ជំនាញឌីជីថល គឺជំនាញមួយដែលកំពុងមានសក្តានុពលខ្ពស់ទាំងនៅកន្លែងធ្វើការ ។ បើតាមអ្នកស្រាវជ្រាវ នៃ Burning Glass Institute សហការជាមួយ Business-Higher Education Forum (BHEF) វិភាគលើការប្រកាសជ្រើសរើសបុគ្គលិកថ្មីៗនៅសហរដ្ឋអាមេរិក គេបានកំណត់នូវជំនាញចំនួន៤ដែលកំពុងមានតម្រូវការខ្ពស់សម្រាប់បច្ចុប្បន្ន និងអនាគត។

ជំនាញដែលមានតម្រូវការខ្ពស់បំផុត

បើតាមការវិភាគទៅលើដំណឹងជ្រើសរើសបុគ្គលិកចំនួន ២២៨លានកន្លែងនៅសហរដ្ឋអាមេរិក អ្នកជំនាញបានរកឃើញថា មានជំនាញឌីជីថលចំនួន ៤ដែលកំពុងមានការរីកចម្រើនលឿន និងមានតម្រូវការខ្ពស់ មានដូចជា៖

១. បញ្ញសប្បនិម្មិត (AI)/ ម៉ាស៊ីនសិក្សា (Machine learning [ML])

២. អ្នកជំនាញផ្នែកផ្ទុកទិន្នន័យពពក (Cloud computing)

៣. ជំនាញផ្នែកគ្រប់គ្រងផលិតផល (Product Management)

៤. អ្នកជំនាញផ្នែកបណ្ដាញសង្គម (Social Media)

អ្នកជំនាញបានរកឃើញថា ១នៃជំនាញទាំង៤ខាងលើ គឺស្ថិតក្នុងចំណោមការងារ៨ ដែលស្ថិតក្នុងបញ្ជីការងារដែលគេជ្រើសរើស។ របាយការណ៍បានបញ្ជាក់ថា «ជំនាញបញ្ញសប្បនិម្មិត(AI)/ ម៉ាស៊ីនសិក្សា (Machine learning [ML]) ជំនាញផ្នែកគ្រប់គ្រងផលិតផល (Product Management) និងអ្នកជំនាញផ្នែកបណ្ដាញសង្គម (Social Media) ជាជំនាញដែលមានកំណើន នៃតម្រូវការខ្ពស់ ព្រមទាំងជាប្រភព នៃការយល់ដឹងអំពីនិន្នាការសំខាន់ៗក្នុងសង្គមកាន់តែទូលំទូលាយ។ អត្រាកំណើនរយៈពេលប្រាំឆ្នាំសម្រាប់ជំនាញទាំងបួននេះ គឺមានរហូតដល់ ១២២% ក្នុងឆ្នាំ២០២១ ដោយមានកំណើនយ៉ាងតិច ១០% ក្នុងមួយឆ្នាំៗ។ លើសពីនេះ ជំនាញទាំងនេះក៏មិនមែនរីកចម្រើនតែនៅសហរដ្ឋអាមេរិកដែរ វាកំពុងតែមានតម្រូវការទូទាំងពិភពលោកតែម្ដង ព្រមទាំងមានសន្ទុះនៃតម្រូវការខ្ពស់ ពីមួយឆ្នាំទៅមួយឆ្នាំ។

អត្ថប្រយោជន៍នៃការចាប់ជំនាញមានតម្រូវការខ្ពស់

សម្រាប់បុគ្គលិកកំពុងមានជំនាញ ឬចាប់យកជំនាញដែលមានធនធានមនុស្សតិច ប៉ុន្តែមានតម្រូវការខ្ពស់ គេក៏ទទួលបានប្រាក់កម្រៃខ្ពស់ផងដែរ។ ទាំងប្រាក់ចំណូល និងឱកាស នឹងមានច្រើនជាងការងារទូទៅ ចាប់តាំងពីការចាប់ផ្ដើមអាជីព រហូតដល់ចូលនិវត្តន៍ ដោយអាស្រ័យទៅលើបទពិសោធន៍។

ជំនាញឌីជីថលកំពុងរីករាលដាលទៅគ្រប់ឧស្សាហកម្មទាំងអស់

ខណៈដំណើរវិវត្តន៍នៃឌីជីថល កំពុងរីករាលដាលនៅក្នុងវិស័យសេដ្ឋកិច្ច និងភាពរីកចម្រើននៃវិស័យឧស្សាហកម្ម បានជំរុញឱ្យមាននូវតម្រូវការជំនាញ AI/ML, Cloud Computing, Social Media និង Product Management កាន់តែច្រើនឡើង។ ទន្ទឹមនឹងនេះ វិស័យការងារមួយចំនួនទៀតដូចជា ប្រព័ន្ធសុវត្ថិភាពសាយប័រ (Cybersecurity) ការរចនាប្រកបដោយភាពច្នៃប្រឌិត (Creative design) ការគ្រប់គ្រងព័ត៌មានសុខភាព (Health information management) និងជំនាញសរសេរស្ក្រីប (Scripting language) ក៏កំពុងតែមានកំណើនជាបន្តបន្ទាប់ផងដែរ។ យ៉ាងណាមិញ អ្នកជំនាញរកឃើញថា « ជំនាញ AI/ML គឺជាជំនាញដែលកំពុងមានតម្រូវការខ្ពស់ ដោយមានកំណើនរហូតដល់ ៣៧០% នៅសហរដ្ឋអាមេរិក បើធៀបទៅនឹងប្រាំឆ្នាំមុន ដោយមានកំណើនខ្ពស់ជាង ២ ទៅ៣ដង នៃជំនាញដែលកំពុងមានតម្រូវការខ្ពស់ដទៃទៀត។

ជំនាញមួយចំនួនមានការថយចុះតម្រូវការ

នៅពេលដែលតម្រូវការជំនាញឌីជីថលមានកំណើននៅគ្រប់ឧស្សាហកម្ម ជំនាញប្រពៃណីមួយចំនួនក៏មានការថយចុះផងដែរ។ អ្នកជំនាញនៃវិទ្យាស្ថាន Burning Glass បានរកឃើញថា ជំនាញប្រឹក្សាពាណិជ្ជកម្ម (Business Consulting) ជំនាញលក់(Specialized Sales) ជំនាញមូលដ្ឋានទិន្នន័យ (Database) ជំនាញស្ថាបត្យកម្ម(Architecture) ជំនាញរដ្ឋបាល(Administration) ជំនាញប្រព័ន្ធបណ្ដាញ (Network Protocols) រួមទាំងជំនាញប្រពៃណីជាច្រើនទៀត នឹងថយចុះតម្រូវការ នៅពេលដែលវិស័យឌីថលរីកចម្រើនកាន់តែខ្លាំង៕