អរម៉ូនអង់ដូហ្វីន គឺជាសារធាតុគីមី ដែលបញ្ចេញនៅក្នុងរាងកាយមនុស្ស នៅពេលដែលមានអារម្មណ៍ឈឺចាប់ ឬស្ថិតក្រោមភាពតានតឹង។ យោងតាមទិន្នានុប្បវត្តិវេជ្ជសាស្ត្រ Hawaii បានបង្ហាញថា អរម៉ូនអង់ដូហ្វីន មានអត្ថប្រយោជន៍ខ្លាំងអំឡុងពេលមនុស្សម្នាក់ឈឺចាប់ មានអារម្មណ៍តានតឹង ថប់បារម្ភ ឬត្រូវការឱ្យតម្លៃខ្លួនឯងខ្ពស់។ 

ការស្រាវជ្រាវរកឃើញថា តាមរយៈការបង្កើនអរម៉ូនអង់ដូហ្វីនតាមរបៀបធម្មជាតិ ធ្វើឱ្យសុខភាពទូទៅនៃរាងកាយប្រសើរឡើង។ ជាពិសេសគឺ បន្ថយរោគសញ្ញានៃភាពតានតឹង ថប់បារម្ភ និងធ្លាក់ទឹកចិត្ត, ពង្រឹងស្ថេរភាពអារម្មណ៍, លើកកម្ពស់ការឱ្យតម្លៃខ្លួនឯង, ធ្វើឱ្យមុខងារយល់ដឹងប្រសើរឡើង, កាត់បន្ថយបញ្ហារលាក និងបង្កើនសមត្ថភាពគ្រប់គ្រងចំណង់អាហារ។ តាមការសិក្សាជាច្រើនបង្ហាញថា មានវិធីធម្មជាតិសាមញ្ញចំនួន ៨ ដែលអ្នកអាចបង្កើនកម្រិតអរម៉ូន អង់ដូហ្វីន ក្នុងរាងកាយ។

១. ធ្វើលំហាត់ប្រាណ ៖ ការធ្វើលំហាត់ប្រាណបានច្រើន អាចជួយជំរុញ​រាងកាយផលិតអរម៉ូនអង់ដូហ្វីនបានច្រើនដូចគ្នាដែរ។ តាមលទ្ធផលសិក្សារបស់​ SEMANTIC SCHOLAR ឆ្នាំ ២០១១​ បង្ហាញថា អង់ដូហ្វីន ត្រូវបានបញ្ចេញនៅក្នុងរាងកាយដោយស្វ័យប្រវត្តិ បន្ទាប់ពីហាត់ប្រាណបាន ៣០នាទី ហើយការធ្វើលំហាត់ប្រាណជាក្រុមនឹងជំរុញឱ្យការផលិតអង់ដូហ្វីនបានកាន់តែប្រសើរ។ ការសិក្សាដោយ Biology Letters Journal បានបង្ហាញថា អ្នកចូលរួម ១២នាក់ ដែលធ្វើលំហាត់ប្រាណជាក្រុមមានការជំរុញអរម៉ូនអង់ដូហ្វីនបានច្រើនជាងការហាត់ប្រាណម្នាក់ឯង។

២. ធ្វើសមាធិរាល់ថ្ងៃ ៖ យោងតាមការស្រាវជ្រាវឆ្នាំ២០១១ បានបង្ហាញថា ការធ្វើសម្មាធិ គឺជាវិធីដ៏ល្អមួយក្នុងការបង្កើនការបញ្ចេញអរម៉ូន អង់ដូហ្វីនក្នុងរាងកាយរបស់អ្នក។ សម្មាធិជួយឱ្យរាងកាយរបស់អ្នកសម្រាក និងជួយឱ្យអ្នកមានអារម្មណ៍ស្ងប់។ ក្រៅពីនេះ ការធ្វើសម្មាធិអាចជួយអ្នកពង្រឹងសុខុមាលភាពទូទៅ ធ្វើឱ្យអារម្មណ៍ល្អ ពង្រឹងប្រព័ន្ធភាពស៊ាំ និងគុណភាពដំណេក។

៣. ស្រូបក្លិនប្រេងក្រអូប ៖ ការស្រូបក្លិនប្រេងដែលអ្នកចូលចិត្ត ដូចជាផ្កាឡាវែនឌ័រ ឬក្លិនក្រអូបផ្សេងៗទៀត អាចជំរុញការបញ្ចេញសារធាតុអង់ដូហ្វីន និងមានអារម្មណ៍ស្រួលខ្លួន។ ការជ្រើសរើសក្លិន គឺអាស្រ័យលើចំណូលចិត្តផ្ទាល់ខ្លួនរបស់អ្នក។

៤. ទទួលទានស្រាក្រហម និងសូកូឡាខ្មៅ ៖ ការញ៉ាំសូកូឡាខ្មៅ អាចជួយជំរុញរាងកាយរបស់អ្នកបញ្ចេញសារធាតុអង់ដូហ្វីន និងធ្វើឱ្យអ្នកមានអារម្មណ៍ស្រួលខ្លួន។ អ្នកក៏អាចកក់សម្គាល់ដែរថា នៅពេលមានអារម្មណ៍តានតឹង ឬសោកសៅ អ្នកចាប់ផ្ដើមចង់ញ៉ាំសូកូឡា។ ឬប្រសិនបើអ្នកចូលចិត្តស្រា ការញ៉ាំស្រាក្រហមមួយកែវ ប្រហែលជាអាចធ្វើឱ្យអ្នកមានអារម្មណ៍ល្អ ព្រោះការញ៉ាំស្រាមួយកែវ អាចបង្កើនការផលិតអរម៉ូនអង់ដូហ្វីន។ យ៉ាងណាក៏ដោយ​ ការទទួលទានស្រាក្រហម គឺមិនអាចលើសពីមួយកែវនោះទេ។

៥. សើចឱ្យបានច្រើន ៖ អ្នកប្រហែលជាធ្លាប់កត់សម្គាល់ហើយថា នៅពេលអ្នកសើចខ្លាំងៗជាមួយមិត្តភក្ដិរបស់អ្នក អារម្មណ៍របស់អ្នកស្រាប់តែប្រសើរឡើង ព្រមទាំងស្បើយការថប់បារម្ភ និងស្ត្រេសអស់មួយកម្រិត។ ការសិក្សារបស់ Journal of Neuroscience បង្ហាញថា ការសើច ឬមើលរឿងកំប្លែងរយៈពេលកន្លះម៉ោង អាចបង្កើនកម្រិតអរម៉ូន អង់ដូហ្វីន និងធ្វើឱ្យអ្នកមានអារម្មណ៍ល្អប្រសើរ។

៦. មានចិត្តសប្បុរស ៖ សេចក្ដីសប្បុរសចំពោះនរណាម្នាក់ដែលអ្នកស្គាល់ ឬនរណាម្នាក់ ដែលត្រូវការជំនួយពីអ្នក ធ្វើឱ្យអ្នកមានអារម្មណ៍ថា ធូរចិត្ត និងជ្រះថ្លាក្នុងអារម្មណ៍។ អ្នកនឹងមានអារម្មណ៍ប្រសើរជាងមុន និងរីករាយចំពោះខ្លួនឯង ព្រោះទង្វើសប្បុរសនេះបានជំរុញឱ្យរាងកាយរបស់អ្នក បញ្ចេញសារធាតុអង់ដូហ្វីនក្នុងកម្រិតមួយខ្ពស់។

៧. ស្ដាប់តន្ត្រី ៖ ការស្ដាប់តន្ត្រី គឺជាសកម្មភាពពិសេស​ ដែលអ្នកអាចព្យាបាលអារម្មណ៍តានតឹង និងភាពថប់បារម្ភដោយខ្លួនឯងបាន ហើយនេះក៏ជាសកម្មភាពដែលជំរុញការបង្កើនកម្រិតអរម៉ូនអង់ដូហ្វីនផងដែរ។ យោងតាមទិនានុប្បវត្តិ Evolutionary Psychology បានរកឃើញថា ការសម្តែង ឬធ្វើសកម្មភាពទាក់ទងនឹងតន្ត្រី អាចជំរុញការផលិតអរម៉ូនអង់ដូហ្វីន បានច្រើនជាងការស្ដាប់ទៅទៀត។ 

៨. ស្រូបពន្លឺព្រះអាទិត្យ ៖ ការស្រូបពន្លឺព្រះអាទិត្យនាពេលព្រឹក ផ្ដល់នូវអត្ថប្រយោជន៍ជាច្រើន សម្រាប់សុខុមាលភាពរបស់អ្នក។ លើសពីការជួយស្បែករបស់អ្នកផលិតសារធាតុចិញ្ចឹមសំខាន់ៗ វីតាមីនឌីនៃពន្លឺព្រះអាទិត្យក៏ជួយបង្កើនការផលិតមេឡាតូនីន និងសេរ៉ូតូនីនផងដែរ។ សារធាតុទាំងនេះ ជួយឱ្យអារម្មណ៍ប្រសើរឡើង បង្កើនថាមពល និងពង្រឹងគុណភាពដំណេក។ អ្នកអាចចេញទៅខាងក្រៅ យ៉ាងហោចណាស់ ៣ ទៅ ៤ដងក្នុងមួយសប្ដាហ៍ ដោយចំណាយពេលប្រហែល ១៥នាទី ដើម្បីស្រូបពន្លឺព្រះអាទិត្យ។ យ៉ាងណាក៏ដោយ សូមកុំភ្លេចលាបឡេការពារកម្ដៅថ្ងៃ ដែលមាន SPF 15 ឬខ្ពស់ជាងនេះ ព្រោះកាំរស្មី UV មានគ្រោះថ្នាក់ដល់សុខភាព និងបង្កឱ្យមានមហារីកស្បែក៕