ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
អាហារូបករណ៍សិក្សានៅក្រៅប្រទេសបានផ្ដល់ឱកាសដល់សិស្សនិស្សិតដែលចង់បន្តការសិក្សាដើម្បីសម្រេចក្ដីស្រមៃ និងអ្នកដែលមិនមានលទ្ធភាពឱ្យទទួលបានការសិក្សា និងសម្រួលបន្ទុកចំណាយរបស់គ្រួសារផងដែរ ។ នេះជាការលើកឡើងរបស់កញ្ញា មាឃ ឡៃយ៉ា និស្សិតអាហារូបករណ៍ថ្នាក់បរិញ្ញាបត្រនៃអាហារូបករណ៍ព្រះអង្គម្ចាស់ក្សត្រិយ៍មហាចក្រីសិរិនថនឆ្នាំសិក្សា២០២១-២០២៤ ។
កញ្ញា មាឃ ឡៃយ៉ា ដែលជាក្មេងស្រីមកពីតំបន់ដាច់ស្រយាល នៃខេត្តព្រះវិហារ បានជាប់អាហារូបករណ៍ម្ចាស់ក្សត្រិយ៍សិរិនថន ជំនាញគណិតវិទ្យា និងវិទ្យាសាស្រ្តកុំព្យូទ័រ។ ឡៃយ៉ា បានលើកឡើងថា បានជាខ្លួនសម្រេចចិត្តដាក់ពាក្យអាហារូបករណ៍នេះ ព្រោះតែគិតថា អាចជាផ្លូវចេញមួយដ៏ល្អសម្រាប់គ្រួសារក្នុងការចំណាយលើការសិក្សារបស់កញ្ញា ខណៈជីវភាពគ្រួសាររបស់កញ្ញាក៏មិនសូវធូរធារផងដែរ ។ លើសពីនេះ ការដាក់ពាក្យប្រឡងអាហារូបករណ៍នេះ ក៏ដើម្បីបំពេញក្ដីស្រមៃខ្លួនឯងដែលចង់សិក្សានៅក្រៅប្រទេសផងដែរ ។
ពាក់ព័ន្ធនឹងការជ្រើសរើសអាហារូបករណ៍លើជំនាញគណិតវិទ្យា និងវិទ្យាសាស្ត្រកុំព្យូទ័រ វិញ ឡៃយ៉ា បញ្ជាក់ថា ការជ្រើសរើសជំនាញនេះ ព្រោះតែនាងយល់ឃើញថា ប្រសិនបើនាងអាចចេះជំនាញនេះ នឹងនឹងងាយស្រួលក្នុងការចែករំលែក និងបង្រៀនដល់អ្នកជំនាន់ក្រោយក្នុងតំបន់ ឬស្រុកកំណើតរបស់នាង ត្បិតជាតំបន់ដាច់ស្រយាល ដូចនេះមិនសូវមានគ្រូបង្រៀនគណិតវិទ្យាឡើយ ។
ជាមួយគ្នាយុវតី មាឃ ឡៃយ៉ា ក៏បានចែករំលែកពីបទពិសោធន៍ក្នុងការដាក់ពាក្យស្នើសុំអាហារូបករណ៍ផងដែរ ដោយដំបូងបេក្ខជនត្រូវធ្វើការដាក់ពាក្យស្នើសុំប្រឡងនៅក្រសួងអប់រំ យុវជន និងកីឡា និងឆ្លងកាត់ការប្រឡងចំនួន៣ដំណាក់កាលដូចជា លើកទី១ គណិតវិទ្យា និងអង់គ្លេស លើកទី២ គណិតវិទ្យា រូបវិទ្យា គីមីវិទ្យា ជីវវិទ្យា និងអង់គ្លេស ដោយលើកទី៣ នឹងជាប់ដល់វគ្គសម្ភាសន៍ ។
កញ្ញា មាឃ ឡៃយ៉ា បានបន្ថែមថា ក្នុងការស្នើពាក្យប្រឡងអាហារូបករណ៍ បេក្ខជនត្រូវត្រៀមឯកសារចាំបាច់មួយចំនួនដូចជា សញ្ញាបត្របណ្ដោះអាសន្នមធ្យមសិក្សាទុតិយភូមិ សំបុត្របញ្ជាក់កំណើត អត្តសញ្ញាណប័ណ្ណ ពាក្យស្នើសុំអាហារូបករណ៍ ប្រតិចារិក ព្រឹត្តិបត្តិពិន្ទុសិក្សានៅថ្នាក់វិទ្យាល័យ និងលិខិតអនុសាសន៍ពីរច្បាប់ (ដែលសរសេរដោយលោកគ្រូអ្នកគ្រូនៅថ្នាក់វិទ្យាល័យ) ។
ក្នុងអំឡុងពេលសិក្សាកន្លងមក ឡៃយ៉ា បានជួបបញ្ហាមួយចំនួនដូចជា ការប្រើប្រាស់ភាសានៅពេលទៅដល់ដំបូងៗ អាហារដែលមិនសូវមានសម្បូរបែបព្រោះកន្លែងស្នាក់ និងសាលារៀនមិនស្ថិតនៅទីក្រុងរួមទាំងភាគច្រើនប្រជាជននៅតំបន់នោះមិនបរិភោគសាច់ជ្រូក ដូចនេះអាហារមិនសូវមានផលិតពីសាច់ជ្រូកឡើយ ។ លើសពីនេះ បញ្ហាផ្សេងៗដែលជួបក្នុងកំឡុងពេលសិក្សានៅឆ្ងាយផ្ទះបានធ្វើឱ្យកញ្ញាមានគំនិតច្នៃប្រឌិតខ្ពស់ មានភាពអំណត់ និងផ្លាស់ប្ដូរទស្សនៈកាន់តែចាស់ទុំជាងមុន ។ ជារួមកញ្ញាសូមលើកទឹកចិត្តដល់សិស្សានុសិស្ស ឬបេក្ខជនដទៃទៀតដែលមានក្ដីស្រមៃសិក្សានៅក្រៅប្រទេស សូមរក្សាការខិតខំព្យាយាម និងសិក្សារៀនសូត្របន្ថែមអំពីអ្វីដែលអ្នកចង់សិក្សា ។ បន្តដាក់ពាក្យអាហារូបករណ៍ម្ដងទៀតប្រសិនបើអ្នកបរាជ័យ ព្រោះភាពបរាជ័យក្នុងការដាក់ពាក្យអាហារូបករណ៍របស់អ្នកជាមេរៀនដែលអ្នកអាចសិក្សាបន្ថែមកាន់តែប្រសើរ ៕
