កម្មវិធី «មាគ៌ាឆ្ពោះទៅកាន់ពិភពលោក» ឬ «Window to the World» ដែលទើបតែបញ្ចប់ថ្មីៗនេះ ដឹកនាំដោយ ក្រុមហ៊ុន ម៉េងលី ជេ. គួច អេឌ្យូខេសិន (MJQE) គឺជាជោគជ័យដ៏ត្រចះត្រចង់មួយ និងឆ្លុះបញ្ចាំងពីបេសកកម្មរបស់ក្រុមហ៊ុនក្នុងការផ្តល់ការអប់រំជូនអនាគតអ្នកបន្តវេនរបស់កម្ពុជា។ នេះគឺជាដំណើរទស្សនកិច្ចសិក្សាអប់រំដែលប្រព្រឹត្តទៅចាប់ពីថ្ងៃទី១២ ដល់ថ្ងៃទី១៥ ខែមិថុនា ឆ្នាំ២០២៤។ កម្មវិធីនេះជាគំនិតផ្តួចផ្តើមនៃការដឹកនាំប្រកបដោយចក្ខុវិស័យ និងការណែនាំរបស់ អ្នកឧកញ៉ា វេជ្ជបណ្ឌិត គួច ម៉េងលី ដែលជាស្ថាបនិក ប្រធានក្រុមប្រឹក្សាភិបាល និងអគ្គនាយកប្រតិបត្តិ នៃក្រុមហ៊ុន ម៉េងលី ជេ. គួច អេឌ្យូខេសិន (MJQE)។

នៅឆ្នាំ២០២៤ នេះ សិស្សានុសិស្សចំនួន២០នាក់មកពីវិទ្យាល័យព្រៃទប់ ខេត្តតាកែវ បានចូលរួមក្នុងដំណើរទស្សនកិច្ចសិក្សានេះ ដែលមានដូចជា ដំណើរទស្សនកិច្ចវប្បធម៌ ទស្សនកិច្ចសិក្សានៅទីតាំងប្រវត្តិសាស្ត្រល្បីៗដើម្បីពង្រឹងការយល់ដឹងពីប្រទេសកម្ពុជា នៅសាកលវិទ្យាល័យ និងការជួបពិភាក្សាជាមួយ អ្នកឧកញ៉ា វេជ្ជបណ្ឌិត គួច ម៉េងលី ដើម្បីពង្រីកការយល់ដឹងរបស់ពួកគេ។

អ្នកឧកញ៉ា វេជ្ជបណ្ឌិត គួច ម៉េងលី បានមានប្រសាសន៍ថា៖ «គំនិតផ្តួចផ្តើមរបស់យើងក្នុងការបង្កើតកម្មវិធី «មាគ៌ាឆ្ពោះទៅកាន់ពិភពលោក» ឬ «Window to the World» នេះនឹងក្លាយជាបទពិសោធថ្មីដើម្បីពង្រីកការយល់ដឹងរបស់សិស្សានុសិស្ស និងលើកទឹកចិត្តឱ្យពួកគេបន្តការសិក្សាថ្នាក់ឧត្តមសិក្សា ដើម្បីពួកគេអាចក្លាយជាពលរដ្ឋដែលមានទំនួលខុសត្រូវ និងជាផ្នែកមួយនៃការរីកចម្រើនរបស់កម្ពុជា។»

ភាពជោគជ័យនៃកម្មវិធីនេះបានគូសបញ្ជាក់ពីការប្តេជ្ញាចិត្តរបស់ក្រុមហ៊ុន MJQE ក្នុងការទ្រទ្រង់ និងពង្រឹងកម្មវិធីនេះក្នុងការបន្តផ្ដល់បទពិសោធជូនយុវជនកម្ពុជាសម្រាប់ការពង្រឹងគុណភាពជីវិតរបស់ពួកគេ។ ការជំរុញ និងលើកទឹកចិត្តសិស្សានុសិស្សឱ្យស្រឡាញ់ និងអនុវត្តការសិក្សាពេញមួយជីវិតគឺគោលបំណងសំខាន់មួយរបស់កម្មវិធីនេះ ដើម្បីឱ្យពួកគេអាចចូលរួមចំណែកជាវិជ្ជមានដល់សហគមន៍របស់ពួកគេ។

គោលបំណងរបស់កម្មវិធី «Window to the World» គឺដើម្បីជំរុញឱ្យមានការស្រឡាញ់ការសិក្សា និងលើកទឹកចិត្តលើការសិក្សាពេញមួយជីវិតដល់សិស្សានុសិស្ស និងរៀបចំពួកគេឱ្យក្លាយជាពលរដ្ឋដែលមានចំណេះដឹង មានសមត្ថភាពពិតប្រាកដក្នុងការចូលរួមចំណែកជាវិជ្ជមានដល់សហគមន៍ សង្គមកម្ពុជា និងនៅលើឆាកអន្តរជាតិ។

ក្រុមហ៊ុន ម៉េងលី ជេ. គួច អេឌ្យូខេសិន ប្តេជ្ញាចិត្តក្នុងការផ្តល់ការអប់រំដល់ប្រជាជនកម្ពុជា ប្រកបដោយគុណភាព វិន័យ និងសេវាកម្ម តាមរយៈមជ្ឈមណ្ឌលភាសា អេ អាយ អាយ (Aii) សាលារៀន អន្តរទ្វីប អាមេរិកាំង (AIS) និងសូហ្គូ (SOGO)។ Aii និង AIS គឺជាគ្រឹះស្ថានអប់រំឈានមុខគេរបស់ប្រទេសកម្ពុជា ដោយផ្តល់ជូននូវកម្មវិធីភាសាដ៏សម្បូរបែបលើជំនាញភាសាអង់គ្លេស ចិន និងថៃ និងការអប់រំចំណេះទូទៅ៕