ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ភ្នំពេញ – ដោយទទួលបានការឧបត្ថម្ភគាំទ្រពីក្រុមហ៊ុនកាស្យ៉ូសិង្ហបុរី តាមរយៈបណ្ណាគារអន្តរជាតិ IBC និងដោយមានកិច្ចសហការជាមួយសហគមន៍អ្នកគណិតវិទ្យាកម្ពុជា ក្រសួងអប់រំ យុវជន និងកីឡា នឹងរៀបចំការប្រកួតប្រជែងគណិតវិទ្យា ដោយប្រើម៉ាស៊ីនគិតលេខវិទ្យាសាស្ត្រកាស្ប៉ូសម្រាប់សិស្សពីថ្នាក់ទី៧ ដល់ថ្នាក់ទី១១ ដែលនឹងប្រព្រឹត្តទៅនៅថ្ងៃអាទិត្យ ទី២៨ ខែឧសភា ឆ្នាំ២០២៣ វេលាម៉ោង៨ព្រឹក នៅវិទ្យាស្ថានជាតិអប់រំ អាគារ B07។
ការប្រកួតប្រជែងគណិតវិទ្យាដោយប្រើម៉ាស៊ីនគិតលេខវិទ្យាសាស្ត្រនេះ រៀបចំឡើងក្នុងគោលបំណងចូលរួមពង្រឹងសមត្ថភាពសិស្ស ព្រមទាំងពង្រឹងគុណភាព និងប្រសិទ្ធភាពនៃការរៀន និងការសិក្សាស្រាវជ្រាវគណិតវិទ្យា ជាពិសេសតាមរយៈការបញ្ជ្រាប ICT ទៅក្នុងការអប់រំគណិតវិទ្យានៅកម្ពុជា។
រង្វាន់ដែលទទួលបានពីកម្មវិធីរួមមាន ជ័យលាភីលេខ១ ទទួលបានមេដាយមាស ជ័យលាភីលេខ២ ទទួលបានមេដាយប្រាក់ និងជ័យលាភីលេខ៣ ទទួលបានមេដាយសំរឹទ្ធ ។ លើសពីនេះ ក៏មានវិញ្ញាបនបត្របញ្ជាក់លទ្ធផលជ័យលាភីលេខ១ ដល់លេខ១០ ព្រមទាំងរង្វាន់ឧបត្ថម្ភលើកទឹកចិត្តពីបណ្ណាគារអន្តរជាតិ IBC ផងដែរ។ បន្ថែមពីនេះ ក៏មានផ្ដល់វគ្គបំពាក់បំប៉នសមត្ថភាពការប្រើប្រាស់ម៉ាស៊ីនគិតលេខកាស្ប៉ូចំនួន ៣លើក តាមប្រព័ន្ធអនឡាញ នៅថ្ងៃទី៣១ មីនា, ថ្ងៃទី ២១ មេសា និងថ្ងៃទី ២២ ឧសភា វេលាម៉ោង ៦ល្ងាច។
សិស្សានុសិស្សដែលមានចំណាប់អារម្មណ៍ អាចមកចុះឈ្មោះចូលរួមប្រកួតនៅអគារមជ្ឈមណ្ឌលស្រាវជ្រាវគរុកោសល្យជំនាន់ថ្មីនៃវិទ្យាស្ថានជាតិអប់រំ ឬតាមរយៈតំណភ្ជាប់នេះ https://forms.gle/1Ya2wE6LDeYzXCa29 ។ ផុតកំណត់ទទួលពាក្យនៅថ្ងៃទី១៩ ខែឧសភា ឆ្នាំ២០២៣ វេលាម៉ោង៥:០០នាទីល្ងាចជាកំណត់។
សម្រាប់ព័ត៌មានលម្អិត សូមទាក់ទងនិងសាកសួរដោយផ្ទាល់នៅមជ្ឈមណ្ឌលស្រាវជ្រាវគរុកោសល្យជំនាន់ថ្មី ឬអាចទាក់ទងតាមតេឡេក្រាមលេខ ០៨៨ ២០២ ៣២២១/ ០៦៩ ៩៣០ ៥៥៥/ ០១១ ៦៩៧ ០៣៨៩ ។
គួរជម្រាបជូនថា បេក្ខនដែលចុះឈ្មោះប្រឡងនឹងទទួលបានម៉ាស៊ីនគិតលេខវិទ្យាសាស្រ្តកាស្ប៉ូតម្លៃ ២០ដុល្លារ ដោយឥតគិតថ្លៃ៕
