សហស្ថាបនិកបណ្តាញ​សង្គម​យូធូប លោក Steve Chen បានបង្ហាញការព្រួយបារម្ភ ចំពោះខ្លឹមសារវីដេអូខ្លីៗនៅលើយូធូប ដែលអាចប៉ះពាល់ដល់អ្នកមើលជាកុមារ រួមទាំងកូនរបស់គាត់ផងដែរ។

ថ្លែងនៅក្នុងបទសម្ភាសន៍កាលពីពេលថ្មីៗនេះ ជាមួយសាលាធុរកិច្ច Stanford លោក Chen បានចែករំលែកថា គាត់ស្ទាក់ស្ទើរក្នុងការអនុញ្ញាតឱ្យកូនៗរបស់គាត់ប្រើវេទិកាបណ្ដាញសង្គមដូចជា TikTok, Instagram Reels និង YouTube Shorts សម្រាប់ការកម្សាន្ត។

លោក Chen បាននិយាយថា «ខ្ញុំមិនចង់ឱ្យកូនរបស់ខ្ញុំមានទម្លាប់មើលវីដេអូខ្លីតែមួយមុខនោះទេ ហើយពួកគេមិនអាចផ្ដោតអារម្មណ៍មើលអ្វីមួយដែលមានប្រវែងលើសពី ១៥នាទីឡើយ។»

លោក Steve Chen ដែលបានជួយបើកដំណើរការ YouTube ក្នុងឆ្នាំ២០០៥ បានបម្រើការជាប្រធានផ្នែកបច្ចេកវិទ្យា រហូតដល់វេទិកានេះ ត្រូវបានទិញដោយ Google នៅឆ្នាំ២០០៦។ ក្រោយមកគាត់បានបន្តបង្កើតអាជីវកម្មផ្សេងទៀត ហើយបានផ្លាស់ប្ដូរទៅរស់នៅជាមួយគ្រួសាររបស់លោកនៅកោះតៃវ៉ាន់ ក្នុងឆ្នាំ២០១៩។

ទស្សនៈលោក Steve Chen ចំពោះវីដេអូទម្រង់ខ្លី

នៅក្នុងកិច្ចពិភាក្សាជាមួយ Stanford លោក Chen បានលើកឡើងពីការព្រួយបារម្ភកាន់តែខ្លាំងឡើង ចំពោះឥទ្ធិពលបច្ចេកវិទ្យាឌីជីថលមកលើកុមារ។ គាត់បានពន្យល់ថា វីដេអូខ្លីៗ ដែលជាលក្ខណៈវីដេអូកម្សាន្ត អាចជំរុញឱ្យកុមារមានការចាប់អារម្មណ៍ភ្លាមៗ ហើយធ្វើឱ្យពួកគេ ចង់មើលវីដេអូទាំងនោះជាបន្តបន្ទាប់ ព្រោះខ្លឹមសារនៃមាតិកាទាំងនោះ បង្កើតឡើង ដើម្បីទាក់ទាញចិត្តមនុស្ស ឱ្យនៅទស្សនាបានយូរ។

ទន្ទឹមនឹងនេះ Chen បានដាក់សំណើរដែលជាដំណោះស្រាយមួយ ដោយលោក បានស្នើឱ្យវេទិកាទាំងអស់ អាចណែនាំពីការកំណត់ពេលវេលាសម្រាប់អ្នកប្រើប្រាស់ និងការសម្រួលពេលវេលាកំណត់ សម្រាប់អ្នកប្រើប្រាស់តាមក្រុមអាយុ។

ឥទ្ធិពលនៃវីដេអូខ្លីមកលើខួរក្បាល

អ្នកស្រាវជ្រាវបានរកឃើញថា អ្នកដែលចំណាយពេលច្រើនមើលវីដេអូខ្លីៗច្រើនតែពិបាកផ្ដោតអារម្មណ៍។ ទម្លាប់នេះអាចរំខានដល់សមត្ថភាពខួរក្បាលផ្ដោតក្នុងរយៈពេលវែង ដែលនាំឱ្យការគ្រប់គ្រងខ្លួនឯងចុះខ្សោយ។

យោងតាមការសិក្សាដែលបានចេញផ្សាយនៅក្នុងបណ្ណាល័យជាតិវេជ្ជសាស្ត្រ បានបង្ហាញថា វីដេអូខ្លីៗ គឺជាវីដេអូ ដែលសម្បូរខ្លឹមសារទាក់ទាញចំណាប់អារម្មណ៍របស់អ្នកមើល។ ការមើលវីដេអូប្រភេទនេះច្រើនពេក អាចធ្វើឱ្យតំបន់ខាងក្រោមរបស់ខួរក្បាលសកម្មភ្ជាប់ទៅនឹងអារម្មណ៍ ហើយកាត់បន្ថយសកម្មភាពនៅក្នុងតំបន់ ដែលគ្រប់គ្រងការផ្ដោតអារម្មណ៍ និងការគ្រប់គ្រងខ្លួនឯង។ គម្រូនេះអាចបង្កើនហានិភ័យ នៃការញៀន និងធ្វើឱ្យពិបាកក្នុងការរក្សាវិន័យ និងចុះខ្សោយសមត្ថភាពផ្ដោតអារម្មណ៍ ឬយកចិត្តទុកដាក់៕