មានសាលារៀនតែមួយគត់នៅក្នុងភូមិ Baziyan ស្រុក Badong នៃខេត្ត Hubei ប្រទេសចិន។ ដូចតំបន់ផ្សេងទៀត ដែលនៅឆ្ងាយពីទីក្រុងធំៗនៅក្នុងប្រទេសដែរ គឺសាលាបឋមសិក្សា Baishaping កំពុងពិបាកស្វែងរកគ្រូបង្រៀន ដែលមានសមត្ថភាពខ្ពស់មកបង្រៀន។ ប៉ុន្តែ សិស្ស និងបុគ្គលិកនៅសាលានេះ កំពុងទទួលបានជំនួយពីប្រភពដ៏គួរឱ្យភ្ញាក់ផ្អើលមួយ គឺសិស្សនៅទីនេះ បានទទួលមេរៀនពីគ្រូបង្រៀន AI ដែលជាបទពិសោធថ្មីមួយសម្រាប់អ្នកសិក្សាក្នុងតំបន់។ 

ស្វ័យសិក្សាជាមួយគ្រូបង្រៀន AI

ខណៈពេលដែលប្រទេសចិនកំពុងព្យាយាមលុបបំបាត់គម្លាតនៃការអប់រំរវាងអ្នកនៅទីក្រុង និងជនបទ ភាពខុសគ្នានៅតែមាន ជាពិសេសគឺអតុល្យភាពរវាងធនធានអប់រំប្រកបដោយគុណភាព រវាងសាលានៅទីក្រុង និងជនបទ, ចំណុចនេះអាចធ្វើឱ្យសិស្សនៅតំបន់មួយចំនួន ប្រឈមនឹងកង្វះនៃការអប់រំប្រកបដោយគុណភាពខ្ពស់។

នៅសាលាបឋមសិក្សា Baishaping សិស្សានុសិស្សជាច្រើនកំពុងពិបាកក្នុងការអភិវឌ្ឍចំណេះដឹង លើមុខវិជ្ជាសំខាន់ៗ ដូចជា គណិតវិទ្យា និងសមត្ថភាពក្នុងការអានជាដើម។ ដូច្នេះ បុគ្គលិកអប់រំនៃសាលានេះ បានជ្រើសរើសវិធីសាស្ត្របង្រៀនដោយប្រើវេទិកាបញ្ញាសិប្បនិម្មិត (AI) ដើម្បីពង្រឹងសមត្ថភាពសិស្ស។ 

ដើម្បីស្វែងយល់គម្លាតនៃចំណេះដឹងរបស់សិស្សម្នាក់ៗ សិស្សទាំងអស់តម្រូវឱ្យឆ្លងកាត់ការធ្វើតេស្ត ជាមួយនឹងប្រព័ន្ធសិក្សា ដែលមានលក្ខណៈបត់បែន ដោយមានវេទិកា AI ជាមូលដ្ឋាន ដែលបច្ចេកវិទ្យានេះទទួលបានពីក្រុមហ៊ុនបច្ចេកវិទ្យាអប់រំ Squirrel AI Learning។ បច្ចេកវិទ្យានេះ អនុញ្ញាតឱ្យសិស្សស្វ័យសិក្សា និងបង្កើតមេរៀនផ្ទាល់ខ្លួន ដែលមេរៀននេះ គឺសម្របនឹងសមត្ថភាពរបស់សិស្សម្នាក់ៗ។ 

បច្ចេកវិទ្យាដែលមានភាពបត់បែន 

មិនដូចឧបករណ៍បញ្ញាសិប្បនិម្មិត (AI) ផ្សេងៗ ដែលផ្អែកលើគម្រូភាសាធំៗ ដូចជា ChatGPT ដែលអាចពន្យល់ប្រធានបទ ឬសូម្បីតែសរសេរសំណេរនោះទេ, ប្រព័ន្ធរបស់ Squirrel AI គឺជាអ្វី ដែលត្រូវបានគេហៅថា គម្រូសម្របខ្លួនធំ (Large adaptive Model-LAM)។ វារួមបញ្ចូលនូវបញ្ញាសប្បនិម្មិត (AI) ដែលមានលក្ខណៈបត់បែន (Adaptive AI) អាចរៀន និងសម្របខ្លួនទៅនឹងទិន្នន័យថ្មី ជាមួយនឹងគម្រូពហុមុខងារ សម្រាប់ដំណើរការអប់រំ ដែលអាចបញ្ចូលនូវធាតុជាច្រើន រួមទាំង អត្ថបទ រូបភាព និងវីដេអូ។ 

សម្រាប់ Squirrel AI ធាតុចូលនៃវេទិការនេះ រួមបញ្ចូលនូវទិន្នន័យពីសិស្សជាង ២៤លាននាក់ និងអាកប្បកិរិយាសិក្សាប្រមាណ ១០លាន ព្រមទាំងចំណេះដឹងមកពីគ្រូបង្រៀនដែលល្អបំផុតជុំវិញពិភពលោក។ នេះបើយោងតាមស្ថាបនិកវេទិកានេះ លោក Derek Haoyang Li ក្នុងកិច្ចប្រជុំដែលរៀបចំឡើងដោយ វេទិកាសេដ្ឋកិច្ចពិភពលោក។ 

ក្រុមហ៊ុននេះ ធ្វើការជាមួយគ្រូបង្រៀនជាច្រើន ដើម្បីរៀបចំវគ្គសិក្សា ដែលផ្ដល់នូវចំណេះដឹងជាច្រើន និងរំលេចនូវចំណុចតូចៗ ដើម្បីធ្វើយ៉ាងណា លុបបំបាត់គម្លាតចំណេះដឹងរបស់សិស្ស និងធានាថា សិស្សអាចមានលទ្ធភាពយល់នូវរាល់មេរៀន​ ដែលពួកគេបានរៀន។ អ្នកបង្កើតវេទិកា AI សម្រាប់ការអប់រំរូបនេះ យល់ថា វត្តមានរបស់ AI នឹងធ្វើ​ឱ្យការអប់រំផ្លាស់ប្ដូរខ្លាំង ហើយ AI នឹងជួយខួរក្បាលមនុស្សឱ្យឆ្លាតជាងមុន ១០ ដង។ 

ការអប់រំប្រកបដោយសមធម៌ 

បន្ទាប់ពីប្រើប្រាស់ប្រព័ន្ធបានត្រឹមតែមួយខែប៉ុណ្ណោះ សាលាបឋមសិក្សា Baishaping កំពុងមើលឃើញពីភាពប្រសើរឡើងគួរឱ្យកត់សម្គាល់ក្នុងថ្នាក់រៀន ការចូលរួម និងទំនុកចិត្តរបស់សិស្ស។ 

លោក Li និយាយអំពីសិស្ស ដែលប្រើវេទិកានេះថា «យើងរកឃើញពីល្បឿនសិក្សារបស់គេផ្ទាល់ ហើយផ្ដល់ឱ្យពួកគេនូវសម្ភារ និងវិធីសាស្ត្របង្វឹកបានត្រឹមត្រូវ ដែលធ្វើឱ្យសិស្សទាំងអស់មានអារម្មណ៍ថា ពួកគេងាយស្រួលសិក្សា ហើយរៀនដោយសប្បាយចិត្ត។»

មិនមែនគ្រាន់តែសិស្សនៃសាលា Baishaping នោះទេ ដែលប្រើប្រព័ន្ធ Squirrel AI សម្រាប់សិក្សា។ ក្រុមហ៊ុននេះ បានដំណើរការមួយទសវត្សរ៍ទៅហើយ ហើយបច្ចុប្បន្ន មានមជ្ឈមណ្ឌល​សិក្សាជាង ២ ពាន់​ ក្នុងទីក្រុងជាទីច្រើន ក្នុងប្រទេសចិន។ កម្មវិធីនេះ មានសិស្សចុះឈ្មោះសិក្សាជាង ២៤លាននាក់ និងបានផ្ដល់គណនីសិក្សាដោយឥតគិតថ្លៃ ចំនួន ១០លាន ដល់គ្រួសារក្រីក្រក្នុងប្រទេសចិន៕