ទីបំផុតក្រសួងអប់រំ យុវជន និងកីឡា បានរកឃើញបេក្ខជន៣រូប ជាប់ជ័យលាភីលេខ១ សិស្សពូកែទូទាំងប្រទេសថ្នាក់ទី១២ ផ្នែកអក្សរសិល្ប៍ខ្មែរ គណិតវិទ្យា និងរូបវិទ្យា បន្ទាប់ពីការប្រឡងយ៉ាងស្វិតស្មាញជាច្រើនដំណាក់កាល កាលពីពេលកន្លងទៅថ្មីៗនេះ។

សម្រាប់ការប្រឡងសិស្សពូកែទូទាំងប្រទេសថ្នាក់ទី១២ ប្រចាំឆ្នាំ២០២៥នេះ ជ័យលាភីលេខ១ ផ្នែកអក្សរសិល្ប៍ខ្មែរ បានទៅលើ យុវតី ណា មុន្នីចន្ទកន្និកា មកពីវិទ្យាល័យអន្លង់វែង ខេត្តបន្ទាយមានជ័យ, ជ័យលាភីលេខ១ ផ្នែកគណិតវិទ្យា បានទៅលើ យុវសិស្ស ចាន់ សុវណ្ណារាជ មកពីវិទ្យាល័យប៊ុនរានី ហ៊ុនសែន ព្រៃពោន ខេត្តព្រៃវែង និងជ័យលាភីលេខ១ ផ្នែករូបវិទ្យា បានទៅលើ យុវសិស្ស ពៅ ជុំរតនៈ មកពីសាលារៀនអន្តរជាតិស្មាធឃីដ ខេត្តសៀមរាប។

ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្រ្តីក្រសួងអប់រំ យុវជន និងកីឡា បានកោតសរសើរ និងអបអរសាទរក្មួយៗជាបេក្ខជនទាំងអស់ និងជ័យលាភីទាំង ៣០រូប ជាសិស្សពូកែទូទាំងប្រទេស ផ្នែកអក្សរសិល្ប៍ខ្មែរ គណិតវិទ្យា និងរូបវិទ្យា សម្រាប់ថ្នាក់ទី ៩ និងថ្នាក់ទី ១២ ដែលបានខិតខំរៀនសូត្រយកអស់កម្លាំងកាយចិត្ត និងបញ្ញាញាណ ចូលរួមប្រកួតដណ្តើមជ័យលាភីសិស្សពូកែទូទាំងប្រទេស។

ជាមួយ​គ្នានេះឯកឧត្តមបណ្ឌិតសភាចារ្យ ឧបនាយករដ្ឋមន្ត្រី បានវាយតម្លៃខ្ពស់ចំពោះកិច្ចខិតខំប្រឹងប្រែងរបស់ គណៈកម្មការរៀបចំការប្រឡង និងមេប្រយោគគ្រប់លំដាប់ថ្នាក់ ដែលបានបំពេញការងារប្រកបដោយវិជ្ជាជីវៈ និងគោរពនូវគោលការណ៍ច្បាប់ យុត្តិធម៌ តម្លាភាព ព្រមទាំងថ្លែងអំណរគុណយ៉ាងជ្រាលជ្រៅចំពោះ គណៈអភិបាលរាជធានីភ្នំពេញ អាជ្ញាធរពាក់ព័ន្ធ និងមន្ទីរអប់រំ យុវជន និងកីឡារាជធានីភ្នំពេញ ដែលបានបំពេញការងារជាម្ចាស់ផ្ទះយ៉ាងល្អឥតខ្ចោះ និងបានសហការធ្វើឱ្យការប្រឡងដែលមានរយៈពេល៥ថ្ងៃប្រព្រឹត្តទៅប្រកបដោយជោគជ័យ។ ជាពិសេស អរគុណដល់អ្នកអាណាព្យាបាល និងសប្បុរសជនទាំងអស់ ដែលបានជួយឧបត្ថម្ភ ទាំងថវិកា និងសម្ភារៈ ដល់ជ័យលាភីសិស្សពូកែទូទាំងប្រទេស និងសូមបន្តចូលរួមជួយគាំទ្រនៅឆ្នាំក្រោយៗទៀត។

ជាមួយគ្នានេះ លោកបណ្ឌិតសភាចារ្យ ច័ន្ទ រ័ត្ន ប្រធានសហគមន៍អ្នកគណិតវិទ្យាកម្ពុជា ក៏​បានមានប្រសាសន៍ ដោយកោតសរសើរ​ចំពោះប្អូនៗជាតំណាងវិទ្យាល័យរបស់ខ្លួន និងតំណាងខេត្ត/រាជធានីភ្នំពេញ បានមកចូលរួមប្រឡងជ្រើសរើសសិស្សពូកែទូទាំងប្រទេសឆ្នាំ២០២៥។ លោកបណ្ឌិតសភាចារ្យបន្តថា លទ្ធផលថ្ងៃនេះ គឺបង្ហាញពីការខិតខំប្រឹងជាច្រើនឆ្នាំកន្លងមក។ “សូមចូលរួមអបអរសាទរដែលប្អូនៗទទួលបានជោគជ័យហើយដណ្តើមបានពីលេខ១ ដល់លេខ៥ តំណាងឱ្សសិស្សមធ្យមសិក្សាទុតិយភូមិទូទាំងប្រទេស”។

គួរជម្រាបជូនថា សម្រាប់រង្វាន់ជ័យលាភីសិស្សពូកែទូទាំងប្រទេស រួមមាន ១. ប្រកាសស្តីពីការទទួលស្គាល់សិស្សពូកែទូទាំងប្រទេស ដោយឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា មួយច្បាប់ ២. មេដាយមួយគ្រឿងសម្រាប់បេក្ខជនជ័យលាភី ចំណាត់ថ្នាក់ពីលេខ១ ដល់លេខ៣ ៣. វិញ្ញាបនបត្របញ្ជាក់សិស្សពូកែទូទាំងប្រទេសមួយច្បាប់។ ក្នុងនោះ ជ័យលាភីលេខ ១ ទទួលបានថិកា ៣លាន ៥សែនរៀល, ជ័យលាភីលេខ ២ ទទួលបានថិកា ៣លាន ២សែនរៀល, ជ័យលាភីលេខ ៣ ទទួលបានថិកា ២លាន ៩សែនរៀល, ជ័យលាភីលេខ ៤ ទទួលបានថិកា ២លាន ៦សែនរៀល, ជ័យលាភីលេខ ៦ ទទួលបានថិកា ២លាន ៣សែនរៀល៕