ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ភ្នំពេញ – ក្នុងពិធីសំណេះសំណាលជាមួយកម្មករ និយោជិត នៅតំបន់សេដ្ឋកិច្ចពិសេសរ៉ូយ៉ាល់គ្រុប នាព្រឹកថ្ងៃទី២៦ ខែឧសភា ឆ្នាំ២០២៣ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា បានធ្វើការអំពាវនាវទៅដល់រោងចក្រសហគ្រាសទាំងអស់ ត្រូវក្លាយជាសហគមន៍សុខសាន្តមួយ ដែលនិយោជក កម្មករ មានការសាមគ្គី យោគយល់អធ្រាស្រ័យគ្នា ហើយយកច្បាប់បទដ្ឋានទាំងអស់ធ្វើជាគោល។
សម្តេចតេជោនាយករដ្ឋមន្រ្តី ក៏បានអំពាវនាវចំពោះម្ចាស់រោងចក្រយោគយល់ចំពោះកម្មករ គិតគូរអំពីសុខទុក្ខរបស់កម្មករ ដោយថា នៅពេលដែលកម្មករមានសុខភាពល្អ នោះកម្មករក៏ធ្វើការងារមានទិន្នផលខ្ពស់ជាងដែរ។
ក្រៅពីនេះ គ្រប់រោងចក្រទាំងអស់ ក៏ត្រូវយកចិត្តទុកដាក់ទៅលើការបណ្តុះបណ្តាលបន្ថែមសម្រាប់កម្មករ កម្មការិនី ផងដែរ។
សម្តេចតេជោ ហ៊ុន សែន នាយករដ្ឋមន្រ្តី
“នៅខែកក្កដា រោចក្រតម្លើងរថយន្តតូយ៉ូតានឹងរួចរាល់ ដែលអាចនឹងចាប់ផ្តើមផលិតរថយន្តនៅតំបន់សេដ្ឋកិច្ចពិសេសនេះ… ស្នាដៃកូនខ្មែរយើងមិនខុសពីបរទេសទេ អញ្ចឹងយើងត្រូវទទួលការបណ្តុះបណ្តាល…”
ដោយឡែកប្រសិនបើមានករណីវិវាទកើតឡើងរវាងនិយោជក និងកម្មករវិញ សម្តេចតេជោស្នើឱ្យមានការដោះស្រាយឱ្យបានឆាប់បំផុត ដោយមានការចូលរួមពីសហជីព ម្ចាស់រោងចក្រ តំណាងកម្មករ ក្រសួងការងារ និងអាជ្ញាធរមូលដ្ឋាន ដោយមិនត្រូវចិញ្ចឹមទំនាស់នោះឡើយ។ សម្តេចបញ្ជាក់ថា មានតែគោលការណ៍ឈ្នះៗប៉ុណ្ណោះ ដែលអាចដោះស្រាយបាន។
បើយោងតាមរបាយការណ៍របស់ក្រសួងការងារ និងបណ្តុះបណ្តាលវិជ្ជាជីវៈ គិតក្នុងឆ្នាំ២០២៣នេះ កម្ពុជាមានរោងចក្រសហគ្រាសទាំងអស់ចំនួន ១៧០០០រោងចក្រ ដោយមានកម្មកររហូតដល់ ១លាន៥សែននាក់ ដែលបានបង្ហាញពីការកើនឡើង នៃវិស័យឧស្សាហកម្មនៅក្នុងប្រទេសកម្ពុជា៕
