ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ផ្ដើមចេញពីការចូលចិត្តហាត់កីឡា និងចង់ជួយសង្គម លោក ជា ពិសិទ្ធ គ្រីស្តូហ្វឺ បានផ្ដើមគំនិតបង្កើត ក្លឹបរត់ NEAK RUN ឬប្រែថា រត់នាគ ពីសមាជិកអ្នកចូលចិត្តកីឡាដូចគ្នាចំនួន៥នាក់។ តាំងពីចាប់ផ្ដើម រហូតមកដល់បច្ចុប្បន្ន NEAK RUN បានការទទួលស្គាល់ពីសំណាក់មហាជន អ្នកចូលចិត្តកីឡា និងបានចូលរួមក្នុងការងារសប្បុរសជាច្រើនជាពិសេសកិច្ចការជួយដល់កុមារកម្ពុជា។
លោក ជា ពិសិទ្ធ គ្រីស្តូហ្វឺ ស្ថាបនិកនៃក្លឹប NEAK RUN បានឱ្យដឹងថា NEAK RUN ត្រូវបានបង្កើតឡើងតាំងពីដើមខែមិថុនា ឆ្នាំ២០២៤ ហើយមូលហេតុដែលធ្វើឱ្យលោកចង់បង្កើត NEAK RUN នេះឡើង គឺនៅក្រោមហេតុផលអាចរួមចំណែកតូចមួយក្នុងសង្គមជាតិ។ ជាក់ស្ដែង ការរត់ហាត់ប្រាណនៅពេលព្រឹកព្រលឹម អាចជួយឱ្យអ្នករត់មានអារម្មណ៍ស្រស់ស្រាយពេញមួយថ្ងៃ ធ្វើឱ្យផ្លូវចិត្តល្អ មានផលិតភាពការងារពេញមួយថ្ងៃ និងលទ្ធផលការងារល្អ។ ការរត់ហាត់ប្រាណនេះក៏អាចជួយឱ្យមានសុខភាពរឹងមាំ និងកម្លាំងមាំមួន អាចឱ្យមនុស្សមកពីប្រភពផ្សេងគ្នាបង្កើតមិត្តភាពថ្មីៗ និងអាចបង្កើតជាកម្មវិធីរត់សប្បុរសធម៌ផ្សេងៗ។
“មុនចាប់ផ្ដើម NEAK RUN ខ្ញុំបានឃើញកុមារជាច្រើន គេងនៅលើផ្លូវសាធារណៈ និងមិនមានឱកាសទៅរៀន ព្រោះត្រូវជួយលក់ផ្កា លក់សត្វ ជំនួសឪពុកម្ដាយ នៅម្ដុំសួនមុខវាំង ដែលឱ្យខ្ញុំពិតជាអាណិតពួកគាត់ រហូតគិតឃើញថា យកអ្វីដែលខ្លួនស្រលាញ់ទៅជួយពួកគាត់បានដោយរបៀបណា”
លោក ជា ពិសិទ្ធ គ្រីស្តូហ្វឺ
បើនិយាយឱ្យចំ NEAK RUN មិនមែនជាក្លឹបហាត់ប្រាណដែលបណ្ដុះអ្នកហាត់ប្រាណតែប៉ុណ្ណោះទេ NEAK RUN ជាកន្លែងដែលបង្កើតរបៀបរស់នៅថ្មីទៅកាន់មនុស្សដោយផ្សារភ្ជាប់នឹងការស្រឡាញ់សុខភាព ការចែករំលែក ការផ្ដល់ជូនដោយក្ដីស្រឡាញ់ទៅកាន់កុមារកម្ពុជាដែលកំពុងត្រូវការជំនួយ ត្រូវការឱកាសរៀនសូត្រ និងអាហារគ្រប់គ្រាន់ បើទោះបីជាមិនបានជួយច្រើន ក៏អាចជួយដល់កុមារមួយចំនួនដែរ។
តាំងពីចាប់ផ្ដើម រហូតមកដល់បច្ចុប្បន្ន NEAK RUN បានបោះជំហានទៅមុខជាបន្តបន្ទាប់តាមរយៈ កាលវិភាគនៃការរត់ពេលព្រឹកជុំគ្នានាថ្ងៃសៅរ៍រៀងរាល់សប្ដាហ៍ ហើយក៏មានជាកម្មវិធីរត់ប្រចាំឆ្នាំសម្រាប់ NEAK RUN និងជាអ្នកសហការណ៍រៀបចំកម្មវិធីរត់ដើម្បីសប្បុរសធម៌ជាដើម។ បន្តទៅមុនទៀត លោក ពិសិទ្ធ គ្រីស្តូហ្វឺ នឹងបន្ថែមការអភិវឌ្ឍន៍នៃក្រុម NEAK RUN ពីអ្នកសហការណ៍រៀបចំកម្មវិធី ជាអ្នករៀបចំកម្មវិធីបែបកីឡា កីឡាសម្រាប់ភាពរីករាយជាក្រុម ក៏ដូចជាកម្មវិធីសប្បុរសធម៌ជាច្រើនទៀតនាថ្ងៃអនាគត។
លោក ជា ពិសិទ្ធ គ្រីស្តូហ្វឺ បន្ថែមថា ជាធម្មតា មួយខែ ឬពីរខែម្ដង បើទោះបីជាមិនមានកម្មវិធីរត់សប្បុរសធម៌ធំៗនោះទេ ក្រុមរបស់លោកតែងតែរៀបចំបាយទឹកជាកញ្ចប់ ទៅជូនដល់ពូស៊ីក្លូ អ្នកដែលគ្មានទីជម្រក ឬអាហារ និងកុមារខ្វះខាតជាដើម។ ហើយថវិកានៃការធ្វើសម្បុរសធម៌នេះ NEAK RUN ទទួលបានពីអ្នកចូលរួមរបស់ NEAK RUN និងការសហការណ៍របស់ ISF Cambodia និង Rabbit School (សាលាទន្សាយ)។ គួរជម្រាបថា Rabbit School ឬ សាលាទន្សាយ ជាសាលាដែលជួយដល់កុមារជាច្រើន ដូចនេះ NEAK RUN ក៏បានចូលរួមក្នុងការទិញសម្ភារៈរៀន និងលេងសម្រាប់កុមារនៅសាលាទន្សាយផងដែរ។
ក្នុងនាមជា អ្នកបង្កើតក្លឹបនេះឡើង លោក ជា ពិសិទ្ធ គ្រីស្តីហ្វឺ ពិតជាសប្បាយចិត្តដែលអាចធ្វើឱ្យសកម្មភាពមួយនេះកើតឡើង និងអាចជួយដល់អ្នកដែលកំពុងត្រូវការជំនួយពិតប្រាកដ ជាពិសេសអាចបង្កើតទម្លាប់ស្រឡាញ់សុខភាពតាមរយៈការហាត់កីឡា និងរត់ហាត់ប្រាណជាដើម។ ជារួម លោក គ្រីស្តូហ្វឺ លើកទឹកចិត្តដល់អ្នកគ្រប់គ្នាចូលរួមថែរក្សាសុខភាព តាមរយៈការហាត់កីឡា រត់កីឡា និងចូលរួមចែករំលែកនូវសកម្មភាពល្អៗ ជាពិសេស សកម្មភាពសប្បុរសធម៌ ដើម្បីជាការចែករំលែកក្ដីស្រឡាញ់ និងការចែករំលែកទុក្ខលំបាកដល់អ្នកដែលកំពុងពិបាក៕
