ប្រទេសក្នុងតំបន់អឺរ៉ុប និងអាម៉េរិកខាងជើង ជារឿយៗ តែងតែទទួលបានការកោតសរសើរចំពោះប្រព័ន្ធអប់រំសាធារណៈដ៏ល្អ, សាកលវិទ្យាល័យកំពូលៗ និងមានសិស្សទទួលបានលទ្ធផលសិក្សាខ្ពស់ជាងគេនៅទូទាំងពិភពលោក ដែលនាំឱ្យប្រទេសទាំងនេះ ក្លាយជាប្រទេសមានវិស័យអប់រំល្អបំផុត, នេះបើយោងតាមការចាត់ថ្នាក់ដោយ US News & World Report ។

សហរដ្ឋអាមេរិក ជាប់ចំណាត់ថ្នាក់ជាប្រទេសមានប្រព័ន្ធអប់រំល្អបំផុតក្នុងឆ្នាំ២០២៤ លទ្ធផលនេះ ផ្អែកលើការស្ទង់មតិរបស់អ្នកឆ្លើយសំណួរជិត ១៧,០០០នាក់ ដោយការវាយតម្លៃផ្អែកលើកត្តាសំខាន់ៗចំនួន ៣ រួមមាន ៖ គុណភាពនៃប្រព័ន្ធអប់រំសាធារណៈ, មូលហេតុដែលអ្នកឆ្លើយតបពិចារណាចូលរៀននៅសាកលវិទ្យាល័យរបស់អាមេរិក និងកេរ្តិ៍ឈ្មោះនៃសាកលវិទ្យាល័យកំពូលៗក្នុងប្រទេសនេះ។

អាមេរិកជាប់លេខ១ក្នុងការស្ទង់មតិ

យោងតាម U.S. News បានបង្ហាញថា ការអប់រំសាធារណៈនៅសហរដ្ឋអាមេរិក បានទទួលមូលនិធិគាំទ្រយ៉ាងច្រើន តាមរយៈពន្ធរដ្ឋ និងចំណូលពន្ធក្នុងតំបន់ ដោយការអប់រំជាកំហិតចាប់ផ្ដើមពីអាយុ ៥ឆ្នាំ និងបន្តរហូតដល់អាយុយ៉ាងតិច ១៦ឆ្នាំ អាស្រ័យលើរដ្ឋនីមួយៗ។ ក្នុងចំណោមនិស្សិតអាមេរិកចំនួន ៣,១លាននាក់ ដែលមានអាយុចន្លោះពី ១៦ ទៅ២៤ឆ្នាំ ដែលបានបញ្ចប់ការសិក្សាកម្រិតវិទ្យាល័យក្នុងឆ្នាំ២០២៣ មាន ៦១% បានចុះឈ្មោះចូលរៀននៅមហាវិទ្យាល័យនៅខែតុលា។

សាកលវិទ្យាល័យកំពូលចំនួន ៧របស់ពិភពលោក គឺស្ថិតនៅសហរដ្ឋអាមេរិក ដែលក្នុងនោះមានដូចជា សាកលវិទ្យាល័យ Havard, វិទ្យាស្ថានបច្ចេកវិទ្យា Massachusett (MIT), សាកលវិទ្យាល័យ Stanford, សាកលវិទ្យាល័យ California Berkeley, សាកលវិទ្យាល័យ Washington Seattle, សាកលវិទ្យាល័យ Yale និងសាកលវិទ្យាល័យ Columbia ។

នៅលើកម្មវិធី២០២២ របស់អង្គការសម្រាប់កិច្ចសហប្រតិបត្តិការសេដ្ឋកិច្ច និងការអភិវឌ្ឍ (OECD) សម្រាប់ការវាយតម្លៃសិស្សអន្តរជាតិ (PISA) សិស្សសហរដ្ឋអាមេរិក បានអនុវត្តលើសពីមធ្យមភាគក្នុងការអាន និងវិទ្យាសាស្ត្រ ប៉ុន្តែទាបជាងមធ្យមភាគបន្តិចលើមុខវិជ្ជាគណិតវិទ្យា។

ចក្រភពអង់គ្លេស ស្ថិតនៅចំណាត់ថ្នាក់លេខ២, សិស្សចាប់ផ្ដើមចូលរៀននៅអាយុ ៤ ឬ៥ឆ្នាំ ហើយការអប់រំកំហិតជាទូទៅ មានរយៈពេលរហូតដល់ ១៦ឆ្នាំ ជាមួយនឹងអាណត្តិបន្ថែមក្នុងប្រទេសអង់គ្លេសបន្តដល់អាយុ ១៨ឆ្នាំ។ នៅឆ្នាំ ២០២២ សិស្សនៅចក្រភពអង់គ្លេស ទទួលបានពិន្ទុលើសមធ្យមភាគ OECD លើមុខវិជ្ជាគណិតវិទ្យា ការអាន និងវិទ្យាសាស្ត្រ។ ប្រទេសនេះ ក៏មានសាកលវិទ្យាល័យចំនួន ៣ ក្នុងចំណោមសាកលវិទ្យាល័យកំពូលទាំង ១០របស់ពិភពលោកដែរ ដែលក្នុងនោះ​ រួមមាន Oxford, Cambridge និង Imperial College London ។

ប្រទេសអាល្លឺម៉ង់ជាប់ចំណាត់ថ្នាក់លេខ៣ និងត្រូវបានគេស្គាល់ថា ជាទីកន្លែងកំណើតនៃសាលាកម្រិតមត្តេយ្យសិក្សា។ កុមារភាគច្រើន ចូលរៀន នៅអាយុចន្លោះពី ៣ ទៅ៦ឆ្នាំ ដោយមានការអប់រំជាកំហិត ចាប់ពីអាយុ ៦ឆ្នាំ។ ប្រព័ន្ធអប់រំរបស់ប្រទេសអាល្លឺម៉ង់ មានជម្រើសផ្សេងៗគ្នា ដូចជា Hauptschule សម្រាប់ការអប់រំមធ្យមសិក្សាបឋមភូមិ និងការបណ្តុះបណ្តាលវិជ្ជាជីវៈ និងថ្នាក់កាយសម្ព័ន្ធ ដែលរៀបចំសិស្ស សម្រាប់ថ្នាក់សាកលវិទ្យាល័យ។ សិស្សអាល្លឺម៉ង់ ទទួលបានពិន្ទុខ្ពស់ជាងមធ្យមភាគ OECD បន្តិច ក្នុងការអាន គណិតវិទ្យា និងវិទ្យាសាស្ត្រ ក្នុងឆ្នាំ២០២២។

ប្រទេសកាណាដា ស្ថិតនៅលំដាប់ទី៤ ក្នុងបញ្ជី, ការអប់រំសាធារណៈ គឺមិនគិតថ្លៃសម្រាប់អ្នកស្នាក់នៅ ខណៈពេលដែលនិស្សិតអន្តរជាតិត្រូវបង់ថ្លៃសិក្សា។ កុមារចាប់ផ្ដើមថ្នាក់បឋមសិក្សានៅអាយុ ៤ឆ្នាំ ហើយត្រូវចូលរៀន រហូតដល់អាយុ ១៦ ឬ១៨ឆ្នាំ អាស្រ័យតាមប្រព័ន្ធអប់រំនៃខេត្តនីមួយៗ។ និស្សិតកាណាដា ពូកែខាង អាន គណិតវិទ្យា និងវិទ្យាសាស្ត្រ លើការវាយតម្លៃ OECD ឆ្នាំ២០២២ ហើយប្រទេសនេះ ជាទីតាំងនៃសាកលវិទ្យាល័យកំពូលៗមួយចំនួនរបស់ពិភពលោកផងដែរ។

បារាំងដណ្ដើមបានចំណាត់ថ្នាក់កំពូលទី ៥, ការអប់រំក្នុងប្រទេសនេះ ត្រូវបានដាក់កំហិតចាប់ពីអាយុ ៣ ដល់១៦ឆ្នាំ ដោយផ្អែកលើកម្មវិធីសិក្សាថ្នាក់ជាតិ ហើយការអប់រំកម្រិតឧត្តមសិក្សា គឺភាគច្រើនឧត្ថម្ភដោយរដ្ឋាភិបាល។ យោងតាមទិន្នន័យ PISA ឆ្នាំ ២០២២ ក្មេងអាយុ ១៥ឆ្នាំជនជាតិបារាំង ទទួលបានពិន្ទុខ្ពស់ជាងមធ្យមភាគ OECD បន្តិច លើមុខវិជ្ជាវិទ្យាសាស្ត្រ និងគណិតវិទ្យា ទោះបីជាទាបជាងមធ្យមបន្តិច ក្នុងការអានក៏ដោយ។

ចំពោះប្រទេសដែលស្ថិតនៅចំណាត់ថ្នាក់កំពូលទាំង ១០ រួមមានដូចជា ស្វីស ជប៉ុន អូស្ត្រាលី ស៊ុយអែត និងដាណឺម៉ាក៕