ភ្នំពេញ – សិស្សប្រឡងជាប់សញ្ញាបត្រមធ្យមសិក្សា​ទុតិយភូមិ​ ដែលទទួលបាន​និទ្ទេស A ចំនួន១១១ នាក់នៅខេត្តសៀមរាប បានទទួលរង្វាន់​លើកទឹកចិត្ត​ពីសម្តេច​ពិជ័យ​សេនា ទៀ បាញ់ ឧបនាយករដ្ឋមន្រ្តី រដ្ឋមន្រ្តីក្រសួងការពារជាតិ នូវ​ម៉ូតូម្នាក់​មួយគ្រឿង ភ្ជាប់ដោយស្លាកលេខ មួកសុវត្ថិភាព ប្រេងសាំង៥០លីត្រ និងលិខិតសសើរមួយ​ផងដែរ។

ក្នុងពិធី​ប្រគល់រង្វាន់​ម៉ូតូ​ដល់​សិស្ស​និទ្ទេស A កាលពីចុងសប្តាហ៍​កន្លងទៅនេះ សម្តេចពិជ័យសេនា ទៀ បាញ់ បានវាយតម្លៃខ្ពស់ចំពោះសិស្សានុសិស្ស ក៏ដូចលោកគ្រូអ្នកគ្រូ សាស្ត្រាចារ្យ និង មាតាបិតា អាណាព្យាបាលសិស្សទាំងអស់ ដែលបានចូលរួមចំណែកក្នុងការបណ្តុះបណ្តាលធនធានមនុស្សបានល្អនៅកម្ពុជា មិនថាគ្រឹះស្ថានរដ្ឋ និងឯកជន។

សម្តេចពិជ័យសេនាបន្តថា បន្ទាប់ពី​បញ្ចប់​មធ្យមសិក្សា​ទុតិយភូមិ​នេះទៅ ក្មួយៗ​ទាំងអស់​ត្រូវ​បន្ត​ការ​សិក្សា​នៅ​ថ្នាក់​មហាវិទ្យាល័យ សាកលវិទ្យាល័យ ទៅ​តាម​មុខវិជ្ជា និងជំនាញ​ដែលខ្លួន​ប្រាថ្នាចង់​បាន ដូច្នេះ ក្មួយៗ ចៅៗ ត្រូវខិតខំសិក្សាក្រេបយកចំណេះជំនាញ ព្រោះ​តែក្មួយៗ ចៅៗ គឺជា​សរសរ​ស្តម្ភដ៏​រឹងមាំ និង​ជាធនធាន​មនុស្ស​បន្ត​វេន ក្នុង​កិច្ច​អភិវឌ្ឍន៍​ប្រទេស​ឱ្យ​មានការ​រីកចំរើន ដូច​បណ្តា​ប្រទេស​ជឿន​លឿន​លើសកលលោក។

ជាមួយ​គ្នានេះ សម្តេច ទៀ បាញ់ ក៏បានសំណូមពរឱ្យសិស្សានុសិស្សទាំងអស់ ពេលបើកបរត្រូវគោរពច្បាប់ចរាចរណ៍ និងជៀសឱ្យឆ្ងាយពីគ្រឿងញៀន ដោយសារសិស្សានុសិស្សទាំងអស់ជាមូលដ្ឋានគ្រឹះ នៃប្រទេសជាតិទៅអនាគត។

បើតាម​លោក លី ប៊ុនណា ប្រធានមន្ទីរអប់រំ យុវជន និងកីឡាខេត្តសៀមរាប បានបញ្ជាក់ថា ការប្រឡងសញ្ញាបត្រមធ្យមសិក្សាទុតិយភូមិ សម័យប្រឡង ០៥ ខែធ្នូ ឆ្នាំ២០២២  នៅខេត្តសៀមរាប មានមណ្ឌលប្រឡងចំនួន ១៤មណ្ឌល ស្មើ៤១៨បន្ទប់ ដែលមានបេក្ខជនប្រឡងសរុប ១០ ៣៧៣នាក់ ស្រី៥ ៩៣៣នាក់ ក្នុងនោះថ្នាក់វិទ្យាសាស្ត្រ ៥មណ្ឌល ស្មើ ១៣១បន្ទប់ ចំនួន៣២៣៣នាក់ ស្រី ២០៥១នាក់ និង វិទ្យាសាស្ត្រសង្គមមាន៩មណ្ឌល មាន២៨៧បន្ទប់ មានចំនួន៧១៤០នាក់ ស្រី៣៨៨២នាក់ ។

ក្នុងនោះបេក្ខជនមកប្រឡង សរុបចំនួន ១០ ២២៩នាក់ ស្រី៥ ៨៦១នាក់, ថ្នាក់វិទ្យាសាស្ត្រ សរុប ៣២១៣នាក់ស្រី ២០៣៨នាក់ , ថ្នាក់វិទ្យាសាស្ត្រសង្គម សរុប ៧០១៦នាក់ ស្រី ៣៨២៣នាក់ ។ ក្នុងនោះមាន បេក្ខជនចំណេះទូទៅ ៩ ០៣៥នាក់ ស្រី ៣ ៨២៣នាក់ , បេក្ខជនស្វ័យរិនចំណេះទូទៅ សរុប ៩០៥នាក់ ស្រី៤៧៨នាក់ , បេក្ខជនបំពេញវិជ្ជា ១៣២នាក់ ស្រី៦៦នាក់ ,បេក្ខជនស្វ័យរិនបំពេញវិជ្ជា ១៥៧នាក់ ស្រី ៦៨នាក់  ។

ជាលទ្ធផលនៃការប្រឡងជាប់សញ្ញាបត្រមធ្យមសិក្សាទុតិយភូមិឆ្នាំ២០២១-២០២២ ទូទាំងខេត្ត សរុប ៨១១១នាក់ ស្រី ៤ពាន់៨៤២នាក់ ក្នុងនោះមានសិស្សជាប់និទ្ទេសA ចំនួន ១១១នាក់ ស្រី៦១នាក់ , និទេ្ទសB ចំនួន ៦៥៤នាក់ ស្រី ៤៣៦នាក់ , និទ្ទេសC ចំនួន ១ពាន់៧៧៦នាក់ ស្រី ១ពាន់១២៣នាក់ ,និទ្ទេសD  ចំនួន ៨៨១នាក់ ស្រី១៧៧៣នាក់ និង  និទ្ទេសE ចំនួន ២៦៨៩នាក់ ស្រី ១៤៣នាក់៕