ទោះបីជាស្តាប់មិនលឺចំពោះ​ការ​ជជែកដេញដោលគ្នា​នៅលើវេទិកា រវាង​ក្រុម​​សិស្សមក​ពី​វិទ្យាល័យ​ហ៊ុនសែនកំពង់ចាម សាលារៀនជំនាន់ថ្មី និង​ក្រុមសិស្សមកពីសាលាប៊ែលធី អន្តរជាតិ ក្នុងវគ្គផ្តាច់ព្រ័ត្រ នៃកម្មវិធីជជែកដេញដោលថ្នាក់ជាតិឆ្នាំ២០២៤ ក្តី តែតាមរយៈអ្នកបកប្រែ សិស្សគថ្លង់ចំនួន២០រូប អាច​ដឹងពីការជជែកនោះ ហើយ​ពួកគេបានបង្ហាញការ​ចាប់អារម្មណ៍ និង​ចូលចិត្ត​ចំពោះកម្មវិធីជជែកដេញដោលនេះ។

លោកស្រី តាន់ ប្រីដា នាយិកាវិទ្យាល័យអប់រំពិសេស បានប្រាប់ AMS Education ថា ការចូលរួមរបស់សិស្សានុសិស្សគថ្លង់ ក្នុងកម្មពិធីជជែកដេញដោលថ្នាក់ជាតិឆ្នាំ២០២៤នេះ ជាឱកាសមួយដ៏សំខាន់ដែលអាចឱ្យពួកគេបានឃើញ និងស្វែងយល់ពីសកម្មភាពផ្សេងៗរបស់សិស្សានុសិស្សដទៃ។ លើសពីនេះ ក៏ជាឱកាសពិសេសដែលក្រសួងអប់រំបានផ្ដល់ឱកាសឱ្យវិទ្យាល័យអប់រំពិសេសបានដឹកនាំសិស្សមកចូលរួមក្នុងកម្មពិធីជជែកដេញដោលថ្នាក់ជាតិវគ្គផ្ដាច់ព្រ័ត្រ។ 

បើតាមនាយិកាវិទ្យាល័យអប់រំពិសេស ការ​ចូលរួមរបស់សិស្សគថ្លង់នេះ ក៏ជាជំហានដំបូង ប្រៀបដូចជាពន្លកថ្មីមួយដែលធ្វើឱ្យពួកគាត់មានក្ដីសង្ឃឹម និងក្ដីស្រមៃរយៈពេលវែងដែលអាចឱ្យពួកគាត់មានចំណង់​ក្នុងការចូលរួមកម្មពិធីប្រកួតផ្សេងៗ។

«ការនិយាយ និងការស្ដាប់មិនមែនជាឧបសគ្គនៃការរៀនរបស់សិស្សថ្លង់ឡើយ ព្រោះយើងមានអ្នកបកប្រែ មានកម្មវិធីសិក្សា ហើយក៏មានការគាំទ្រពីក្រសួងអប់រំផងដែរ»

នាយិកាវិទ្យាល័យអប់រំពិសេស តាន់ ប្រីដា

ជាការកត់សម្គាល់របស់លោកស្រី តាន់ ប្រីដា ក្នុងការចូលរួមមើលកម្មវិធីប្រកួតជជែកដេញដោលថ្នាក់ជាតិនេះ សិស្សគថ្លង់ បានបង្ហាញពីការយកចិត្តទុកដាក់ទៅលើការបកប្រែតាមរយៈភាសាកាយវិការរបស់គ្រូពួកគាត់ជាខ្លាំង ដែលបញ្ជាក់បានថា ពួកគាត់ចូលចិត្ត និងមានចំណាប់អាហារម្មណ៍នឹងកម្មពិធីជជែកដេញដោលរបស់ក្រុមសិស្សានុសិស្សដែលបានប្រកួត។

លោកស្រី តាន់ ប្រីដា ក៏បានសម្តែងក្តីសង្ឃឹមដែរថា ការចូលរួមនេះ អាចជាបទពិសោធន៍ថ្មីសម្រាប់ពួកគាត់ក្នុងការសិក្សា និងស្រាវជ្រាវបន្ថែម ដោយឃើញពីសកម្មភាពនៃការប្រកួតប្រជែងជជែកដេញដោល ដោយមានអំណះអំណាង និងការលើកទឡ្ហីករណ៍ក្នុងការប្រកួតរបស់ក្រុមនីមួយៗ ហើយទូរស័ព្ទ គឺជាឧបករណ៍មួយដែលអាចជួយដល់សិស្សគថ្លង់ច្រើនក្នុងការសិក្សារបស់ពួកគាត់។

គួរបញ្ជាក់ដែរថា សិស្សគថ្លង់ទាំង២០រូបនោះ ត្រូវដឹកនាំដោយលោកស្រី តាន់ ប្រីដា មកពីវិទ្យាល័យអប់រំពិសេសច្បារអំពៅ និង វិទ្យាល័យអប់រំពិសេសភ្នំពេញថ្មី ចូលរួមនៅក្នុងកម្មពិធីខួបលើកទី២៥ទិវាអន្តរជាតិសម្រាប់យុវជន ក្រោមប្រធានបទ «នវានុវត្តន៍ឌីជីថលរបស់យុវជនសម្រាប់ការអភិវឌ្ឍប្រកបដោយចីរភាព» ដែលប្រព្រឹត្តកាលពីថ្ងៃទី៧ និង៨ ខែសីហា ឆ្នាំ២០២៤កន្លងទៅ នៅវិទ្យាស្ថានជាតិអប់រំ៕