យោងតាម WE Forum បានឱ្យដឹងថា រយៈពេលប៉ុន្មានឆ្នាំចុងក្រោយនេះ យុវជនសម័យថ្មី មានបញ្ហាជាច្រើនដែលត្រូវដោះស្រាយ ក្នុងនោះ រាប់ចាប់ពីជំងឺរាត្បាត ការប្រែប្រួលអាកាសធាតុ ការកើនឡើងនៃវិសមភាពសង្គម រហូតដល់ភាពតានតឹងភូមិសាស្ត្រនយោបាយ។ ដោយសារលក្ខខណ្ឌទាំងនេះ ពួកគេត្រូវបានបណ្ដារក្រុមហ៊ុន និងស្ថាប័នដែលពួកគេធ្វើការជំរុញ លើកទឹកចិត្ត និងអភិវឌ្ឍជំនាញរបស់ពួកគេបន្ថែមតាមរយៈសកម្មភាពផ្សេងៗជាច្រើន។

បើតាមការស្ទង់មតិកាលពីពេលថ្មីៗនេះ របស់ Global Workforce Hopes and Fears Survey ទៅលើបុគ្គលិកប្រមាណ ៥៤,០០០នាក់ មកពី ៤៦ប្រទេស បានបង្ហាញថា យុវជនសម័យថ្មីមានសុទិដ្ឋិនិយមខ្លាំងចំពោះអនាគតការងាររបស់ខ្លួន ជាពិសេសទាក់ទងនឹងការអភិវឌ្ឍជំនាញ និងឱកាសរៀនសូត្រថ្មីៗ។

យុវជនជំនាន់ Z ( មនុស្សអាយុចន្លោះពី ១៨ ទៅ ២៦ឆ្នាំ) ដែលបានចូលរួមស្ទង់មតិ មានទំនោជឿជាក់ថា និយោជករបស់ពួកគេនឹងជួយពួកគេឱ្យមានជំនាញ ដែលពួកគេត្រូវការសម្រាប់ពេលអនាគត។ ជាក់ស្ដែង បុគ្គលិក ដែលជាយុវជនជំនាន់ Z ចំនួន ៣នាក់ ក្នុងចំណោម ៥នាក់ជឿថា និយោជករបស់ពួកគេនឹងអនុញ្ញាតឱ្យពួកគេអភិវឌ្ឍសមត្ថភាពគិត ការសហការ និងជំនាញវិភាគ (៦៥ភាគរយ, ៦៣ភាគរយ និង ៦១ភាគរយរៀងគ្នា) ប្រហែល ១០ភាគរយខ្ពស់ជាងភាគរយសមមូលរបស់មនុស្សជំនាន់ Baby Boomer (មនុស្សចន្លោះពី ៥៩ ទៅ ៧៧ឆ្នាំ ដែលចូលរួមស្ទង់មតិ)។

តារាងខាងក្រោមនេះមានភាពស្មុគស្មាញបន្តិចទាក់ទងនឹងបញ្ញាសិប្បនិម្មិត (AI) ដែលវេទិកាសេដ្ឋកិច្ចពិភពលោកបានស្រាវជ្រាវ និងរំពឹងថាត្រូវបានអនុម័តដោយ ៧៥ភាគរយនៃក្រុមហ៊ុន។ អង្គភាពចំនួន ៥០ភាគរយ ដែលបានចូលរួមស្ទង់មតិរំពឹងថា នឹងបង្កើនកំណើនការងារ ខណៈដែល ២៥ភាគរយរំពឹងថា បច្ចេកវិទ្យានេះនឹងធ្វើឱ្យបាត់បង់ការងារ។

ការស្ទង់មតិរបស់ WE Forum បានរកឃើញថា ១៧ភាគរយនៃបុគ្គលិកជំនាន់ Z មានការព្រួយបារម្ភថា បញ្ញាសិប្បសិប្បនិម្មិត (AI) នឹងជំនួសអាជីពរបស់ពួកគេក្នុងរយៈពេលប្រាំឆ្នាំខាងមុខ ខណៈ Baby Boomer មានត្រឹមតែ ៨ភាគរយប៉ុណ្ណោះ ដែលគិតបែបនេះ។ ទោះជាយ៉ាងណាក៏ដោយ ការយល់ឃើញមួយនេះ គឺមានភាគរយតិចជាងមនុស្សដែលមានទស្សនៈវិជ្ជមាន ដោយមួយភាគបួននៃមនុស្សជំនាន់ Z រំពឹងថា បញ្ញាសិប្បនិម្មិត (AI) អាចជួយ​ឱ្យពួកគេអភិវឌ្ឍជំនាញថ្មី ឬបង្កើតឱកាសការងារថ្មីៗ។ អ្វីដែលកាន់តែពិសេសនោះគេ យុវជនបានដឹងច្បាស់ថា ការផ្លាស់ប្ដូរបានមកដល់ ហើយក៏បានត្រៀមខ្លួនរួចរាល់សម្រាប់ការផ្លាស់ប្ដូរនេះ។

តាមរយៈរូបភាពនេះ ពិភពលោកពិតជាសំណាង ដែលយុវជនសម័យថ្មីមានទស្សនៈវិជ្ជមានចំពោះអនាគតរបស់ខ្លួន។ ដូច្នេះ អ្វីដែលម្ចាស់អាជីវកម្ម រដ្ឋាភិបាល និងស្ថាប័នពាក់ព័ន្ធទាំងអស់ត្រូវធ្វើគឺជំរុញក្ដីសង្ឃឹម និងការយល់ឃើញវិជ្ជមាននេះឱ្យក្លាយជាការពិតសម្រាប់ពួកគេ៕