ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
សាលារៀនវ៉េស្ទឡាញន៍ សាខាក្រុងច្បារមន (ខេត្តកំពង់ស្ពឺ) សហការជាមួយគ្រឹះស្ថានបោះពុម្ពផ្សាយជាច្រើន បានរៀបចំកម្មវិធីពិព័រណ៍សៀវភៅ ក្រោមប្រធានបទ “អានដើម្បីក្លាយជាអ្នកដឹកនាំ” រយៈពេលពីរថ្ងៃចាប់ពីថ្ងៃទី៣១ ខែឧសភា ដល់ថ្ងៃទី១ ខែមិថុនា ឆ្នាំ២០២៥ ក្នុងបំណងជំរុញកុមារ និងយុវជនមានទម្លាប់ក្នុងការអាន ព្រមទាំងជួយគាំទ្រស្នាដៃតែងនិពន្ធ។
លោក កន សវុណ្ណារ៉ា នាយករងផ្នែកទំនាក់ទំនងសាធារណៈបានឱ្យដឹងថា ពិព័ណ៌សៀវភៅនេះ រៀបចំឡើងដោយការសហការជាមួយគ្រឹះស្ថានបោះពុម្ពផ្សាយ ក្រុមហ៊ុន Sipar ក្រុមហ៊ុន Mind Book សៀវភៅ១ សហគមន៍១ សៀវភៅយុទ្ធសាស្រ្តនៃភាពជាអ្នកដឹកនាំ និងក្រុមហ៊ុន Next Gen ហើយមានសៀវភៅដាក់តាំងបង្ហាញជាង១៥០០ចំណងជើងគ្រប់កម្រិត ដែលផ្តោតលើការអប់រំចាប់ពីកុមារតូច រហូតមនុស្សគ្រប់វ័យ និងលក់ក្នុងតម្លៃពិសេសជូនផងដែរ។ សៀវភៅទាំងនោះ មានបែបប្រលោមលោក ទស្សនវិជ្ជា និងចិត្តវិទ្យា សៀវភៅសម្រាប់កុមារ សៀវភៅប្រវត្តិវិទ្យា និងភូមិវិទ្យា សហគ្រិនភាព សៀវភៅទាក់ទងនឹងសាសនា និងសិល្បៈជាដើម ដែលមានជាភាសាខ្មែរ និងភាសាអង់គ្លេស។
លោក សវុណ្ណារ៉ា បន្ថែមថា ការរៀបចំកម្មវិធីពិព័ណ៌សៀវភៅឆ្នាំនេះ គឺក្រោមប្រធានបទ “អានដើម្បីក្លាយជាអ្នកដឹកនាំ” ដើម្បីជំរុញ និងលើកទឹកចិត្តដល់កុមារ និងយុវជន ស្រឡាញ់សៀវភៅ ស្រឡាញ់ការអាន និងបង្កើតទម្លាប់អានសៀវភៅចាប់ពីកុមារភាពឡើងទៅ ក៏ដូចជាត្រៀមចាប់យកចំណេះដឹង ជំនាញ និងបំណិនត្រិះរិះពិចារណថ្មីៗបន្ថែមទៀត។ លើសពីនេះ កម្មវិធីនេះនឹងជួយលើកទឹកចិត្ត និងជំរុញការតាក់តែងនិពន្ធសៀវភៅថ្មីៗ ដែលឆ្លើយតបនឹងតថភាពជាក់ស្តែងសង្គម និងផ្តល់នូវពុទ្ធិកាន់តែទូលំទូលាយទៅដល់អ្នកអាន។
សូមជម្រាបថា នៅក្នុងពិព័ណ៌សៀវភៅនេះ អ្នកចូលរួមបានទទួលការចែករំលែកអំពីសារៈសំខាន់អំពីការអានពីវាគ្មិន និងឈ្វេងយល់ពីលក្ខៈសម្បត្តិនៃភាពជាអ្នកដឹកនាំ ការបញ្ចុះតម្លៃពិសេសសម្រាប់ការជាវសៀវភៅ ល្បែងកម្សាន្តនានានិងចែកកាដូ FREE៕
