ខុសពីឆ្នាំកន្លងទៅ ដែលរាជធានីភ្នំពេញ និង​ខេត្ត​កណ្តាល ត្រូវ​ប្រកាស​លទ្ធផល​មុនគេ ប៉ុន្តែ​នៅឆ្នាំនេះ ក្រសួងអប់រំ យុវជន និងកីឡា នឹងប្រកាសលទ្ធផលប្រឡងបាក់ឌុបតាមមណ្ឌលសំណេរទាំង​២៥រាជធានី-ខេត្តនៅទូទាំងប្រទេស ក្នុងថ្ងៃតែមួយ គឺនៅថ្ងៃទី២០ ខែកញ្ញាខាងមុខ។

លោកជំទាវបណ្ឌិត ឃួន វិច្ឆិកា អ្នកនាំពាក្យក្រសួងអប់រំ យុវជន និងកីឡា មានប្រសាសន៍ថា​ ដំណើរការ នៃការ​បូកស្រង់ពិន្ទុ បានចាប់ផ្តើមដំណើរការចាប់តាំងពីព្រឹកថ្ងៃទី៨ ខែកញ្ញា។

អ្នកនាំពាក្យអះអាងថា ក្រសួងអប់រំ តាំងចិត្តថា នឹងបំពេញការងារឱ្យបានច្បាស់លាស់ និងម៉ត់ចត់ ដូច្នេះ ក្រសួងគ្រោងនឹងប្រកាសលទ្ធផល ក្នុងថ្ងៃទី២០ ខែកញ្ញា ខាងមុខ តាមមណ្ឌលសំណេរនៃរាជធានី ខេត្តទាំង២៥ទូទាំងប្រទេស។

ក្នុងកិច្ចប្រជុំស្តីពីការណែនាំបច្ចេកទេសដល់គណៈកម្មការស្រង់ បូកពិន្ទុដោយកុំព្យូទ័រ និងផ្ទៀងផ្ទាត់ពិន្ទុ សម្រាប់ការប្រឡងសញ្ញាបត្រមធ្យមសិក្សាទុតិយភូមិ សម័យប្រឡង៖ ២៨ សីហា ២០២៥ កាលពីដើមសប្តាហ៍នេះ ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា និងជាប្រធានគណៈមេប្រយោគទូទាំងប្រទេសកំណែ មានប្រសាសន៍ថា ក្រសួងអប់រំ នឹងបន្តវាយតម្លៃគ្រប់ដំណាក់កាល រួមមាន តំណាក់កាលសំណេរ កំណែ និងបូកស្រង់ពិន្ទុ និងផ្ទៀងផ្ទាត់ ដើម្បីបន្តកែលម្អយន្តការរៀបចំការប្រឡងសញ្ញាបត្រមធ្យមសិក្សាទុតិយភូមិ ឱ្យកាន់តែល្អប្រសើរពីមួយឆ្នាំទៅមួយឆ្នាំ។

យ៉ាងណាដើម្បីឱ្យយន្តការប្រឡងដំណើរការទៅរលូនល្អ និងទទួលបានលទ្ធផលសុក្រឹត ឯកឧត្តមបណ្ឌិតសភាចារ្យ ហង់ជួន ណារ៉ុន បានផ្តល់អនុសាសន៍ រួមមាន (១) ត្រូវបន្តពង្រឹងសមត្ថភាពក្រុមការងារនៅគ្រប់ដំណាក់កាលទាំងអស់ ជាពិសេសការពង្រឹងសមត្ថភាពក្រុមមុខវិជ្ជា (២) ពិនិត្យយន្តការត្រួតពិនិត្យផ្ទៀងផ្ទាត់ ធានាឱ្យបាននូវសុក្រឹតភាព (៣) ចំណុចសំខាន់ គឺអ្នកបញ្ចូលពិន្ទុ ត្រូវហ្មត់ចត់ និងច្បាស់លាស់ (៤) បន្តពង្រឹងវិន័យ ហាមឃាត់ឱ្យបានជាដាច់ខាតនូវការប្រើប្រាស់ទូរស័ព្ទដៃក្នុងអំឡុងពេលអនុវត្តការងារ (៥) ការផ្ទៀងផ្ទាត់៖ សូមរៀបចំក្រុមការងារដើរត្រួតពិនិត្យ និងត្រូវមានយន្តការ Spot Check (៦) សូមក្រុមការងាររក្សាសុខភាពឱ្យរឹងមាំ និងស្មារតីនឹងនរ ហ្មត់ចត់ ច្បាស់លាស់ក្នុងការបំពេញការងារនេះ រហូតដល់បញ្ចប់គ្រប់ដំណាក់កាលដោយជោគជ័យ។

គួរបញ្ជាក់ថា ដំណាក់កាលបូកពិន្ទុដោយកុំព្យូទ័រ និងផ្ទៀងផ្ទាត់ពិន្ទុ មានរយៈពេល១០ថ្ងៃ និងត្រូវបំពេញការងារពេញម៉ោង មិនអនុញ្ញាតឱ្យបញ្ចប់មុនម៉ោងកំណត់ ឬថ្ងៃកំណត់ឡើយ៕