសិក្សារៀនសូត្របន្តទៀត ដើម្បីពង្រឹងសមត្ថភាពរបស់ខ្លួន នឹងត្រៀមចូលរួមក្នុងការប្រកួតប្រជែងនាឱកាសក្រោយៗទៀត។

ក្នុងនាមសមាគមអប់រំ និងតម្រង់ទិសសិស្សមធ្យមសិក្សាកម្ពុជា លោកក៏បានសម្តែងការកោតសរសើរ និងគាំទ្រ ចំពោះមជ្ឈមណ្ឌលរៀបចំការប្រឡងអូឡាំព្យាដអន្តរជាតិ សិង្ហបុរី (SIMCC SG) និងមជ្ឈមណ្ឌល ដឺ ប្រ៊េននីអេក ហ្វេកធើរី (The Brainiac Factory) ដែលបានខិតខំរៀបចំឱ្យមានព្រឹត្តការណ៍ ប្រកួតប្រជែង គណិតវិទ្យា វិទ្យាសាស្រ្ត ដែលមានលក្ខណៈអន្តរជាតិនៅក្នុងប្រទេសកម្ពុជា ផ្តល់ឱកាសដល់ក្មួយៗ សិស្សានុសិស្សកម្ពុជា អាចចូលរួមប្រកួតប្រជែង និងបញ្ចេញសមត្ថភាពរបស់ខ្លួនលើឆាកអន្តរជាតិ ហើយសូមគាំទ្រឱ្យមានព្រឹត្តិការណ៍ប្រកួតប្រជែងដែលមានលក្ខណៈអន្តរជាតិផ្សេងៗទៀត នៅឆ្នាំបន្តបន្ទាប់ពេលខាងមុខ។

ជាមួយគ្នានេះ ឯកឧត្តម ឡោ ឆវណ្ណា អនុរដ្ឋលេខាធិការ ក្រសួងអប់រំ យុវជន និងកីឡា បានសម្តែងការកោតសរសើរ និងវាយតម្លៃខ្ពស់ ចំពោះសមាគមអប់រំ និងតម្រង់ទិសសិស្សមធ្យមសិក្សាកម្ពុជា និងមជ្ឈមណ្ឌលរៀបចំការប្រឡងគណិតវិទ្យាអូឡាំព្យាដ សិង្ហបុរី និងមជ្ឈមណ្ឌលដឺប៊្រេននីអេកហ្វេកធើរី ក្នុងការសហការរៀបចំកម្មវិធីនេះឡើង ដែលជាការចូលរួមចំណែកគាំទ្រ និងលើកកម្ពស់វិស័យអប់រំ ជាមួយរាជរដ្ឋាភិបាលកម្ពុជា។

អនុរដ្ឋលេខាធិការ ក្រសួងអប់រំ យុវជន និងកីឡា ក៏បានអំពាវដល់សិស្សានុសិស្សនៅភូមិសិក្សា ថ្នាក់ទី៩ និងទី១២ ត្រៀមខ្លួនឱ្យល្អប្រសើរក្នុងការប្រឡងថ្នាក់ជាតិ ដែលនឹងចូលមកដល់នាពេលខាងមុខនេះផងដែរ។

យោងតាមរបាយការណ៍របស់លោក យ៉ែម សុភ័ណ្ឌ ប្រធានមជ្ឈមណ្ឌល ដឺប្រ៊េននីអេក ហ្វេកធើរី (The Brainiac Factory) បានបង្ហាញថា នៅក្នុងឆ្នាំ២០២៤នេះ មានសិស្សានុសិស្សកម្ពុជាចូលរួមប្រឡងគណិតវិទ្យាអូឡាំព្យាដចំនួនច្រើនគួរឱ្យកត់សម្គាល់ ក្នុងនោះ បេក្ខជនកម្ពុជាមានចំនួនសរុប១,៤០១នាក់ មកពីគ្រឹះស្ថានអប់រំ និង ១៣០គ្រឹះស្ថាន រួមមាន គ្រឹះស្ថានអប់រំសាធារណៈចំនួន ៥០គ្រឹះស្ថាន និងគ្រឹះស្ថានឯកជនចំនួន ៨០គ្រឹះស្ថាននៅទូទាំងប្រទេស។ ទន្ទឹមគ្នានេះ កម្ពុជាបានឈរនៅចំណាត់ថ្នាក់ទី១០ ជាប្រទេសដែលមានចំនួនសិស្សានុសិស្សកម្ពុជា ចូលរួមប្រកួតប្រជែងច្រើនជាងគេក្នុងចំណោម ៣៨ប្រទេសដែលមានបេក្ខជនចូលរួមសរុបចំនួន ៥៧,០៧៥នាក់ នៅទូទាំងពិភពលោក។

គួរជម្រាបជូនថា ក្នុងចំណោមបេក្ខជន ១១៦នាក់ ទទួលមេដាយមាស ក្នុងនោះក៏មានបេក្ខជន ហុង ធានឡុង និង ហុង ធានស៊ីង ដែលជាបុត្រធីតារបស់ លោកជំទាវ ជា ចោមចិន្តា ជាប់ជ័យលាភីមេដាយមាសក្នុងការប្រកួតប្រជែងគណិតវិទ្យាអូឡាំព្យាដ សិង្ហបុរី-អាស៊ានអន្តរជាតិ (SASMO) ឆ្នាំ២០២៤៕