សាលារៀនសហគមន៍២១ ជាបណ្តាញ​គ្រឹះស្ថានអប់រំ​មួយ​របស់ វេសឡាញ អេឌ្យូខេសិន គ្រុប ដែលបាន​បង្កើត​ឡើង​កាលពីឆ្នាំ​២០២២ ហើយ​រហូត​មក​ដល់បច្ចុប្បន្ន​សាលារៀន​សហគមន៍២១ មានចំនួន ៨សាខា ស្ថិត​នៅ​តំបន់ជាយរាជធានីភ្នំពេញ និង​បណ្តា​ខេត្ត​មួយ​ចំនួន។​ លោកឧកញ៉ាបណ្ឌិត ប៉ិច បូឡែន មានប្រសាសន៍ថា ការ​ព្យាយាម​បង្កើត​បណ្តាញ​សាលារៀន​សហគមន៍២១នេះ​ឡើង គឺជា​បេសកកម្ម​សង្គម ច្រើនជាង​ជំនួញ។

បេសកកម្មសង្គម ច្រើន​ជាងជំនួញ ក៏​ព្រោះតែ​បណ្តាញ​សាលា​រៀន​សហគមន៍​២១ មានតម្លៃសិក្សា​ដ៏​សមរម្យ​មួយ​ ប៉ុន្តែ​កម្មវិធីសិក្សា​ដែលបាន​ដាក់បញ្ចូល និងបង្រៀន​ដល់សិស្សានុសិស្ស គឺមាន​លំនាំ​ដូចទៅ​នឹង​កម្មវិធី​សិក្សា​នៃបណ្តាញសាលារៀនវ៉េសឡាញន៍ ដែរ។ ទាំងនេះ​ក៏​ព្រោះតែក្រុមហ៊ុន វេសឡាញ អេឌ្យូខេសិន គ្រុប មានដៃគូខាងក្រៅប្រទេស​ច្រើន ហើយ​ក៏​ជា​ក្រុមហ៊ុន​ដែលនាំចូលនូវ​កម្មវិធីសិក្សា​ដែល​កំពុងប្រើប្រាស់​ដោយ​សាលារៀន​នៅលើពិភពលោក ដូចជា ចំណេះដឹងហិរញ្ញវត្ថុ ក៏​ដូចជា Leader in Me ជាដើម។

ជាទស្សនវិស័យ លោកឧកញ៉ាបណ្ឌិត ប៉ិច បូឡែន បាន​រំលេចថា ការ​អប់រំ​មិន​មែន​គ្រាន់តែមានតុ កៅអី ហើយ​ឱ្យ​សិស្ស​ចូលរៀន​ក្នុងថ្នាក់នោះទេ, លោកឧកញ៉ាបញ្ជាក់ថា ការអប់រំចាំបាច់ត្រូវ​តែមានភាពពេញលេញ ដូច្នេះហើយ​កម្មវិធីសិក្សា​របស់សាលាសហគមន៍​២១ ត្រូវបានត្រួតពិនិត្យយ៉ាងល្អិតល្អន់ ធ្វើ​យ៉ាង​ណា​ឱ្យ​ការអប់រំបុត្រធីតារបស់យើងនៅថ្ងៃនេះ ផ្សារភ្ជាប់​ជាមួយ​ទិសដៅ​សេដ្ឋកិច្ច​នៅ​ថ្ងៃអនាគត។ ក្រៅពីចំណេះដឹង សិស្សនឹងទទួលបាននូវការអប់រំដែលផ្តោតលើចំណុចស្នូលសំខាន់ៗចំនួន ៤ ដែលហៅថា 4Cs of Education រួមមាន ៖ គំនិតច្នៃប្រឌិត (Creativity) បណ្តុះគំនិតឱ្យសិស្សចេះគិត និងស្វែងរកជម្រើសថ្មីៗក្នុងការដោះស្រាយបញ្ហា, ការវិភាគស៊ីជម្រៅ (Critical Thinking) បង្រៀនសិស្សឱ្យចេះវិភាគឫសគល់នៃបញ្ហា ដើម្បីដោះស្រាយឱ្យបានត្រឹមត្រូវនិងប្រកបដោយប្រសិទ្ធភាព, កិច្ចសហការ (Collaboration) លើកទឹកចិត្តឱ្យសិស្សចេះធ្វើការជាក្រុម និងជួយគ្នាទៅវិញទៅមក ជាជាងការប្រកួតប្រជែងគ្នា និងការប្រាស្រ័យទាក់ទង (Communication) ផ្តល់ជំនាញក្នុងការនិយាយ និងបង្ហាញគំនិតទៅកាន់អ្នកដទៃឱ្យមានភាពច្បាស់លាស់ និងការគោរព។

លោកឧកញ៉ាបណ្ឌិត ប៉ិច បូឡែន បានសង្កត់ធ្ងន់ថា ប្រព័ន្ធអប់រំដែលបាន​ដាក់បញ្ចូល​នៅ​សាលា​រៀនសហគមន៍២១ ក៏​ដូចជា​បណ្តាញ​សាលា​រៀនវេសឡាញ​ទាំងអស់ គឺមាន​គោលដៅ​ឆ្ពោះទៅរក​ការ​អភិវឌ្ឍប្រាកដ​ប្រជាមួយ ពោលគឺបុត្រធីតារបស់លោកអ្ន​កនឹងអាច​ប្រកបមុខរបរ ឬក៏​ធ្វើការងារ​ដោយ​មានសមត្ថភាពនៅពេល​អនាគត ព្រោះ​អ្វីដែលសិស្សានុសិស្ស​រៀន​នៅទីនេះ ពីមួយឆ្នាំទៅមួយ​ឆ្នាំ គឺជា​ការ​សន្សំ​នូវ​ចំណេះ ជំនាញ អត្តចរិត ចំណងទំនាក់ទំនងផ្សេងៗ ហើយ​វានឹងហុចផល​នៅពេល​ដែលពួកគេធំឡើង។ តែយ៉ាងណាក៏ដោយ លោកឧកញ៉ា ប៉ិច បូឡែន ក៏​បានស្នើ​ដល់មាតាបិតា អ្នកអាណាព្យាបាល សូមយកចិត្ត​ទុកដាក់​ជួយ​អភិវឌ្ឍកូន ក្នុងនាមជាម្តាយឪពុក ដើម្បី​ចាប់ដៃជាមួយ​សាលារៀន ជាមួយ​លោកគ្រូអ្នកគ្រូ បំពេញ​ការអប់រំ​ឱ្យ​កាន់តែ​ពេញលេញ​ដល់កូនៗ។

ជាមួយ​គ្នានេះ លោកឧកញ៉ាបណ្ឌិត ប៉ិច បូឡែន ក៏​បានបង្ហាញអំពីគោលដៅ​របស់សាលា​រៀនសហគមន៍២១ ដែល​គ្រោងនឹងដាក់​បញ្ចូលនូវកម្មវិធីបណ្តុះបណ្តាលជំនាញបច្ចេកទេស និងវិជ្ជាជីវៈដល់សិស្សនៅកម្រិតមធ្យមសិក្សា ដើម្បី​ឱ្យ​សិស្សដែល​បញ្ចប់ថ្នាក់ទី១២ ពួកគេអាចមានជម្រើសច្រើនក្នុងជីវិតដូចជាអាចបន្តការសិក្សានៅឧត្តមសិក្សា ធ្វើការរកប្រាក់ចំណូល ឬជួយក្រុមគ្រួសារគ្រប់គ្រង អាជីវកម្មបាន ដោយប្រើប្រាស់ជំនាញបច្ចេកទេសវិជ្ជាជីវៈដែលពួកគាត់បានរៀននៅក្នុងថ្នាក់វិទ្យាល័យ។

សរុបមកវិញ លោកឧកញ៉ាបណ្ឌិត ប៉ិច បូឡែន ជឿជាក់ថា បណ្តាញសាលារៀនសហគមន៍២១ គឺជាការចូលរួមចំណែកដ៏មានសារៈសំខាន់ពីវិស័យឯកជន ក្នុងការលើកកម្ពស់គុណភាពអប់រំនៅកម្ពុជា ដែលមិនត្រឹមតែផ្តល់ចំណេះដឹង ប៉ុន្តែក៏បណ្តុះបណ្តាលសិស្សឱ្យមានជំនាញ និងចរិតលក្ខណៈល្អសម្រាប់ត្រៀមខ្លួនជាពលរដ្ឋសកលនាពេលអនាគត៕