ក្នុងវ័យកុមារភាព កុមារភាគច្រើនមើលទៅហាក់ដូចជាសប្បាយរីករាយ និងមិនសូវខ្វល់ខ្វាយពីអ្វីទាំងអស់។ ប៉ុន្តែនៅក្នុងពិភពតូចរបស់ពួកគេ កុមារក៏អាចជួបប្រទះនូវបញ្ហាជាច្រើនដែលលាក់ទុកក្នុងចិត្តផងដែរ។ ក្នុងនាមជាឪពុកម្តាយ ការតាមដានសុខទុក្ខ និងការសន្ទនាជាមួយកូនៗជាប្រចាំ គឺជាចំណុចសំខាន់បំផុតដែលមិនគួររំលង។

តើមានបញ្ហាអ្វីខ្លះដែលកុមារអាចជួបប្រទះ?

១. បញ្ហាសុខភាពផ្លូវកាយ និងផ្លូវចិត្ត ៖ កុមារ​អាច​មានអាការមិនស្រួលខ្លួន ជំងឺផ្សេងៗ កង្វះអាហារូបត្ថម្ភ និងគ្រោះថ្នាក់ ឬរបួសផ្សេងៗដែលកើតឡើងអំឡុងពេលលេង។ ជាមួយ​គ្នានេះ ពួកគេ​ក៏​អាច​មានបញ្ហាផ្លូវចិត្ត ដោយសារ​ការខ្វះក្តីស្រឡាញ់ ឬមានអារម្មណ៍ឯកោ សម្ពាធពីក្រុមគ្រួសារ និងមិត្តភក្តិ រួមទាំងការមិនទាន់ចេះគ្រប់គ្រងអារម្មណ៍របស់ខ្លួនឯងឱ្យបានល្អ។

២. បញ្ហាការសិក្សា និងការគំរាមកំហែង (Bullying) ៖ កុមារ​អាច​មានបញ្ហាការសិក្សា មិនយល់ច្បាស់អំពីមេរៀន ឬការសិក្សា ពិបាក សម្ពាធពីការប្រកួតប្រជែងក្នុងសាលា។ ក្នុងនោះ Bullying ឬការរំលោភបំពានគឺជាបញ្ហាធំមួយសម្រាប់កុមារ នៅក្នុងពេលបច្ចុប្បន្ននេះ។ វាអាចបង្កឱ្យកុមារមាន អារម្មណ៍ឯកា ខ្លាច ដែល​វា​នឹង​ប៉ះពាល់​ដល់​ការ​លូតលាស់ផ្លូវចិត្ត​យ៉ាងធ្ងន់ធ្ងរ។

៣. ការរំលោភបំពានតាមអ៊ីនធឺណិត (Cyberbullying) ៖ ជាមួយនឹងការរីកចម្រើននៃបច្ចេកវិទ្យា ការរំលោភបំពានតាមអ៊ីនធឺណិត ក៏​ត្រូវ​បានកត់សម្គាល់ផងដែរ ដូចជាតាមរយៈសារយោបល់អវិជ្ជមាន ឬការបង្ហោះរូបភាពមិនសមរម្យលើបណ្តាញសង្គម ការ​គំរាមកំហែង​តាម​រយៈសារផ្សេងៗ អាច​ធ្វើ​ឱ្យ​កុមារ​មានអារម្មណ៍​ខ្លាច។ បញ្ហានេះអាចកើតឡើងគ្រប់ទីកន្លែង និងគ្រប់ពេលវេលា ដែលធ្វើឱ្យកុមារពិបាកក្នុងការគ្រប់គ្រង និងដោះស្រាយ។

៤. សម្ពាធពីមិត្តរួមថ្នាក់ (Peer Pressure) ៖ មួយក្នុងចំណោមបញ្ហាជាទូទៅ ដែលកុមារជួបប្រទះ នោះគឺសម្ពាធពីមិត្តរួមថ្នាក់។ មិត្តរួមថ្នាក់អាចមានឥទ្ធិពលលើ សកម្មភាព និងសេចក្តីសម្រេចចិត្ត​របស់គេ។ កុមារខ្លះអាចធ្វើរឿងមិនល្អ ឬរឿងដែលខ្លួនមិនចង់ធ្វើ គ្រាន់តែដើម្បីឱ្យមិត្តភក្តិទទួលស្គាល់ និងចង់ចូលចំណោមមិត្តភក្តិ។

តើឪពុកម្តាយគួរជួយកូនយ៉ាងដូចម្តេច?

អ្នកមិនអាចគ្រប់គ្រងអ្វីគ្រប់យ៉ាងក្នុងជីវិតរបស់កូនបានទេ ប៉ុន្តែអ្នកអាចផ្តល់ការគាំទ្រ និងការណែនាំដ៏ល្អបំផុតបាន។ ដូច្នេះ ដើម្បីជួយកូនឱ្យឆ្លងផុតបញ្ហាទាំងនេះ លោកអ្នកអាចអនុវត្តតាមវិធីសាស្ត្រខាងក្រោម៖

កសាងទំនុកចិត្តលើខ្លួនឯង ៖ បញ្ហាមួយដ៏ធំក្នុងចំណោមបញ្ហាជាទូទៅបំផុតដែលកុមារជួបប្រទះនៅក្នុងពេលបច្ចុប្បន្ន គឺការខ្វះទំនុកចិត្តលើខ្លួនឯង។ ក្នុងនាមជាឪពុកម្តាយ អ្នកអាចជួយកូនរបស់អ្នកបង្កើតទំនុកចិត្តលើ ខ្លួនឯងដោយការគាំទ្រ និងលើកទឹកចិត្តពួកគេឱ្យបន្តការយកចិត្ត ទុកដាក់ និងបង្ហាញទេពកោសល្យរបស់ពួកគេ។

ធ្វើជាទីប្រឹក្សាដ៏កក់ក្តៅ ៖ អ្នកក៏អាចជួយបង្រៀនពួកគេ ពីរបៀបដោះស្រាយបញ្ហាជាមួយសង្គមខាងក្រៅ។ ត្រូវដឹងពីបញ្ហាអ្វីដែលកូនរបស់អ្នកជួបប្រទះ និងបង្រៀនពួកគេឱ្យ​ចេះដោះស្រាយ ហើយអ្នកជាទីប្រឹក្សាដើម្បីជួយពួកគេ។ អ្នកមិនអាចគ្រប់គ្រងអ្វីគ្រប់យ៉ាងនៅក្នុងជីវិត របស់ពួកគេបានទេ ប៉ុន្តែអ្នកអាចផ្តល់ការគាំទ្រ និងការណែនាំ៕