ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ភ្នំពេញ – ឪពុកម្តាយ និងកូនៗចូលចិត្តកីឡាដូចគ្នា គឺមានភាពងាយស្រួលក្នុងការលេងកីឡាជាមួយគ្នា។ ភាពស្និទ្ធស្នាលផ្នែកកីឡា គឺជាមេរៀនជីវិតមួយដែលកុមារអាចរៀនពីកីឡាបាន។ ទន្ទឹមគ្នានេះ ឪពុកម្ដាយអាចជួយកូនរបស់ខ្លួនឱ្យយល់ និងឱ្យតម្លៃចំពោះភាពជាកីឡា និងប្រាកដថាកូនមានបទពិសោធន៍លេងកីឡាប្រកបដោយសុវត្ថិភាព និងភាពរីករាយ។
ខាងក្រោមនេះ ជាចំណុចមួយចំនួនជួយបង្កើនស្មារតីកីឡាសម្រាប់កុមារដែលឪពុកម្ដាយអាចចែករំលែកជាមួយកូនៗបាន រួមមាន៖
១. អនុវត្តតាមច្បាប់នៃកីឡា ៖ ការអនុវត្តតាមច្បាប់នៃកីឡាហាក់ដូចជាងាយស្រួលជាងក្នុងការយកឈ្នះដោយល្បិចកល ប៉ុន្តែអ្នកលេងកីឡាគ្រប់គ្នាត្រូវធ្វើតាមច្បាប់។ ទន្ទឹមគ្នានេះ ពន្យល់កូនរបស់អ្នកថា ច្បាប់ត្រូវបានបង្កើតឡើង ដើម្បីឱ្យកីឡាអាចលេងក្នុងរបៀបរៀបចំមួយប្រសើរ។
២. ជៀសវាងការឈ្លោះប្រកែកគ្នា ៖ រក្សាការផ្តោតលើការប្រកួត ជាជាងការខឹងមិត្តរួមក្រុម គ្រូបង្វឹក ឬអាជ្ញាកណ្តាល ។ ជៀសវាងការប្រើភាសាអាក្រក់ និងពាក្យអវិជ្ជមានជានិច្ច ។ លើសពីនេះ អំឡុងពេលលេងកីឡាឪពុកម្ដាយក៏អាចណែនាំកូនឱ្យជៀសវាងការឈ្លោះប្រកែកគ្នា ហើយត្រូវចេះបង្កើនសាមគ្គីភាពជាមួយក្រុមផងដែរ។
៣. លេងដោយយុត្តិធម៌ ៖ អ្នកលេងកីឡាល្អចង់ឈ្នះព្រោះគេគោរពតាមច្បាប់ ហើយលេងឱ្យអស់ពីសមត្ថភាព។ កុំគាំទ្រការប្រឹងប្រែងណាមួយដើម្បីឈ្នះដោយការព្យាយាមធ្វើរំលងច្បាប់។ ទន្ទឹមគ្នានេះ ការបោកប្រាស់មិនអាចទទួលយកបានទេ។ ម៉្យាងវិញទៀត នៅក្នុងវិស័យកីឡា យុវជនជាចំណុចសំខាន់ដែលត្រូវលើកទឹកចិត្ត ជាពិសេសអ្នកដែលមានជំនាញតិចបំផុតឱ្យមានឱកាសចូលរួមលេងកីឡា។
៤. ទៅតាមទិសដៅ ៖ ត្រង់ចំណុចនេះ សង្កត់ធ្ងន់លើសារៈសំខាន់នៃការស្តាប់គ្រូបង្វឹក និងអាជ្ញាកណ្តាល និងធ្វើតាមការណែនាំរបស់ពួកគេអំឡុងពេលនៅលើទីលាន និងចូលរួមក្នុងសកម្មភាពក្រុម។ ទន្ទឹមគ្នានេះ កុមារនឹងបង្កើនភាពវ័យឆ្លាតបន្ថែម ដោយដឹងច្បាស់ពីទិសដៅរបស់ខ្លួនអំឡុងពេលលេងកីឡា។
៥. គោរពក្រុមផ្សេងទៀត ៖ មិនថាក្រុមរបស់អ្នកឈ្នះ ឬចាញ់នោះទេ វាជារឿងសំខាន់ដើម្បីបង្ហាញការគោរពចំពោះការខិតខំប្រឹងប្រែងរបស់ក្រុមផ្សេងទៀត។ ប្រសិនបើក្រុមផ្សេងទៀតឈ្នះ ត្រូវទទួលយកការបរាជ័យ ទទួលស្គាល់សមត្ថភាពរបស់ពួកគេ ហើយបន្តទៅមុខទៀត។ ប្រសិនបើក្រុមរបស់អ្នកឈ្នះ ចូរទប់ទល់នឹងអំណួត នោះហើយជាអ្វីដែលវាមានន័យថាជាអ្នកឈ្នះដ៏សប្បុរស។ ចំណុចនេះ ឪពុកម្ដាយគួរណែនាំប្រាប់កូនៗឱ្យបានដឹង។
៦. លើកទឹកចិត្តមិត្តរួមក្រុម ៖ កីឡាជាក្រុមដំណើរការល្អបំផុតនៅពេលដែលបុគ្គលម្នាក់ៗគាំទ្រក្រុម។ លើសពីនេះ សរសើរមិត្តរួមក្រុមចំពោះអ្វីដែលពួកគេធ្វើបានល្អ និងលើកទឹកចិត្តពួកគេពេលធ្វើខុស។ ជៀសវាងការរិះគន់ និងទង្វើមិនសមរម្យ។ ឪពុកម្តាយគួរតែផ្ដល់គំរូតាមអាកប្បកិរិយានេះសម្រាប់កូនដោយសរសើរពួកគេចំពោះរឿងជាក់លាក់ដែលពួកគេធ្វើបានល្អ ទោះបីជាពួកគេធ្វើខុស ឬប្រហែលជាមិនបានលេងដូចការរំពឹងទុកក៏ដោយ។
៧. បញ្ចប់ដោយការចាប់ដៃ ៖ អ្នកលេងកីឡាល្អដឹងពីវិធីបញ្ចប់ការប្រកួតដោយវិជ្ជមាន ទោះជាឈ្នះ ឬមិនឈ្នះ។ ការគំរាមកំហែង កំហឹង ការរិះគន់ និងការបញ្ចេញមតិអវិជ្ជមានផ្សេងទៀតគឺមិនអាចទទួលយកបានទេ។ ទន្ទឹមគ្នានេះ ឪពុកម្តាយគឺជាគំរូដ៏សំខាន់ ដូច្នេះសូមឱ្យកូនរបស់អ្នកឃើញអ្នកប្រកាន់ខ្ជាប់នូវគោលការណ៍ទាំងនេះ៕
