ចាប់តាំងពីព្រឹកព្រលឹមថ្ងៃសុក្រនេះ (២៥ កក្កដា) យុវជន ក៏​ដូចជា​ប្រជាពលរដ្ឋ​គ្រប់ស្រទាប់វណ្ណៈ បានធ្វើដំណើរ​មក​កាន់មជ្ឈមណ្ឌលពិព័រណ៌ និងសន្និបាតកោះពេជ្រ ក្នុងចំនួនរាប់ពាន់នាក់ ដើម្បីចូលរួមបរិច្ចាគឈាម​ដោយ​ស្ម័គ្រចិត្ត ក្នុងបុព្វហេតុមនុស្សធម៌ និងទឹកចិត្តស្នេហាជាតិមាតុភូមិ រួមទាំងការគាំទ្រដល់យុទ្ធជនកម្ពុជាដែលកំពុងការពារបូរណភាពទឹកដី។

ឯកឧត្តមឧបនាយករដ្ឋមន្ត្រី​ ហ៊ុន​ ម៉ានី​ តំណាងដ៏ខ្ពង់ខ្ពស់លោកជំទាវបណ្ឌិត ពេជ ចន្ទមុន្នី ហ៊ុនម៉ាណែត អនុប្រធានក្រុមប្រឹក្សាភិបាល សមាគមគ្រូពេទ្យស្ម័គ្រចិត្តយុវជនសម្ដេចតេជោ ( TYDA ) មានប្រសាសន៍ថា ការបរិច្ចាគឈាមមនុស្សធម៌នេះ គឺក្នុងគោលបំណងសំខាន់ចំនួន២​ គឺ ៖​ ទី១.បម្រេីដល់សេចក្តីត្រូវការជាប្រចាំក្នុងការសង្គ្រោះជីវិត​ដែលទទួលគ្រោះថ្នាក់​ ឬអ្នកជំងឺដែលកំពុងសម្រាកព្យាបាល​ ហេីយមានតម្រូវការឈាមជាបន្ទាន់ និង ទី២​ ត្រៀមបម្រុងសម្រាប់វីរកងទ័ពជួរមុខ​ ឬប្រជាពលរដ្ឋ​ ក្នុងករណីដែលទទួលរងរបួស​ ឬគ្រោះថ្នាក់ដោយសារសង្គ្រាមឈ្លានពានទឹកដី​នៅទិសខេត្តឧត្តរមានជ័យ​ និងខេត្តព្រះវិហារ។

ឯកឧត្តមបន្តថា ឈរលេីគោលបំណងសំខាន់​ ២ខាងលេី​ ពិធីបរិច្ចាគឈាមមនុស្សធម៌ពេលនេះ​ គឺធ្វេីឡេីងដេីម្បីត្រៀមបង្ការផង​ និងយោងលេីសេចក្តីត្រូវការផងសម្រាប់តម្រូវការឈាមជាទូទៅ​ និងចំពោះសភាពការណ៍វិវត្តជាក់ស្តែង​ ដែលអាចនឹងមានតម្រូវការសង្គ្រោះជីវិត​ ចំពោះបងប្អូនវីរកងទ័ពជួរមុខ និងបងប្អូនប្រជាពលរដ្ឋនៃតំបន់ប្រឈមនឹងសង្គ្រាមឈ្លានពាន​ ហេីយអាចនឹងបង្កគ្រោះថ្នាក់ផ្សេងៗ​ ទាមទារឱ្យមានតម្រូវការឈាមជាចាំបាច់ក្នុងការសង្គ្រោះ​ ឬអាចនឹងសម្រាប់បំពេញតាមសេចក្តីត្រូវការឈាមជាបន្ទាន់ណាមួយរបស់គ្រូពេទ្យ​ ព្រោះ​ “ឈាមជាជីវិត”។

លោក ស៊ូលី ផេង តារាចម្រៀងកំពុងពេញនិយមរបស់យុវជន ក៏​មានវត្តមានក្នុងពិធីបរិច្ចាគឈាមនៅព្រឹកមិញដែរ លោកនិយាយថា ការមកបរិច្ចាគឈាមរបស់លោកនេះ គឺក្នុងន័យលើកទឹកចិត្តទៅដល់បងៗវីរៈកងទ័ពនៅជួរមុខការពារទឹកដី។ ជាមួយគ្នា លោកក៏​បានសម្តែង​អារម្មណ៍រំភើបនៅពេល​ដែលបានឃើញបងប្អូន​ប្រជាពលរដ្ឋជាច្រើន បាន​មក​ចូលរួម​បរិច្ចាគឈាម​នៅថ្ងៃនេះដែរ ដោយវា​បានបង្ហាញពីកម្លាំង​សាមគ្គី ក្នុងការផ្តល់កម្លាំងចិត្ត ទៅ​ដល់កង​ទ័ព​ដែល​កំពុង​ការពារទឹកដីនៅ​ជួរមុខ។

លោក ព្រីន ដែលជាតារាចម្រៀង និងសម្តែង លើកឡើងថា បច្ចុប្បន្ន​បងប្អូនវីរៈកងទ័ព​កំពុងប្រឈម​មុខ​ជាមួយគ្រោះថ្នាក់ ក្នុងនាមសមរភូមិក្រោយ អ្វីដែលលោកអាចជួយបាន គឺការចូលរួមក្នុងការបរិច្ចាគឈាម​ត្រៀម​សម្រាប់ជួយ​ដល់បងប្អូនវីរៈកងទ័ព ក៏​ដូចជា​ប្រជាជន​ដែល​ត្រូវ​ការ​ឈាមជាចាំបាច់។ ជាមួយ​គ្នា​លោក​ក៏​បានអំពាវនាវទៅ​ដល់សិល្បៈករផ្សេងៗ​ទៀត ក៏​ដូចជាយុវជន សូម​មកចូលរួមបរិច្ចាគឈាម ក៏​ដូចជា​បន្ត​ធ្វើការផ្សព្វផ្សាយទៅ​ដល់បងប្អូនប្រជាពលរដ្ឋ​ដទៃ​ទៀតបានដឹង។

សូមជំរាបជូនថា ការបរិច្ចាគឈាម​ក្នុងបុព្វហេតុមនុស្សធម៌ និង​ទឹកចិត្តស្នេហាជាតិមាតុភូមិ រួមទាំងគាំទ្រ​ដល់​យុទ្ធជន​កម្ពុជា​ដែល​កំពុងការពារបូរណភាពទឹកដី នឹងប្រព្រឹត្តធ្វើឡើងចាប់ពីថ្ងៃទី២៥ ខែកក្កដា នេះទៅ នៅមជ្ឈមណ្ឌលកោះពេជ្រ អគារ J K L ចាប់ពីវេលាម៉ោង៩ព្រឹក រហូតដល់ម៉ោង៥ល្ងាច៕