ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
បន្ទាប់ពីការប្រកួតជជែកដេញដោលយ៉ាងស្វិតស្វាញ ទីបំផុតបានរកឃើញបេក្ខជន២ក្រុម នឹងបន្តទៅកាន់វគ្គផ្ដាច់ព្រ័ត្រ កម្មវិធីជជែកដេញដោល «ទស្សនៈយុវជន» រដូវកាលទី៥ ដែលគ្រោងធ្វើនៅពាក់កណ្តាលខែមិថុនា ខាងមុខនេះ។
ក្រុមនិស្សិត២ក្រុម ដែលនឹងបន្តទៅវគ្គផ្ដាច់ព្រ័ត្រ នៃកម្មវិធីជជែកដេញដោល «ទស្សនៈយុវជន» រដូវកាលទី៥ ក្រោមមូលបទ «ស្រ្តី និងសកលភាវូបនីយកម្ម» បានទៅលើ ក្រុមមេរ៉ាសម្បយោគបញ្ច និងក្រុមពុទ្ធនារីឬទ្ធី។
សម្រាប់ការប្រកួតវគ្គពាក់កណ្ដាលផ្តាច់ព្រ័ត្រ មានបេក្ខជន៤ក្រុម មកពីសាកលវិទ្យាល័យផ្សេងគ្នា ដោយប្រកួតលើប្រធានបទចំនួន២ គឺប្រធានបទទី១៖ “ការមិនអនុវត្តនូវក្រមសីលធម៌វិជ្ជាជីវៈអ្នកសារព័ត៌មាន ជាកត្តាជំរុញឱ្យកើនឡើងនូវវប្បធម៌ស្តីបន្ទោសជនរងគ្រោះ” រវាងក្រុម «ស្រ្តីសកលឫទ្ធិពល» និងក្រុម «មេរ៉ាសម្បយោគបញ្ច» និងប្រធានបទទី២ ៖ “ការកើនឡើងនៃការប្រើប្រាស់បណ្ដាញសង្គម ជាកត្តាជំរុញឱ្យមានផលប៉ះពាល់ដល់ស្រ្តីជាជាងជួយស្រ្តី” រវាងក្រុម «សណ្ដែកក្រហម» និងក្រុម «ពុទ្ធិនារីឬទ្ធី»។
លោក ឯក ពុទ្ធពិសិដ្ឋ ដែលជាប្រធានគម្រោងទស្សនៈយុវជនរដូវកាលទី៥ បានលើកឡើងថា បេក្ខជនទាំង៤ក្រុម បានបញ្ចេញសមត្ថភាព និងចំណេះដឹងពីការស្រាវជ្រាវលើប្រធានបទយ៉ាងសកម្ម ដែលធ្វើឱ្យទស្សនិកជនទាំងក្នុងការផ្សាយផ្ទាល់ និងសាធារណជនដែលចូលរួមផ្ទាល់នៅទីតាំង គាំទ្រនូវការបញ្ចេញសម្លេងរបស់ពួកគេ ដែលពោរពេញទៅដោយភាពក្លាហាន និងប្រើប្រាស់ទឡ្ហីករណ៍ដោយមានឯកសារយោងជាច្រើន។
លោក ឯក ពុទ្ធពិសិដ្ឋ បន្ថែមថា ក្រោយការបញ្ចេញសមត្ថភាពរវាងក្រុមទាំង៤ និងការវាយតម្លៃរបស់គណៈកម្មការដែលមានបទពិសោធន៍ទាំងបីរូប ជាលទ្ធផលនៃការប្រកួតនៅវគ្គពាក់កណ្តាលផ្តាច់ព្រ័ត្រ គឺបានទៅលើក្រុមពុទ្ធនារីឬទ្ធី និងក្រុមមេរ៉ាសម្បយោគបញ្ច ដែលនឹងប្រព្រឹត្តទៅនៅថ្ងៃទី១៥ ខែមិថុនា ២០២៥។
គួរជំរាបជូនថា ការប្រកួតជជែកដេញដោល «ទស្សនៈយុវជន» រដូវកាលទី៥នេះ ត្រូវបានសហការរៀបចំឡើងដោយ NGO-CEDAW និង RULErs។ មុននឹងឈានមកដល់វគ្គនេះ បេក្ខជនបានឆ្លងកាត់ការបណ្តុះបណ្តាលពីអ្នកជំនាញទាំងផ្នែកនិយាយជាសាធារណៈ និងការជជែកដេញដោល ព្រមទាំងប្រធានបទដែលពាក់ព័ន្ធនឹងស្រ្តី។ បន្ទាប់ពីទទួលបានប្រធានបទជជែកដេញដោល បេក្ខជនបានទទួលការណែនាំពីអ្នកណែនាំរបស់ខ្លួន ដែលជាអតីតជ័យលាភីប្រកួតនាឆ្នាំកន្លងទៅផងដែរ៕
