ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ក្រសួងការងារ និងបណ្តុះបណ្តាលវិជ្ជាជីវៈ នឹងរៀបចំការប្រកួតប្រជែងស្នាដៃរបស់សិស្ស និស្សិត ដែលមានគំនិតច្នៃប្រឌិត នវានុវត្តន៍ ពាក់ព័ន្ធនឹងវិស័យអប់រំបណ្តុះបណ្តាលបច្ចេកទេស និងវិជ្ជាជីវៈ (TVET) នៅក្នុងឱកាសទិវាជាតិអប់រំបណ្តុះបណ្តាលបច្ចេកទេស និងវិជ្ជាជីវៈ លើកទី៧ ឆ្នាំ២០២៤ ដែលគ្រោងនឹងប្រព្រឹត្តទៅនៅពាក់កណ្តាលខែមិថុនា ខាងមុខ។
ឯកឧត្តម កត្តា អ៊ន អ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈ មានប្រសាសន៍ថា ការរៀបចំឱ្យមានការប្រកួតប្រជែងស្នាដៃសិស្ស និស្សិត ក្នុងវិស័យអប់រំបណ្តុះបណ្តាលបច្ចេកទេស និងវិជ្ជាជីវៈ នេះ គឺក្រសួងមានគោលបំណងសំខាន់ ធ្វើការផ្សព្វផ្សាយពីការអប់រំបណ្តុះបណ្តាលបច្ចេកទេស និងវិជ្ជាជីវៈ ក៏ដូចជាបង្ហាញពីលទ្ធផល និងស្នាដៃ របស់សិស្សនិស្សិតរៀន TVET អាចធ្វើបាន។ ដោយឡែកសម្រាប់ស្នាដៃដែលសិស្សនិស្សិត អាចដាក់ចូលរួមក្នុងការប្រកួតនេះបាន គឺមានដូចជាឧបករណ៍សម្ភារៈផលិតដោយសិស្ស និស្សិត និងឧបករណ៍ទាក់ទងនឹង TVET ដែលទាក់ទាញសិស្ស និងមានទំនុកចិត្ត។
បើយោងតាមសេចក្តីជូនដំណឹងរបស់ក្រសួងការងារ និងបណ្តុះបណ្តាលវិជ្ជាជីវៈ ស្នាដៃដែលអាចដាក់ប្រកួតប្រជែង គឺជាស្នាដៃដែលមានគំនិតច្នៃប្រឌិត នវានុវត្តន៍ ពាក់ព័ន្ធនឹងវិស័យអប់រំបណ្តុះបណ្តាលបច្ចេកទេស និងវិជ្ជាជីវៈ វិស័យឯកជន វិស័យពាក់ព័ន្ធនានា និងអាចប្រើប្រាស់ដើម្បីជាប្រយោជន៍ដល់ការសិក្សាស្រាវជ្រាវ បម្រើដល់ការងារសង្គម វិស័យកសិកម្ម ពាណិជ្ជកម្ម សំណង់ និងឧស្សាហកម្ម ។ ក្នុងនោះ សិស្ស និស្សិត ដែលមានបំណងដាក់ប្រកួតស្នាដៃ អាចដាក់ពាក្យស្នើសុំចូលរួម ចាប់ពីថ្ងៃនេះ រហូតដល់ថ្ងៃទី៥ ខែមិថុនា ឆ្នាំ២០២៤ តាមលក្ខខណ្ឌកំណត់ដូចជា ៖ ១. ត្រូវមានស្នាដៃ ឧបករណ៍ សម្ភារ ជាបច្ចេកវិទ្យាថ្មីៗ និងមានភាពទាក់ទាញ ដែលបង្កើតបានដោយខ្លួនឯង ឬជាក្រុម, ២. ត្រូវឆ្លងកាត់ការត្រួតពិនិត្យ និងវាយតម្លៃពីក្រុមការងារមុននឹងទទួលបានការអនុញ្ញាតឱ្យចូលរួមដាក់តាំងបង្ហាញ និងប្រកួត, និង ៣. មិនត្រូវជាប់កម្មសិទ្ធិបញ្ញា ឬចម្លងពីស្នាដៃដទៃឡើយ។
ចំពោះបេក្ខជនដែលទទួលបានជ័យលាភី បើតាមប្រសាសន៍របស់អ្នកនាំពាក្យក្រសួងការងារ និងបណ្តុះបណ្តាល វិជ្ជាជីវៈ ពួកគេនឹងទទួលបានរង្វាន់លើកទឹកចិត្តផ្សេងៗ ដូចជា រង្វាន់ បណ្ណសរសើរបៃតងគ្រប់រដូវ ក៏ដូចជា បណ្ណសរសើរពីគុណភាពអប់រំ។
សូមបញ្ជាក់ថា ទិវាជាតិអប់រំបណ្តុះបណ្តាលបច្ចេកទេស និងវិជ្ជាជីវៈ លើកទី៧ ឆ្នាំ២០២៤ នឹងប្រព្រឹត្តទៅរយៈពេល២ថ្ងៃ គឺនៅថ្ងៃទី១៥ និងថ្ងៃទី១៦ ខែមិថុនា ឆ្នាំ២០២៤ នៅមជ្ឈមណ្ឌលសន្និបាត និងពិព័រណ៌កោះពេជ្រ រាជធានីភ្នំពេញ ក្រោមប្រធានបទ ការអប់រំបណ្តុះបណ្តាលបច្ចេកទេស និងវិជ្ជាជីវៈ «រៀនឱ្យចប់ ឱ្យចេះ ឱ្យមានការងារ»៕
