ជូនលុយឪពុកម្ដាយ សាច់ញាតិបងប្អូន និងមនុស្សជាទីស្រឡាញ់ ជួបជុំមិត្តភក្ដិ ធ្វើម្ហូបទៅវត្ត និងចូលបុណ្យ សុទ្ធសឹងតែជាសកម្មភាពដែលត្រូវចំណាយលុយ។ ដូច្នេះ រាល់ខែបុណ្យទាន រួមទាំងខែភ្ជុំផង ប្រជាជនទូទៅតែងតែត្រូវចំណាយច្រើនជាងខែធម្មតា។ ហេតុនេះ គួរចាត់ចែងលុយបែបណា ដើម្បីឱ្យសល់ក្រោយចប់ភ្ជុំ និងអាចចាយគ្រប់ដល់ចុងខែ?

លោក ទិត កំរង អ្នកជំនាញហិរញ្ញវត្ថុ និងជាស្ថាបនិក និងប្រធានក្រុមហ៊ុន Rithipul Co., Ltd ក៏ដូចជាស្ថាបិន Kotluy App មានប្រសាសន៍ថា ការគ្រប់គ្រងហិរញ្ញវត្ថុ ទោះជាក្នុងលក្ខខណ្ឌក្រុមហ៊ុនក្ដី គ្រួសារក្ដី ឬផ្ទាល់ខ្លួនក្ដី ធាតុសំខាន់បំផុត គឺការរៀបចំផែនការថវិកា។ លោកបន្តថា ដើម្បីរៀបចំផែនការបានត្រឹមត្រូវ គឺត្រូវធ្វើឡើងតាំងពីដើមឆ្នាំ និងផ្អែកលើចំណូលជាក់ស្ដែង ហើយការបែងចែកត្រូវផ្ដោតលើ ថវិកាចំណាយសម្រាប់ជីវភាពប្រចាំថ្ងៃ ចំណាយសម្រាប់គ្រាអាសន្ន ថវិកាសម្រាប់ចំណាយខែបុណ្យទាន និងការជួបជុំជាដើម។

ការរៀបចំផែនការចំណាយ មិនមែនទាល់តែមានបុណ្យទាន ទើបយើងប្រឹងរកលុយ ប្រឹងសន្សំទុកនោះទេ ព្រោះនៅពេលនោះវានឹងគៀក អាចនឹងបង្កជាហានិភ័យផ្សេងៗកើតឡើង ដូចជាអាចនឹងខ្ចីគេ អាចនឹងអត់មានលុយទៅស្រុក ឬក៏បានទៅស្រុកដែរ ប៉ុន្តែមានលុយតិចតួច ពិបាកទំនាក់ទំនង ឬចាយវាយ។

បើតាមលោក កំរង ការបង្កើតផែនការចំណាយ គឺធ្វើឡើងនៅអំឡុងខែ ១១ ឬខែ១២ គឺល្អបំផុត។ ពេលនោះយុវជនអាចកំណត់ថា ថវិកាដែលមានអាចចំណាយប៉ុណ្ណា ទើបមិនប៉ះពាល់សុខភាពហិរញ្ញវត្ថុ។ លោកបន្តថា រាល់ផែនការ ដែលបានរៀបចំ ត្រូវតែអនុវត្ត និងត្រូវមានខ្ទង់មួយ ដើម្បីសន្សំជារៀងរាល់ខែ។ លោកបានលើកឧទាហរណ៍ជាក់ស្ដែងថា ក្នុងលក្ខខណ្ឌ ដែលបុគ្គលបានកំណត់មួយលានរៀលសម្រាប់ខែបុណ្យទាន យើងត្រូវដកលុយមួយផ្នែកតូចនៃចំណូលសន្សំរាល់ខែ ហើយនៅពេលដល់ថ្ងែបុណ្យមកដល់ គឺអាចចាយតែមួយលានរៀលនោះបានហើយ, លើសពីនេះនៅក្នុងមួយលាននោះ គឺយុវជន ឬអ្នកចំណាយអាចបែងចែក ទៅលើការចាយវាយចំបាច់បំផុត ដូចជា ជូនអ្នកមានគុណ ទៅវត្ត និងជួបជុំមិត្តភក្ដិ ឬសាច់ញាតិ។

លោកបានសង្កត់ធ្ងន់ថា អ្នកដែលត្រូវប្រយ័ត្នខ្លាំងលើការចាយវាយ នៅអំឡុងពេលបុណ្យទានគឺ អ្នកដែលមានប្រាក់ចំណូលសម្រាប់ចាយត្រឹមតែមួយខែៗ ជាពិសេស កម្មករកម្មការនីរោងចក្រ និងអ្នកធ្វើការក្នុងសេដ្ឋកិច្ចក្រៅប្រព័ន្ធ។ លោកបន្ថែមថា ក្នុងរដូវកាលនេះ ពួកគាត់អាចប្រឈមមុខនឹងបញ្ហាបំណុល ព្រោះថា ចំណូលដែលពួកគាត់ទទួលបាននៅដដែល ប៉ុន្តែចំណាយកើនឡើងលើសរាល់ខែ, ហេតុនេះ ការគម្រោងថវិកា គឺចាំបាច់ និងសំខាន់ខ្លាំង និងអាចជួយពួកគាត់ជៀសផុតពីបញ្ហាវិបត្តិហិរញ្ញវត្ថុផ្ទាល់ខ្លួន និងគ្រួសារ៕