ភ្នំពេញ – ថ្វីត្បិតមិនមានតួលេខជាក់លាក់មកអះអាងថា កុមារីកម្ពុជាចូលចិត្តអានច្រើនជាងកុមារាចំនួនប៉ុន្មាន ឬប៉ុន្មានភាគរយ ប៉ុន្តែតាមការកត់សម្គាល់លើសកម្មភាពអំណានរបស់អង្គការរូមធូរីដកម្ពុជា បានបង្ហាញថា កុមារីមានចំណង់ចំណូលចិត្តអានច្រើនជាងកុមារា ហើយកុមារីតែងមានទម្លាប់អានទៀងទាត់ទៅលើសៀវភៅអំណានរបស់ពួកគេនៅក្នុងបណ្ណាល័យ ។

លោក ជា វ៉ាន់ថា នាយកប្រចាំប្រទេស នៃអង្គការរូមធូរីដកម្ពុជា មានប្រសាសន៍ថា បច្ចុប្បន្នកុមារកម្ពុជាចាប់ផ្តើមមាននិន្នាការអានសៀវភៅ ហើយអត្រាអ្នកចូលចិត្តអានសៀវភៅមានការកើនឡើង ។ ទន្ទឹមគ្នានេះ បើតាមការកត់សម្គាល់របស់អង្គការរូមធូរីដកម្ពុជា កុមារីមានចំណូលចិត្តអានសៀវភៅច្រើនជាងកុមារា ។ កុមារីតែងមានទម្លាប់អានដោយយកចិត្តទុកដាក់ និងផ្ចិតផ្ចង់លើអំណានរបស់ពួកគេ ។

 “បច្ចុប្បន្នកុមារីមានទំនោរអានសៀវភៅជាងកុមារា ជាក់ស្តែងទិវាជាតិអំណានលើកទី៨ និងពិព័រណ៌សៀវភៅ យើងសង្កេតឃើញមានកុមារីជាច្រើនចូលរួមសកម្មភាពអំណាន ដែលសកម្មភាពអំណាននេះជាការបណ្តុះទម្លាប់អានដ៏ល្អសម្រាប់ពួកគេ” – លោក ជា វ៉ាន់ថា

ទាក់ទងនឹងការកក់សម្គាល់លើវត្តមានកុមារីចូលចិត្តអាចសៀវភៅជាងកុមារានេះ ឯកឧត្តមបណ្ឌិត ចាន់ សុភា អគ្គលេខាធិការរងក្រុមប្រឹក្សាជាតិដើម្បីអភិវឌ្ឍយុវជន និងជាប្រធាននាយកដ្ឋានបឋមសិក្សា នៃក្រសួងអប់រំ យុវជន និងកីឡា មានប្រសាសន៍ថា ផ្អែកតាមការលទ្ធផលសិក្សារបស់សិស្ស និងកំណត់សម្គាល់ជាក់ស្តែង កុមារីចូលចិត្តអានសៀវភៅជាងកុមារា ។ លទ្ធផលសិក្សាកន្លងទៅរបស់នាយកដ្ឋានបឋមសិក្សា ក៏បានបង្ហាញដែរថា កុមារីខិតខំប្រឹងប្រែងសិក្សាជាងក្មេងប្រុស ។

  ឯកឧត្តមបណ្ឌិត ចាន់ សុភា ប្រធាននាយកដ្ឋានបឋមសិក្សា

“ជាក់ស្តែងក្មេងស្រីក្មេងប្រុសមិនមានគម្លាតពីគ្នាឡើយពេលចូលរៀននៅថ្នាក់បឋមសិក្សា ដូច្នេះដើម្បីជំរុញលទ្ធផលសិក្សាឱ្យបានស្មើគ្នា គឺទាមទារឱ្យម្តាយឪពុក ឬអាណាព្យាបាលត្រូវជំរុញការអានរបស់កុមារបន្ថែម ពិសេសពេលវេលាចន្លោះពីការសិក្សានៅសាលារៀន”

ជាមួយគ្នានេះ ឯកឧត្តមបណ្ឌិត ចាន់ សុភា បានបញ្ជាក់ថា ក្រសួងអប់រំ យុវជន និងកីឡា ចង់ឃើញចំនួនក្មេងស្រីនិងក្មេងប្រុសចូលចិត្តអានសៀវភៅដូចគ្នា ពីព្រោះអំណានផ្តល់ផលប្រយោជន៍យ៉ាងច្រើនដល់អនាគតកុមារ ។ លើសពីនេះ ក្រសួងអប់រំបន្តលើកកម្ពស់គុណភាពអំណាននេះឱ្យកាន់តែទូលំទូលាយនៅកម្រិតបឋមសិក្សា ដោយសារទម្លាប់អានជះឥទ្ធិពលដល់ការសិក្សា និងគុណភាពជីវិតកុមារ ។

សូមជម្រាបថា បើផ្អែកតាមការសិក្សារបស់អង្គការរូមធូរីដកម្ពុជា ដែលកំពុងលើកកម្ពស់វិស័យអំណានកុមារបានឱ្យដឹងថា អំណានកម្រិតដំបូង និងអំណានសម្រាប់កុមារ គឺមានឥទ្ធិពលអានពេញមួយជីវិតកុមារ ហើយម្តាយឪពុកជាតួអង្គសំខាន់ជំរុញនិងលើកទឹកចិត្តដល់កុមារឱ្យចូលចិត្តអានសៀវភៅ ។ ការអានជាទង្វើល្អមួយដែលម្តាយឪពុកមិនគួរមើលរំលង ៕