ការជក់ចិត្តនឹងការចុចទូរស័ព្ទរាប់ម៉ោងនៅពេលយប់ គឺជាបញ្ហាប្រឈមដ៏ធំមួយនាពេលបច្ចុប្បន្ន។ បើតាមការស្រាវជ្រាវ ការមើលអេក្រង់មុនពេលគេង ពន្លឺពណ៌ខៀវដែលចេញពីអេក្រង់ វានឹងរារាំងអ័រម៉ូនងងុយគេង ធ្វើឱ្យខួរក្បាលភ្ញោចខ្លាំងពិបាកសម្រាក នាំឱ្យគេងមិនលក់ស្កប់ស្កល់ បង្កឱ្យអស់កម្លាំងស្ពឹកស្រពន់នៅថ្ងៃបន្ទាប់ ព្រមទាំងប៉ះពាល់ដល់សុខភាពភ្នែក និងបង្កើនស្រ្តេសផ្លូវចិត្តទៀតផង។

ក្រោយពីឃើញនូវបញ្ហានេះ មាន​មនុស្ស​ជាច្រើន​បានព្យាយាមកាត់ផ្តាច់ការប្រើប្រាស់ទូរស័ព្ទភ្លាមៗទាំងស្រុងនៅពេលថ្ងៃ តែវាអាចនឹងមិនមានប្រសិទ្ធភាពឡើយ ហើយ​បែរជាជំរុញឱ្យយើងចង់ប្រើប្រាស់កាន់តែខ្លាំងនៅពេលយប់ទៅវិញ។

ដូច្នេះដើម្បីកែប្រែទម្លាប់នេះ និងទទួលបានដំណេកដ៏មានគុណភាព លោកអ្នកអាចអនុវត្តតាមវិធីសាស្រ្តខាងក្រោម៖

កាត់ផ្តាច់ទាំងស្រុងពេលថ្ងៃបង្កើនហានិភ័យនៅពេលសម្រាក ៖ ការប្រើអេក្រង់ច្រើនលើសលប់នៅពេលយប់ ដែលបណ្តាលមកពីការមិនបានប្រើសោះនៅពេលថ្ងៃ ជំរុញឱ្យប្រើប្រាស់ច្រើនម៉ោងរៀងរាល់មុនពេលគេង។ ទោះបីជាដឹងថា ប៉ះពាល់ក្នុងរយៈពេលវែង ឬបានដឹងហើយថា បានជះផលអវិជ្ជមានទៅកាន់គុណភាពដំណេកក្ដី ក៏អ្នកប្រើប្រាស់នៅតែបន្តធ្វើវាជាប្រចាំ ព្រោះយ៉ាងហោចណាស់ក៏បានផ្តល់ភាពកម្សាន្តខ្លះៗ ដូច្នេះការកាត់ផ្តាច់ទាំងស្រុងពេក អាចនាំឱ្យប្រើប្រាស់ជ្រុលនៅពេលសម្រាកទៅវិញ។

កំណត់អាទិភាព ៖ ប្រសិនបើការគេងដែលមានគុណភាព និងភាពស្ងប់គឺជាគោលដៅ ការផ្តល់អាទិភាពលើការគេង ជាកត្តាដែលពុំគួរមើលរំលង ហើយការផ្តល់អាទិភាពទៀតសោត អាចធ្វើបានតាមរយៈសកម្មភាពដូចជា ត្រូវតែមានវិធីសាស្រ្តរំឮកខ្លួនឯងចូលគេងឱ្យបានលឿន ព្រោះនៅពេលអ្នកមានអារម្មណ៍ថា បានសម្រាកគ្រប់គ្រាន់ វាក៏ជាចំណែកមួយជួយបង្កើនថាមពល ហើយបញ្ចប់សកម្មភាពការងារទៅតាមកាលកំណត់។

អនុវត្តន៍ទម្លាប់ល្អដែលនាំឱ្យការគេងមានគុណភាព ៖ ការសិក្សាបន្ថែម ការសាកល្បង ឬបង្កើតទម្លាប់ដែលអភិវឌ្ឍន៍ដល់ការគេង ក៏ជាកត្តារួមផ្សំដ៏សំខាន់ក្នុងការបង្កើនគុណភាពនៃការគេងក្នុងរយៈពេលវែង។ ទម្លាប់ទាំងនោះមានដូចជា កំណត់ម៉ោងចូលគេង កំណត់ម៉ោងក្រោក កាត់ផ្តាច់ភេសជ្ជៈមានជាតិអាល់កុលនិងមានជាតិកាហ្វេអ៊ីននៅពេលរសៀល និងល្ងាច រួមទាំងបង្កើតបរិយាកាសមួយដែលផ្តល់នូវផាសុកភាពនៅទីតាំងគេងផ្ទាល់តែម្តង។ មួយវិញទៀត ក្រៅពីការកាត់ផ្តាច់ ឬបន្ថយភេសជ្ជៈដែលរំខានដល់ការគេង គួរបន្ថែមនូវរបបអាហារ ដែលជំរុញដល់ការគេង និងងាយស្រួលរំលាយ ក៏ដូចជាការបង្កើនគុណភាពគេងឱ្យមានប្រសិទ្ធភាពផងដែរ។

បង្កើតកាលវិភាគចំពោះខ្លួនឯង ៖ កាលវិភាគដែលបង្កើតឡើងជាសាកល ឬការណែនាំពីសំណាក់អ្នកដទៃ វាអាចល្អដែរ ប៉ុន្តែពុំអាចឆ្លើយតបទាំងស្រុងទៅនឹងតម្រូវការរបស់ខ្លួនឯងបានឡើង នេះក៏ដោយសារតែបរិយាកាស ប្រភេទការងារ និងភាពរវល់ដែលមានភាពខុសគ្នា ដូច្នេះការបង្កើតកាលវិភាគដោយខ្លួនឯងវានឹងជួយ​បង្កើតបាននូវប្រសិទ្ធភាព និងកាត់បន្ថយការជក់ចិត្តនឹងការចុចទូរស័ព្ទច្រើនម៉ោងមុនពេលគេង៕