ភ្នំពេញ – ក្រោម​ការ​យក​ចិត្តទុកដាក់​លើ​ការ​កសាង​ធនធាន​មនុស្សឆ្នើម និង​អនាគត​យុវជន យុវនារី ក្នុង​យុគសម័យឌីជីថល សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រ​កម្ពុជា បានសម្រេច​ផ្តល់ «អាហារូបករណ៍​ទេព​កោសល្យ​ឌីជីថលតេជោ» តាមរយៈក្រសួងប្រៃសណីយ៍ និង​ទូរគមនាគមន៍ សម្រាប់​សិក្សា​ថ្នាក់បរិញ្ញាបត្រ​ជំនាញ​បច្ចេកវិទ្យា​ឌីជីថល រហូត​ដល់​៥០០កន្លែង។

អាហារូបករណ៍​ទាំង​៥០០កន្លែងនេះ នឹងត្រូវ​សិក្សា​នៅ​គ្រឹះស្ថានឧត្តមសិក្សា​រដ្ឋ និង​ឯកជន​ចំនួន៤ រួមមាន បណ្ឌិត​សភា​បច្ចេកវិទ្យា​ឌីជីថល​កម្ពុជា (CADT) សាកលវិទ្យាល័យ​ភូមិន្ទភ្នំពេញ (RUPP) វិទ្យាស្ថាន​បច្ចេកវិទ្យា​កម្ពុជា (ITC) និង សាកលវិទ្យាល័យ​អាមេរិកាំងភ្នំពេញ (AUPP) ជាដើម។

អត្ថប្រយោជន៍ នៃអាហារូបករណ៍​រួមមាន និស្សិត​ទទួលបាន​កុំព្យូទ័រ​យួរដៃ១គ្រឿង, ទទួល​បាន​ការរ៉ាបរងថ្លៃសិក្សា១០០% ដល់ចប់ថ្នាក់​បរិញ្ញាបត្រ ដែលមានតម្លៃចាប់ពី ៣១០០ដុល្លារ រហូត​ដល់ ២៤៧០០ដុល្លារ, ទទួល​បាន​ឱកាស​ការងារល្អ និង​ប្រាក់​បៀវត្សខ្ពស់​ក្នុងក្រសួង​ ស្ថាប័ន ក្រុមហ៊ុន ឬធនាគារ​ជាដើម។

សម្រាប់ជំនាញ​ដែល​ត្រូវ​ផ្តល់ជូន​រួមមាន ៖

– បណ្ឌិតសភាបច្ចេកវិទ្យាឌីជីថល (CADT) ៖ ទូរគមនាគមន៍ និង​បណ្តាញ, វិទ្យាសាស្រ្តកុំព្យូទ័រ, ធុរកិច្ច​ឌីជីថល។

– សាកលវិទ្យាល័យភូមិន្ទភ្នំពេញ (RUPP) ៖ វិទ្យាសាស្រ្ត​កុំព្យូទ័រ, ទូរគមនាគមន៍ និង​អេឡិចត្រូនិក, បច្ចេកវិទ្យាព័ត៌មាន។

– វិទ្យាស្ថានបច្ចេកវិទ្យា​កម្ពុជា (ITC) ៖ វិស្វករបច្ចេកវិទ្យា​ព័ត៌មាន និង​គមនាគមន៍, អេឡិចត្រូនិក និង​ទូរគមនាគមន៍។

– សាកលវិទ្យាល័យ​អាមេរិកាំងភ្នំពេញ (AUPP) ៖ វិទ្យាសាស្រ្ត​កុំព្យូទ័រ, បច្ចេកវិទ្យាក្លោដ, សន្តិសុខ​សាយប័រ, អភិវឌ្ឍន៍​សុសវែរ, គ្រប់គ្រង​បច្ចេកវិទ្យា​ព័ត៌មាន, បច្ចេកវិទ្យាគមនាគមន៍ និង​ព័ត៌មាន។

លក្ខខណ្ឌ នៃការជ្រើសរើស បេក្ខជន បេក្ខនារី​ទាំងអស់​ត្រូវឆ្លង​កាត់​ការ​ប្រឡង​ប្រជែង​ដែល​រៀបចំ​ដោយ​គណៈកម្មការ​អាហារូបករណ៍​ដោយ​មានលក្ខខណ្ឌ​ដូចជា ៖ ជាសិស្ស​ជាប់សញ្ញាបត្រ​មធ្យម​សិក្សា​ទុតិយភូមិ​ឆ្នាំ​សិក្សា​២០២២ ដែលមាននិទ្ទេសរួម A B ឬ​ C, ឆ្លង​កាត់ការប្រឡង​ប្រជែង​លើ​វិញ្ញាសាគណិតវិទ្យា តក្កវិទ្យា និង​ភាសា​អង់គ្លេស ។ សិស្សដែល​មាន​ជីវភាពក្រីក្រ មក​ពីជនបទ​ដាច់​ស្រយាល ជនមានពិការភាព និង​សិស្ស​នារី​ត្រូវ​បាន​លើកទឹកចិត្ត។

ការចុះឈ្មោះប្រឡង ត្រូវ​ធ្វើតាម​ប្រព័ន្ធអនឡាញ www.cadt.edu.kh/scholarship ចាប់ពីថ្ងៃជូនដំណឹង​នេះ រហូត​ដល់​ថ្ងៃទី២៧ ខែមករា ឆ្នាំ​២០២៣៕