ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ការទទួលបានអាហារូបករណ៍គឺជាឱកាសដ៏ល្អសម្រាប់សិស្សានុសិស្សដែលចង់បន្តការសិក្សាទាំងក្នុង ឬក្រៅប្រទេស។ ទោះជាអាហារូបករណ៍មានការប្រកួតប្រជែងខ្ពស់ក៏ដោយ តែការត្រៀមខ្លួនឱ្យរួចរាល់ អាចជួយពង្រីកឱកាសដល់អ្នកបាន។ ខាងក្រោមនេះជាគន្លឹះសំខាន់ៗដែលអ្នកគួរដឹង ដើម្បីទទួលបានអាហារូបករណ៍៖
១. ស្វែងយល់ពីប្រភេទអាហារូបករណ៍ ៖ រឿងដំបូងដែលគួរនឹកឃើញមុនគេនៅពេលអ្នកគិតដល់អាហារូបករណ៍ គឺអាហារូបករណ៍ផ្អែកលើលទ្ធផលសិក្សាដែលត្រូវបានផ្តល់ជូនដល់និស្សិតដែលមានពិន្ទុខ្ពស់ និងមានស្នាដៃក្នុងការសិក្សា។ ប៉ុន្តែតើអ្នកដឹងទេថា នៅមានជម្រើសផ្សេងទៀត?
ប្រភេទផ្សេងទៀតដែលផ្តល់ដោយសាកលវិទ្យាល័យរួមមានដូចជា អាហារូបករណ៍អត្តពលិក, អ្នកខ្វះខាត និយោជកឧបត្ថម្ភ, អង្គការក្រៅរដ្ឋាភិបាល ឬផ្តល់ដោយរដ្ឋាភិបាល។ លក្ខខណ្ឌដើម្បីទទួលបានគឺប្រែប្រួលពីអាហារូបករណ៍មួយទៅមួយ ដូច្នេះ វាជារឿងសំខាន់ក្នុងការយល់ដឹងឱ្យបានពេញលេញអំពីអាហារូបករណ៍ដែលអ្នកដាក់ពាក្យថា តើមានលក្ខខណ្ឌអ្វីខ្លះ និងរបៀបធ្វើឱ្យខ្លួនអ្នកលេចធ្លោក្នុងចំណោមបេក្ខជនដទៃ។
២. រៀបចំឯកសារ ៖ ជាធម្មតាអាហារូបករណ៍ត្រូវការឯកសារមួយចំនួនដូចជា Statement of Purpose ឬអត្ថបទបង្ហាញពីហេតុផលនៃការដាក់ពាក្យ, កំណត់ត្រាសិក្សា (Transcript) ដែលបង្ហាញពីដំណើរការសិក្សារបស់អ្នក, លិខិតណែនាំ (Recommendation Letters) ពីគ្រូ ឬនាយកដ្ឋាន, លិខិតទទួលស្គាល់ (Admission Letter) ពីសាកលវិទ្យាល័យ (បើមាន), ភស្តុតាងពីជំនាញភាសារបស់អ្នក (ដូចជា IELTS, TOEFL សម្រាប់ការសិក្សានៅបរទេស)។ សូមត្រៀមវាឱ្យរួចរាល់ ក្នុងនោះឯកសារមួយចំនួន សូមស្នើសុំលិខិតបញ្ជាក់ពីគ្រូ និងសាស្រ្តាចារ្យ ទីប្រឹក្សាសាលា អតីតនិយោជកក្នុងកម្មសិក្សា និងសូម្បីតែថ្នាក់ដឹកនាំសាលាដែលអ្នកធ្លាប់សិក្សា។
៣. សរសេរសំណេរអាហារូបករណ៍ ៖ សំណេរអាហារូបករណ៍ គឺដូចជាលិខិតព័ត៌មានសម្រាប់ថ្នាក់បរិញ្ញាបត្រ។ ប្រាកដណាស់ នេះគឺជាឯកសារដ៏សំខាន់បំផុតមួយដែលអ្នកត្រូវសរសេរនៅក្នុងដំណើរសិក្សារបស់អ្នក។ ដូចនេះ អ្នកត្រូវការពេលវេលាច្រើន ហើយយល់ល្អកុំចាំសរសេរវានៅនាទីចុងក្រោយ។
ជាទូទៅ SOP នៃសំណេរអាហារូបករណ៍នេះ វាគួរតែបង្ហាញពីហេតុផលច្បាស់លាស់ដែលអ្នកសម្រេចចិត្តដាក់ពាក្យ, បញ្ជាក់ពីគោលដៅអាជីព និងរបៀបដែលអាហារូបករណ៍នឹងជួយអ្នកសម្រេចវា ក៏ដូចជាបង្ហាញពីការចូលរួមសកម្មភាពសង្គម ឬការងារស្ម័គ្រចិត្ត (បើមាន)។
៤. ត្រៀមខ្លួនសម្ភាសន៍ឱ្យបានល្អ ៖ អាហារូបករណ៍ខ្លះទាមទារការឆ្លើយសំណួរតាមអ៊ីនធឺណិត ឬសម្ភាសន៍។ សូមហ្វឹកហាត់ឆ្លើយសំណួរទូទៅដូចជា ហេតុអ្វីអ្នកសមនឹងអាហារូបករណ៍នេះ? តើអ្នកមានគោលដៅអ្វី? ជាមួយគ្នាត្រូវស្រាវជ្រាវ និងស្វែងយល់ពីចក្ខុវិស័យរបស់សាកលវិទ្យាល័យដែលអ្នកចង់សិក្សាផង។ សូមរៀបចំទុកមុនដោយព្រាងចម្លើយរបស់អ្នកសម្រាប់សំណួរដែលមានសក្តានុពល ហើយព្យាយាមអនុវត្តនៅមុខកញ្ចក់ជាមុន ប្រសិនបើអ្នកមានការភិតភ័យច្រើន។
រឿងមួយទៀតដែលសំខាន់ក្នុងការសម្ភាសន៍ សូមកុំភ្លេចត្រៀមសំណួរផ្ទាល់ខ្លួនសម្រាប់សួរទៅកាន់គណៈកម្មាធិការផងដែរ។ វាអនុញ្ញាតឱ្យពួកគេដឹងថា អ្នកបានធ្វើការស្រាវជ្រាវ ហើយអាចឱ្យអ្នកបញ្ចប់ការសម្ភាសន៍ទៅដោយគួរឱ្យចាប់អារម្មណ៍៕
