យុវជនបោះបង់ការសិក្សានៅ​ខេត្តសៀមរាប ត្បូងឃ្មុំ រតនគិរី និងស្ទឹងត្រែង ជាង១ម៉ឺននាក់ ​ទទួល​បាន​ការងារធ្វើដោយរាប់ចាប់ពីការបើកអាជីវកម្មខ្លួនឯង ឬការងារក្នុងទីផ្សារ ក្រោយ​ពីទទួលបានបណ្តុះបណ្តាលជំនាញវិជ្ជាជីវៈ ដែលគាំទ្រដោយផ្ទាល់ពីអង្គការភ្លែនអន្តរជាតិកម្ពុជា និងដៃគូក្រសួងការងារ និងបណ្ដុះបណ្ដាលវិជ្ជាជីវៈលើ “គម្រោងពង្រឹងសមត្ថភាពសេដ្ឋកិច្ចយុវជនតាមរយៈការអភិវឌ្ឍជំនាញ (YEESD)”។

លោកស្រី គ្វីនេត វ៉ង នាយិកាប្រចាំប្រទេសរបស់អង្គការភ្លែនអន្តរជាតិកម្ពុជា លើកឡើងថា ក្រោមការអនុវត្តគម្រោងYEESD យុវជនចំនួន៨៣% ទទួលបានការងារសមរម្យ ឬបានចាប់ផ្ដើមបង្កើតអាជីវកម្មខ្នាតតូចរបស់ពួកគេក្នុងរយៈពេល៦ខែក្រោយពីរៀនចប់ ហើយនេះជាតួលេខដែលខ្ពស់។ បន្ថែមពីនេះ អង្គការភ្លែនអន្តរជាតិកម្ពុជាបានធ្វើការយ៉ាងជិតស្និតជាមួយក្រសួងការងារ និងបណ្ដុះបណ្ដាលវិជ្ជាជីវៈតាមរយៈអគ្គនាយកដ្ឋានអប់រំបណ្ដុះបណ្ដាលវិជ្ជាជីវៈ ដើម្បីពង្រឹងនូវប្រព័ន្ធTVET ក្នុងការធ្វើឱ្យឌីជីថលភាវូបនីយកម្ម និងប្រព័ន្ធ TVET បៃតង។

នាយិកាប្រចាំប្រទេសអង្គការភ្លែនអន្តរជាតិកម្ពុជា បន្តថា គម្រោងនេះបានផ្ដោតសំខាន់លើការផ្ដល់ធនធានគ្រប់គ្រាន់ទៅកាន់យុវជនដែលងាយរងគ្រោះ ជាពិសេសស្ត្រីដើម្បីឱ្យពួកគាត់ទទួលបាននូវការបណ្ដុះបណ្ដាលបច្ចេកទេស ការបណ្ដុះគំនិតជាសហគ្រិនភាព រួមនឹងការគាំទ្រចំណេះដឹងអំពីទីផ្សារ និងធនធានហិរញ្ញវត្ថុដើម្បីគាំទ្រអាជីវកម្ម និងជីវភាពរបស់ពួកគេ។​

របាយការណ៍របស់អង្គការភ្លែនអន្តរជាតិកម្ពុជា ដែលបានបង្ហាញនៅក្នុងវេទិកាស្តីពី«ភស្តុតាងក្នុងការធ្វើឱ្យប្រសើរឡើងនូវការពង្រឹងសមត្ថភាពសេដ្ឋកិច្ចយុវជន តាមរយៈការអភិវឌ្ឍជំនាញដែលភ្ជាប់ទៅនឹងការទទួលបានការងារ និងសហគ្រិនភាពសម្រាប់ជាជម្រើសក្នុងការធ្វើគោលនយោបាយ» បានបញ្ជាក់ថា ក្នុងចំណោមយុវជនក្រៅសាលាចំនួន ១ម៉ឺននាក់នេះ មានចំនួន៣,៥០០នាក់ បានចូលរួមដោយផ្ទាល់នៅក្នុងវគ្គបណ្តុះបណ្តាលបច្ចេកទេស និងវិជ្ជាជីវៈ និងជំនាញដែលពាក់ព័ន្ធ ព្រមទាំងចូលរួមការវាយតម្លៃជំនាញសិក្សានៅក្នុងវគ្គបណ្តុះបណ្តាលនៅខេត្តសៀមរាប ត្បូងឃ្មុំ រតនគិរី និងខេត្តស្ទឹងត្រែង។

អង្គការភ្លែនអន្តរជាតិកម្ពុជា បានគូសបញ្ជាក់ថា ជាលទ្ធផលសរុបមានយុវជនចំនួន៨៣ភាគរយ ត្រូវបានគេជួលឱ្យធ្វើការការងារ ឬចាប់ផ្តើមសហគ្រាសខ្នាតតូចរបស់ពួកគេក្នុងរយៈពេលប្រាំមួយខែ បន្ទាប់ពីបញ្ចប់ការសិក្សា ។ ជាមួយគ្នានេះ អង្គការភ្លែនអន្តរជាតិកម្ពុជាបានធ្វើការដោយផ្ទាល់ជាមួយក្រសួងការងារនិងបណ្តុះបណ្តាលវិជ្ជាជីវៈ តាមរយៈអគ្គនាយកដ្ឋានអប់រំបណ្តុះបណ្តាលបច្ចេកទេស និងវិជ្ជាជីវៈ (DGTVET) ដើម្បីកែលម្អប្រព័ន្ធអប់រំបណ្តុះបណ្តាលបច្ចេកទេស និងវិជ្ជាជីវៈ ជាពិសេសផ្តោតលើឌីជីថលភាវូបនីយកម្ម និងធ្វើឱ្យប្រព័ន្ធអប់រំបណ្តុះបណ្តាលបច្ចេកទេស និងវិជ្ជាជីវៈមានពណ៌បៃតង (បានបង្កើតការទទួលស្គាល់តាមប្រព័ន្ធអេឡិចត្រូនិចថ្នាក់ជាតិសម្រាប់វេទិកាវាយតម្លៃការសិក្សាពីមុន ហើយបច្ចុប្បន្នកំពុងស្ថិតក្រោមដំណើរការនៃការអភិវឌ្ឍឌីជីថល និងជីវិតបៃតងសម្រាប់សិក្ខាកាមអប់រំនិងបណ្តុះបណ្តាលបច្ចេកទេសនិងវិជ្ជាជីវៈ)៕