ផ្តោតស្មារតីដើរតួនាទីសំខាន់សម្រាប់អ្នកសិក្សា និងអ្នកបំពេញការងារ ក្នុងការចម្រាញ់យកនូវផលិតភាព និងគុណភាពពីភារកិច្ចដែលកំពុង ឬគ្រោងនឹងអនុវត្តន៍។ យោងតាមគេហទំព័រ Geeky Gadgets បានបង្ហាញជូនគន្លឹះ១០ចំណុចខ្លីៗ ក្នុងការរក្សាស្មារតីឱ្យផ្តោតអារម្មណ៍ប្រកបដោយប្រសិទ្ធភាព។

១. កំណត់គោលដៅ ៖ ដើម្បីរក្សានូវសមត្ថភាពផ្តោតបានល្អ មុននឹងចាប់ផ្តើមអនុវត្តន៍សកម្មភាពអ្វីមួយ ត្រូវកំណត់ឱ្យច្បាស់អំពីគោលដៅដែលខ្លួនចង់បាន ថាតើអ្វីទៅជាភាពសំខាន់ និងអ្វីទៅជាអាទិភាព ?

២. កាត់ផ្តាច់រាល់ការរំខាន ៖ អ្វីក៏ដោយឱ្យតែប៉ះពាល់ដល់ការបំភ័ន្តស្មារតី ត្រូវកាត់ចោលឱ្យអស់ សូម្បីតែរបស់របរដែលធ្វើឱ្យអាម្មណ៍ស្មុគស្មាញ ក៏ត្រូវប្រមូលទុកមួយឡែកដែរ ដែលធ្វើយ៉ាងណាឱ្យបរិយាកាសការងារល្អ ស្រឡះ និងជំរុញឱ្យស្មារតីមានការផ្ចង់បានល្អ។​

៣. គ្រប់គ្រងពេល ៖ មិនមែនរាល់ការងារគ្រប់បែបបទ សុទ្ធតែត្រូវការផ្តោតទាំងអស់នោះទេ ហើយក៏មិនមែនគ្រប់ពេលសុទ្ធតែអំណោយផលចំពោះការផ្តោតរបស់អ្នកដែរ ដូច្នេះត្រូវរៀបចំប្រភេទការងារឱ្យស្របនឹងពេលវេលានីមួយៗ ។ ឧទាហរណ៍ថា ការងារណាអាចធ្វើបានល្អនៅពេលព្រឹក ហើយការងារណាអាចធ្វើបានល្អនៅពេលរសៀល ត្រូវសង្កេតពីខ្លួនឯងថា តើផលិតភាពខ្ពស់ភាគច្រើនកើតឡើងនៅពេលណា?

៤. អនុវត្តន៍សកម្មភាពធ្វើឱ្យចិត្តត្រជាក់ ៖ ការធ្វើសកម្មភាពដែលសម្រួលដល់ផ្លូវចិត្តជារឿយៗ ឬការអប់រំចិត្ត តាមរយៈសមាធិ សរសេរកំណត់ត្រា គឺជាការហ្វឹកហាត់ និងពង្រឹងខួរក្បាលឱ្យមានស្មារតីផ្តោតជាប្រចាំ។

៥. បំបែកការងារឱ្យតូចៗ ៖ ជាធម្មតាការងារតែងតែមាននៅក្នុងរូបភាពធំៗ ប៉ុន្តែគេមិនអាចយកវាទៅធ្វើម្តងទាំងអស់បាននោះទេ វាបង្កឱ្យបាក់ស្មារតីខ្លាចមិនហ៊ានធ្វើ ព្រោះមិនដឹងថាត្រូវផ្តើមមួយណាមុន, ដូច្នេះការបំបែកការងារឱ្យតូចៗ ផ្តល់ភាពងាយស្រួលក្នុងការប្រតិបត្តិ និងគ្រប់គ្រង រួមទាំងកាត់បន្ថយនូវការកើតមានអារម្មណ៍ធុញទ្រាន់ដោយសារការងារលើសលប់ជាដើម ហើយជំនួសមកវិញនូវការផ្តោតអារម្មណ៍បានល្អ។

៦. ប្រើប្រាស់ APP ជាជំនួយ ៖ រក្សាស្មារតីផ្តោតឱ្យមានប្រសិទ្ធភាព ដោយការប្រើប្រាស់កម្មវិធីអេឡិចត្រូនិចណាមួយជាជំនួយ វាមិនត្រឹមតែផ្តល់ភាពងាយស្រួលប៉ុណ្ណោះទេ ប៉ុន្តែវាជួយធ្វើឱ្យចំណេញបន្ថែមនូវពេលវេលាទៀតផង។

៧. សម្រាកឱ្យបានទៀងទាត់ ៖ ការចំណាយពេលលើសលុបទៅធ្វើការដោយមិនបានសម្រាកឱ្យបានគ្រប់គ្រាន់ វាបានបង្កជាអាការៈអស់កម្លាំងមិនធម្មតា (Burnout) ហេតុដូច្នេះហើយ ទោះក្នុងស្ថានភាពមមាញឹកយ៉ាងណា ក៏ត្រូវឆ្លៀតពេលខ្លះៗដើម្បីសម្រាកក្នុងរយៈពេលខ្លីៗ ដើម្បីរក្សាតុល្យភាពនៃការប្រើប្រាស់ថាមពល និងរក្សាការផ្តោតអារម្មណ៍ក្នុងរយៈពេលវែង។

៨. មានរបៀបរស់នៅប្រកបដោយផាសុកភាព ៖ កាលដែលមានរបៀបរស់នៅមួយប្រកបដោយផាសុកភាព គេមិនងាយបំភ្លេចបាននោះទេនូវសកម្មភាពទាំងឡាយណាដែលនាំឱ្យសុខភាពទាំងចិត្ត និងកាយមានភាពរឹងមាំ ដែលមានដូចជា គេងបានគ្រប់គ្រាន់ បរិភោគអាហារល្អៗ និងធ្វើលំហាត់ប្រាណជាប្រចាំ ដើម្បីហាត់ពត់ និងរក្សាចិត្តឱ្យបានល្អ  និងជាវិធីក្នុងការពង្រឹងជំនាញផ្តោត។

៩. លើកទឹកចិត្តខ្លួនឯង ៖ ការលើកទឹកចិត្តខ្លួនឯងតាមរយៈការពង្រឹងផ្នត់គំនិតវិជ្ជមាន ផ្តល់រង្វាន់ឱ្យខ្លួនឯងនៅពេលធ្វើបានល្អ ជាពិសេសនៅពេលអនុវត្តន៍ការផ្តោតបានល្អ ដែលជាចំណែកជំរុញឱ្យការផ្តោតកាន់តែមានប្រសិទ្ធភាពបន្ថែមទៀត។

១០. ផ្ទៀងផ្ទាត់ជាប្រចាំ ៖ ចំណុចសំខាន់មួយដែលមិនគួរមើលរំលង គឺ ផ្ទៀងផ្ទាត់វាយតម្លៃរាល់សកម្មភាពដែលបានប្រព្រឹត្តកន្លងមកទាក់ទងនឹងយុទ្ធសាស្រ្តក្នុងការពង្រឹងជំនាញផ្តោតអារម្មណ៍ថា តើចំណុចណាគួរអនុវត្តន៍បន្ត ឬចំណុចណាគួរកែរលម្អបន្ថែមដើម្បីអភិវឌ្ឍការផ្តោតអារម្មណ៍ឱ្យកាន់តែប្រសើរជាងនេះ៕