សៀមរាប — ក្នុងកិច្ចប្រជុំ​រដ្ឋមន្រ្តីអាស៊ាន ផ្នែកវិទ្យាសាស្រ្ត បច្ចេកវិទ្យា និង​នវានុវត្តន៍ លើកទី២០ នាព្រឹក​ថ្ងៃទី៧ មិថុនា សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រកម្ពុជា មានប្រសាសន៍ថា ការប្រកាន់អភិក្រមដែលយកប្រជាជនជាស្នូល នៅក្នុងការប្រើប្រាស់បញ្ញាសិប្បនិម្មិត (AI) មានសារៈសំខាន់យ៉ាងខ្លាំង ហើយយើងក៏ត្រូវជំរុញការផ្លាស់ប្តូរ ឥរិយាបថរបស់អ្នករៀបចំគោលនយោបាយ, អ្នកស្រាវជ្រាវ និងស្ថាប័នឯកជនផងដែរ។

ក្នុងនោះបើតាម​ប្រសាសន៍របស់សម្តេចធិបតី ការចាប់យក និងការប្រើប្រាស់បញ្ញាសិប្បនិម្មិត ត្រូវមានដែនកំណត់មួយដែលគិតគូរពីសីលធម៌ និងតម្លៃសង្គម ។ សម្តេចបន្តថា សាធារណជនទូទៅបានសម្ដែងការ ភ័យខ្លាច និងការព្រួយបារម្ភរួចទៅហើយថាសិទ្ធិ និងឯកជនភាពរបស់ពួកគេ អាចនឹងត្រូវបានរំលោភបំពាន ដោយសមត្ថភាពដ៏ខ្លាំងសម្បើម នៃកម្មវិធីដែលបង្កើតឡើងដោយបញ្ញាសិប្បនិម្មិត។

ក្នុងឱកាសនោះ សម្តេចធិបតី ក៏បានលើកឡើងដែរថា ប្រសិនបើគ្មានការអប់រំ និងជំនាញជាមូលដ្ឋាន និងការចូលរួមជាបន្តបន្ទាប់ ប្រាកដណាស់ថា ពិតជាមានការលំបាក សម្រាប់អ្នកប្រើប្រាស់ជាទូទៅនៅក្នុងការបែងចែករវាងព័ត៌មានក្លែងក្លាយ និងព័ត៌មានពិត ឬការបែងចែករវាងរូបភាពសិប្បនិម្មិត ជាមួយនឹងរូបភាពដើម។ ពេលខ្លះការវិវត្តបែបនេះបែរជាបង្កឱ្យមានការខាតបង់យ៉ាងច្រើនដល់សង្គម និងរដ្ឋាភិបាល។ សម្តេចក៏បានលើកឡើង ពីការបំប្លែងរូបភាពដើម តាមរយៈបច្ចេកវិទ្យាទាំងនេះ អាចយារយីដល់សតិអារម្មណ៍សង្គម និងសាធារណៈមតិ ហើយក៏អាចបង្កឱ្យមានការបែងចែកនៅក្នុងសង្គម, ភាពច្របូកច្របល់ និងអស្ថិរភាពដែលអាចប៉ះពាល់ដល់ភាពសុខដុមនៃសង្គម និងសន្តិភាពដែលបានមកដោយលំបាក។

យ៉ាងណាក៏ដោយ តាមរយៈ​ការពិភាក្សា និងការផ្លាស់ប្តូរស៊ីជម្រៅ​ពេញមួយ​សប្តាហ៍ ក្នុងកិច្ចប្រជុំ​រដ្ឋមន្រ្តីអាស៊ាន​ផ្នែកវិទ្យាសាស្រ្ត បច្ចេកវិទ្យា និង​នវានុវត្តន៍លើកទី២០ សម្តេចសង្ឃឹមថា នឹង​អាច​ដាក់ចេញ​នូវគំនិត​ជាក់ស្តែងនិយម ដែលមានមូលដ្ឋាន​នៅលើកិច្ច​សហប្រតិបត្តិការ​ទ្វេភាគី និងពហុភាគី នៅ​ក្នុងទិសដៅ​ពន្លឿន​ការ​អភិវឌ្ឍវិទ្យាសាស្រ្ត, បច្ចេកវិទ្យា និង​នវានុវត្តន៍ ដើម្បីជាប្រយោជន៍​ដល់​មនុស្សជាតិ៕