ប្រទេសហ្វាំងឡង់ បានរៀបចំកម្មវិធីសិក្សាអំពីអក្ខរកម្មប្រព័ន្ធផ្សព្វផ្សាយ សម្រាប់សិស្សថ្នាក់បឋមសិក្សារបស់ពួកគេ ដើម្បីឱ្យសិស្សយល់ដឹងអំពីពិភពអនឡាញ។ ប្រទេសនេះ បានចាត់ទុកការអប់រំ គឺជាអាវុធ ដើម្បីប្រយុទ្ធនឹងព័ត៌មានក្លែងក្លាយ ព័ត៌មានភាន់ច្រឡំ និងការបោកបញ្ឆោតតាមអនឡាញ។

ប្រទេសនៅតំបន់ Nordic នេះ បានជាប់ចំណាត់ថ្នាក់ ជាប្រទេស ដែលមានប្រជាជនយល់ដឹងអំពីប្រព័ន្ធផ្សព្វផ្សាយច្រើនបំផុតនៅអឺរ៉ុប និងត្រូវបានគេចាត់ទុកថា ជាប្រទេសមានភាពធន់ខ្លាំងបំផុតនឹងព័ត៌មានមិនពិត, នេះបើតាមសន្ទស្សន៍អក្ខរកម្មប្រព័ន្ធផ្សព្វផ្សាយដែលចងក្រងដោយវិទ្យាស្ថាន Open Society ។

តាមរយៈការបង្រៀនពលរដ្ឋអំពីរបៀបក្នុងការឆ្លើយតបទៅនឹងខ្លឹមសារប្រព័ន្ធផ្សព្វផ្សាយប្រកបដោយការត្រិះរិះពិចារណា ពិតជាមានសារៈសំខាន់ ដើម្បីប្រឆាំងការបោកបញ្ឆោត ការផ្សាយព័ត៌មានមិនពិត និងព័ត៌មានភាន់ច្រឡំ ក៏ដូចជា បង្ហាញពីរបៀបដែលអ្នកផលិតមាតិកា អាចផលិតមាតិកាបានត្រឹមត្រូវ។

ហ្វាំងឡង់ ស្ថិតក្នុងចំណោមប្រទេសដំបូងគេក្នុងទ្វីបអឺរ៉ុប ដែលបានគូសបញ្ជាក់ពីគោលនយោបាយជាតិ សម្រាប់ការអប់រំអំពីចំណេះដឹងប្រព័ន្ធផ្សព្វផ្សាយក្នុងឆ្នាំ២០១៣។

គោលនយោបាយនេះ បានធ្វើបច្ចុប្បន្នភាពនៅឆ្នាំ២០១៩ ដោយធានាថា អក្ខរកម្មប្រព័ន្ធផ្សព្វផ្សាយ ត្រូវដាក់បញ្ចូលទៅក្នុងកម្មវិធីសិក្សាអប់រំកុមារតាំងពីកុមារភាពរហូតដល់ថ្នាក់វិទ្យាល័យ។ ដោយឡែក ដើម្បីបង្កើនជំនាញសម្រាប់មនុស្សពេញវ័យ និងមនុស្សចាស់ បណ្ណាល័យ និងអង្គការក្រៅរដ្ឋាភិបាល បាននិងកំពុងបង្កើតវគ្គខ្លី ដើម្បីអប់រំបន្ថែម។

លោក Ander Adlercreutz រដ្ឋមន្ត្រីក្រសួងអប់រំហ្វាំងឡង់ បានប្រាប់ទីភ្នាក់ងារសារព័ត៌មានបារាំង AFP ថា អក្ខរកម្មប្រព័ន្ធផ្សព្វផ្សាយមានសារៈសំខាន់ណាស់ ក្នុងការកសាងភាពធន់សម្រាប់សង្គម ហើយហ្វាំងឡង់ បានដឹងរឿងនេះច្បាស់។ វាពិតជាសំខាន់ណាស់ សម្រាប់ប្រជាជនហ្វាំងឡង់ ដែលត្រូវមានសមត្ថភាពវាយតម្លៃបានយ៉ាងស៊ីជម្រៅអំពី ព័ត៌មាន ដែលគេកំពុងអាន ថា ព័ត៌មានទាំងនោះត្រឹមត្រូវ និងពិត ឬក៏អត់។

បើតាម AFP ហ្វាំងឡង់មានវប្បធម៌ជាយូរមកហើយ ក្នុងការលើកកម្ពស់ជំនាញប្រព័ន្ធផ្សព្វផ្សាយទៅដល់ប្រជាពលរដ្ឋ ដោយមានការបង្រៀនដោយឥតគិតថ្លៃ គឺត្រូវបានដំណើរការលើកដំបូងតាំងពីឆ្នាំ១៩៧០មកម្ល៉េះ។ ខណៈបច្ចុប្បន្ន ប្រព័ន្ធផ្សព្វផ្សាយមានការវិវិត្តន៍ និងមានលក្ខណៈឌីជីថលកាន់តែខ្លាំង វត្ថុបំណងសំខាន់នៃការបណ្ដុះបណ្ដាលជំនាញអក្ខរកម្មប្រព័ន្ធផ្សព្វផ្សាយនេះ គឺបង្រៀនឱ្យមនុស្សមានសមត្ថភាពត្រិះរិះពិចារណា៕