ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ការស្ដាប់ចម្រៀង ឬតន្ត្រី ជះឥទ្ធិពលវិជ្ជមាន ទៅកាន់សុខភាពផ្លូវចិត្ត ការគិត និងភាពធូរស្រាលនៃសាច់ដុំរាងកាយ កាត់បន្ថយស្រ្តេស ភាពតានតឹង គ្រប់គ្រងភាពឈឺចាប់ បង្កើនការចងចាំ ការយល់ពីភាសាចម្រុះគ្នា និងគុណភាពនៃការទទួលទានដំណេក។ តាមរយៈគេហទំព័រ Healthline បានបង្ហាញអត្ថប្រយោជន៍៣ចំណុចសំខាន់ៗតាមរយៈការស្ដាប់តន្ត្រី។
១. ឥទ្ធិពលតន្ត្រីទៅកាន់ស្មារតី ៖ តន្រ្តីមានការផ្សារភ្ជាប់ទៅកាន់មនុស្សម្នាក់ៗ ហើយចម្រៀង ឬតន្រ្តីទៀតសោត បានជំរុញឱ្យមនុស្សអាចបន្សាំនឹងការសិក្សារៀនសូត្របានប្រសើរជាងមុន និងជំរុញឱ្យការគិតមានភាពសកម្ម បើប្រៀបធៀបទៅនឹងអ្នកដែលមិនបានស្ដាប់តន្ត្រី ហើយតន្រ្តី ជំរុញឱ្យមនុស្សកាន់តែចង់រៀនសូត្រជាងពេលមុនៗ។ ទន្ទឹមគ្នានោះ តន្ត្រីក៏មានតួនាទី អភិវឌ្ឍន៍ការចងចាំរបស់មនុស្ស រួមទាំងកាត់បន្ថយពេលមានសម្ពាធផ្លូវចិត្ត ព្រោះនៅក្នុងតន្ត្រីបានធ្វើឱ្យមនុស្សបណ្ដុះបាននូវអ័រម៉ូនសុភមង្គលបន្ថែម។
២. ភាពអស្ចារ្យរបស់តន្រ្តីទៅកាន់អារម្មណ៍ ៖ តាមរយៈកិច្ចសម្ភាសន៍ និងបទពិសោធន៍ របស់អ្នកដែលស្ដាប់តន្ត្រីផ្ទាល់ ពួកគេបានឱ្យដឹងថា ការស្តាប់តន្រ្តីបានរួមចំណែកជួយឱ្យអារម្មណ៍បានធូរស្រាល និងប្រៀបដូចជាការទទួលបានការលួងលោមមួយ។ ក្រៅពីនោះ តន្រ្តីក៏បានកែប្រែស្ថានការណ៍អារម្មណ៍ដែលមិនល្អ ឱ្យទៅជាភាពស្រស់ស្រាយភ្លាមៗក៏មាន។ តាមរយៈការសិក្សា ក៏បានឱ្យដឹងដែរថា តន្រ្តីបានរំងាប់អារម្មណ៍ និងដោះស្រាយអាការធុញថប់ ដែលប្រៀបបានជាការព្យាបាលស្ថានភាពធ្លាក់ទឹកចិត្តបានមួយចំណែក។
៣. ផលល្អនៃតន្ត្រីចំពោះរាងកាយ ៖ តន្ត្រីមិនត្រឹមតែផ្ដល់ផលវិជ្ជមានទៅកាន់ស្មារតី និងសុខភាពផ្លូវចិត្តប៉ុណ្ណោះទេ ប៉ុន្តែតន្ត្រីក៏មានឥទ្ធិពលវិជ្ជមានទៅកាន់សុខភាពរាងកាយផងដែរ ដោយហេតុថា តន្ត្រីជំរុញឱ្យរាងកាយមនុស្សកាន់តែចង់ធ្វើចលនា ដូចជាដើរ និងរាំជាដើម ដែលសកម្មភាពទាំងនេះសុទ្ធសឹងតែជាចំណែកជួយទៅដល់ចង្វាក់បេះដូង និងសម្ពាធឈាមដើរខុសប្រក្រតី។ តន្រ្តី បានជំរុញឱ្យកម្លាំងនៃការធ្វើលំហាត់ប្រាណ កាន់តែមានការកើនឡើង មានអារម្មណ៍ល្អពេលកំពុងហាត់ និងការហាត់ប្រាណប្រកបដោយប្រសិទ្ធភាពទៀតផង។ ជារួម តន្ត្រីមានឥទ្ធិពលចំពោះរាងកាយមនុស្ស អាចបង្កើនការចងចាំ ជួយបង្កើនភាពអត់ធ្មត់ ទាញស្មារតីឱ្យស្រស់បស់ កាត់បន្ថយភាពតានតឹង និងអាការបាក់ទឹកចិត្ត បង្កើនថាមពល បន្លប់ភាពឈឺចាប់ និងការពន្លឿនប្រសិទ្ធភាព នៃការធ្វើលំហាត់ប្រាណ។ ការធ្វើលំហាត់ប្រាណដោយមានតន្ត្រីអមជាមួយ ផ្ដល់គុណសម្បត្តិទៅកាន់រាងកាយ ចិត្ត និងសុខភាពទូទៅ៕
