ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ប្រសិនបើអ្នកមានទំនោរពឹងផ្អែករាល់ព័ត៌មានទាំងអស់នៅលើ Google ឬអ៊ីនធឺណិត អ្នកនឹងប្រឈមនឹងបញ្ហាការចងចាំចុះខ្សោយ ព្រោះអ្នកអាងថា គ្រប់ទិន្នន័យគឺងាយស្រួលរក ហើយមិនមានទម្លាប់ប្រើខួរក្បាល ដើម្បីចងចាំ។ ទម្លាប់នេះ អាចធ្វើឱ្យអ្នកមានបញ្ហា ភេ្លចភ្លាំងឌីជីថល ឬ digital amnesia ។ នេះគឺជាការលើកឡើងរបស់លោក Cythia Borja អ្នកដឹកនាំនៅ The decision lab ដែលជាក្រុមអ្នកស្រាវជ្រាវ ពីរបៀបដែលមនុស្សធ្វើការសម្រេចចិត្ត។
អ្នកជំនាញរូបនេះ បានចែករំលែកនូវជំហានសាមញ្ញចំនួន ៣ ដើម្បីកាត់បន្ថយការពឹងផ្អែកលើ Google ហើយងាកមកពង្រឹងការចងចាំរបស់អ្នកឡើងវិញ។
១. ព្យាយាមរំលឹកព័ត៌មាន មុនពេលប្រើទូរស័ព្ទស្រាវជ្រាវ ៖ ព្រោះតែអ្នកមិនអាចនឹងឃើញអ្វីភ្លាមៗ មិនមែនមានន័យថា អ្នកមិនអាចរំលឹកព័ត៌មាននោះឡើងវិញនោះទេ។ មុនពេលស្រាវជ្រាវរកព័ត៌មាន ឬទិន្នន័យ ដែលអ្នកធ្លាប់ចងចាំពីមុន នៅលើ Google, អ្នកជំនាញរូបនេះ ណែនាំឱ្យចំណាយពេល ពីរ ទៅបីនាទី ដើម្បីរកនឹកចម្លើយជាមុនសិន។ អ្នកស្រីបន្ថែមថា បើទោះជាការអនុវត្តនេះ មិនដំណើរការនៅពេលដំបូងៗក៏ដោយ ប៉ុន្តែការអនុវត្តជាញឹកញាប់ នឹងធ្វើឱ្យការចងចាំរបស់អ្នកប្រសើរឡើងជាលំដាប់។
២. សរសេរអ្វីដែលអ្នកចង់ចងចាំ ៖ ប្រសិនបើទិន្នន័យ ឬព័ត៌មាននោះជាព័ត៌មានសំខាន់ ហើយអ្នកចង់រក្សាទុកវានៅក្នុងខួរក្បាលឱ្យបានយូរ សូមសរសេរវាទៅក្នុងសៀវភៅ ឬក្រដាស។ ការសរសេរដោយដៃ អាចជួយឱ្យខួរក្បាលរបស់អ្នករក្សាទុកព័ត៌មានបានប្រសើរជាងមុន។ លើសពីនេះ អ្នកក៏មានភាពសកម្មក្នុងការពង្រឹងសមត្ថភាពខួរក្បាលរបស់អ្នកដូចគ្នាដែរ។ មានមនុស្សជាច្រើន បាននិងកំពុងអនុវត្តទម្លាប់នេះ ដើម្បីពង្រឹងការចងចាំរបស់ពួកគេ ក្នុងនោះក៏មានលោក Bill Gate ម្នាក់ដែរ។ មហាសេដ្ឋីរូបនេះ ធ្លាប់លើកឡើងថា គាត់សរសេរ ឬកត់ចំណាំព័ត៌មានដោយដៃ ពេលអានសៀវភៅ ព្រោះទម្លាប់នេះ ជួយឱ្យគាត់ចងចាំព័ត៌មានបានច្រើន។
៣. កែប្រែទម្លាប់គិត ៖ រូបមន្តនេះ ចង់បង្ហាញថា ប្រសិនបើអ្នកបានឃើញព័ត៌មាន ទិន្នន័យ ឬមេរៀនថ្មី ដែលអ្នកចូលចិត្ត ហើយចង់រក្សាការចងចាំអំពីទិន្នន័យនេះបានយូរ ចូរធ្វើពុតថា អ្នកនឹងមិនអាចរកទិន្នន័យនេះ ឃើញទេនៅពេលក្រោយ។ ការធ្វើពុតបែបនេះ អាចជួយឱ្យអ្នកចងចាំរឿងរ៉ាវទាំងនោះបានល្អជាងមុន។
អ្នកស្រី Borja មានប្រសាសន៍ថា «មែនទែនទៅ វាមានសារៈសំខាន់ណាស់ ក្នុងការប្រើប្រាស់បច្ចេកវិទ្យា ជាឧបករណ៍ជំនួយការរស់នៅរបស់យើង ប៉ុន្តែវារឹតតែសំខាន់ថែមទៀត ដែលយើងត្រូវមានវិធីក្នុងការជំរុញឱ្យខួរក្បាល និងគំនិតរបស់យើង មានភាពសកម្ម និងចងចាំបានល្អ។»
អ្នកជំនាញរូបនេះ បន្ថែមថា ការអនុវត្តទម្លាប់នេះ នឹងជំរុញឱ្យខួរក្បាលរបស់អ្នក ពង្រីកទីតាំងរក្សាទុកព័ត៌មានឱ្យកាន់តែធំជាងមុន៕
