បណ្ដាញសង្គមដើរតួនាទីយ៉ាងសំខាន់ ក្នុងការពង្រឹងទំនាក់ទំនង និងជួយក្មេងជំទង់ឱ្យមានឱកាសរៀនជំនាញ និងចំណេះដឹងថ្មីៗ។ ទន្ទឹមនឹងផលវិជ្ជមាន ក្មេងជំទង់ក៏ងាយរងគ្រោះ ដោយសារបណ្ដាញសង្គមដូចគ្នា ដោយរបាយការណ៍ភាគច្រើនបង្ហាញថា ពួកគេពិបាកក្នុងគ្រប់គ្រងពេលវេលាចំណាយជាមួយអេក្រង់ ហើយហានិភ័យផ្សេងៗកើតឡើងដោយសារសកម្មភាពនេះ។ បើតាមការស្រាវជ្រាវជាច្រើន បានបង្ហាញថា មានបញ្ហាផ្លូវចិត្តចំនួន ៥ ដែលក្មេងជំទង់ងាយជួបប្រទះ ដោយសារការប្រើប្រាស់បណ្ដាញសង្គម និងនៅជាមួយអេក្រង់លើសកំណត់។

១. ជំងឺធ្លាក់ទឹកចិត្ត ៖ អ្នកស្រាវជ្រាវ ទើបតែបង្ហាញពីទំនាក់ទំនងរវាងជំងឺធ្លាក់ទឹកចិត្ត និងប្រព័ន្ធផ្សព្វផ្សាយសង្គម។ ខណៈពេលដែលពួកគេមិនទាន់រកឃើញពីមូលហេតុ និងផលប៉ះពាល់ច្បាស់លាស់ នៃទំនាក់ទំនងរវាងជំងឺធ្លាក់ទឹកចិត្ត និងប្រព័ន្ធផ្សព្វផ្សាយសង្គម, របាយការណ៍ស្រាវជ្រាវបានបង្ហាញថា ការប្រើប្រាស់ប្រពន្ធផ្សព្វផ្សាយសង្គម បានផ្សារភ្ជាប់ជាមួយនឹងការកើតឡើងនៃរោគសញ្ញាជំងឺធ្លាក់ទឹកចិត្ត ជាពិសេសគឺការថយចុះនៃសកម្មភាពចូលរួមក្នុងសង្គម និងការកើនឡើងនូវអារម្មណ៍ឯកា។

២. ការថប់បារម្ភ ៖ ក្មេងជំទង់ មានទំនោក្នុងការដាក់អារម្មណ៍ទាំងស្រុងទៅក្នុងគណនីបណ្ដាញសង្គមរបស់គេ។ ពួកគេមិនត្រឹមតែ មានប្រតិកម្មរហ័សជាមួយនឹងព័ត៌មានផ្សេងៗនៅលើបណ្ដាញសង្គមប៉ុណ្ណោះទេ ប៉ុន្តែពួកគេក៏មានអារម្មណ៍ថា មានសម្ពាធ ដោយសាររូបភាព និងអត្ថបទ ដែលមានភាពល្អឥតខ្ចោះលើបណ្ដាញសង្គមផងដែរ។ សម្ពាធនេះ កើតឡើងដោយសារការប្រៀបធៀបខ្លួនឯង ជាមួយមិត្តភក្តិលើបណ្ដាញសង្គមដោយមិនដឹងខ្លួន។ ការសិក្សាមួយចំនួនបានរកឃើញថា រង្វង់សង្គមរបស់ក្មេងជំទង់កាន់តែធំនៅលើបណ្ដាញសង្គម មានអារម្មណ៍ថប់បារម្ភ ដោយសារការដាក់អារម្មណ៍របស់ខ្លួនទៅក្នុងបណ្ដាញសង្គមខ្លាំងពេក។

លើសពីនេះ ក្មេងស្រីជំទង់ ងាយនឹងព្រួយបារម្ភអំពីការគិតរបស់អ្នកដទៃមកលើពួកគេ និងងាយរងគ្រោះដោយសារការគម្រាមកំហែងតាមអ៊ីនធឺណិត និងអាកប្បកិរិយាខ្វះក្រមសីលធម៌ជាច្រើនទៀត ដែលធ្វើឱ្យបណ្ដាញសង្គមកាន់តែស្មុគស្មាញ ហើយក្លាយជាប្រភព នៃភាពថប់បារម្ភរបស់ក្មេងជំទង់ជាច្រើន។

៣. ការគេងមិនលក់ ៖ ការញៀននឹងបណ្ដាញសង្គមខ្លាំងពេក បណ្ដាលឱ្យក្មេងជំទង់លែងមានពេលគ្រប់គ្រាន់សម្រាប់គេង ហើយការទទួលបានដំណេកមិនគ្រប់គ្រាន់ អាចនាំឱ្យពួកគេមានអារម្មណ៍មិនល្អ លទ្ធផលនៃការសិក្សាធ្លាក់ចុះ កង្វះសកម្មភាពរាងកាយ ការញ៉ាំច្រើន ជំងឺធា្លក់ទឹកចិត្ត ការថប់បារម្ភ និងជំងឺខ្សោយស្មារតី (ADHD) ជាដើម។ កាស្រាវជ្រាវបានបង្ហាញពីទំនាក់ទំនងដ៏រឹងមាំរវាងការចំណាយពេលច្រើនម៉ោងជាមួយអេក្រង់ និងការវិវត្តនៃរោគសញ្ញា ជំងឺខ្សោយស្មារតី (ADHD) ដែលក្នុងនោះមានអាការៈដូចជា ការពិបាកផ្ដោតអារម្មណ៍ ការគ្រប់គ្រងអារម្មណ៍ ការយកចិត្តទុកដាក់មិនបានល្អ និងការទទួលបានដំណេកមិនគ្រប់គ្រាន់។

៤. ការច្រណែន ៖ ការសិក្សាបង្ហាញថាអារម្មណ៍ច្រណែន និងចង់បាន អាចបំផ្លាញខួរក្បាលរបស់ក្មេងជំទង់។ សម្រាប់ក្មេងជំទង់ ឬយុវវ័យ គឺងាយនឹងធ្លាក់ខ្លួនទៅក្នុងការប្រៀបធៀប និងច្រណែន ហើយយល់ថា ជីវិតអ្នកដទៃគឺល្អឥតខ្ចោះ, គិតថា គេសប្បាយ និងមានជីវិតល្អប្រសើរជាងខ្លួន ប៉ុន្តែជាក់ស្ដែង មនុស្សគ្រប់គ្នា សុទ្ធតែមានទុក្ខលំបាក និងបញ្ហារៀងៗខ្លួន ហើយគ្មានជីវិតនរណាម្នាក់ល្អឥតខ្ចោះនោះទេ។

៥. បញ្ហាទំនាក់ទំនង ៖​ ទោះជាប្រព័ន្ធផ្សព្វផ្សាយសង្គម បានក្លាយជាមធ្យោបាយដ៏ល្អមួយ ក្នុងការទំនាក់ទំនង ជាមួយមិត្តភក្ដិ គ្រួសារ និងមនុស្សជាទីស្រឡាញ់ ប៉ុន្តែការប្រើប្រាស់បច្ចេកវិទ្យា ក៏មិនដូចគ្នាទៅនឹង ការជួបគ្នាទល់មុខដែរ។ ជាក់ស្ដែង ក្មេងជំទង់ មិនអាចស្គាល់មុខ ដឹងច្បាស់ពីទឹកមុខ និងយល់ការលើកដាក់សំឡេងរបស់ដៃគូសន្ទនាច្បាស់នៅលើអ៊ីនធឺណិតនោះទេ។ ជាលទ្ធផល វាងាយបង្កជាការយល់ច្រឡំ ឬបញ្ហាណាមួយដោយអចេតនា។ ក្រៅពីនេះ ការបង្កើតទំនាក់ទំនង ជាលក្ខណៈមិត្តភាព ឬស្នេហា តាមបណ្ដាញអ៊ីនធឺណិត គឺជាប្រភេទទំនាក់ទំនង ដែលមានភាពផុយស្រួល និងគ្រោះថ្នាក់សម្រាប់ផ្លូវចិត្ត៕