នាវាបណ្ណាល័យចល័ត Doulos Hope មកពីប្រទេសអាល្លឺម៉ង់ បានធ្វើដំណើរមកដល់កំពង់ផែស្វយ័តភ្នំពេញ កាលពីថ្ងៃទី៥ ខែមិថុនា ឆ្នាំ២០២៤ ក្នុងគោលបំណងមកបំពេញបេសកកម្មលើកកម្ពស់អក្ខរកម្មឱ្យកាន់តែស្រស់បំព្រងនៅតំបន់អាស៊ី និងលើកកម្ពស់អក្ខរកម្មឱ្យកាន់តែប្រសើរឡើង។ ការ​មក​ដល់នៃនាវាដែលមានផ្ទុកសៀវភៅចម្រុះជាង៥ពាន់ចំណងជើង បាននិងកំពុងទាក់ទាញការចាប់អារម្មណ៍ពីប្រជាជនកម្ពុជា ជាពិសេសយុវជនដែលស្រឡាញ់ការអានឱ្យទៅចូលរួមទស្សនា និងទទួលយកបទពិសោធន៍ថ្មីក្នុងការអានសៀវភៅលើនាវា។

លោក តុន ច័ន្ទរឹទ្ធិ ជាអ្នកនិពន្ធឯករាជ្យ បានប្រាប់ឱ្យដឹងថា លោកមានអារម្មណ៍រំភើប និងសប្បាយចិត្តជាខ្លាំងដែលបានចូលទស្សនានាវាបណ្ណាល័យចល័ត Doulos Hope ព្រោះនេះជាបទពិសោធន៍សម្រាប់លោកដែលបានមកឃើញនាវាធំមួយដែលមានផ្ទុកទៅដោយសៀវភៅជាច្រើន ក៏ដូចជាសកម្មភាពផ្សេងៗដែលមិនធ្លាប់ឃើញពីមុនមក។

អ្នកនិពន្ធឯករាជ្យរូបនេះ បញ្ជាក់បន្ថែមថា អ្វីដែលលោកចាប់អារម្មណ៍នៅលើនាវាបណ្ណាល័យចល័ត Doulos Hope នេះ គឺការតាំងពិព័រណ៍សៀវភៅរាប់រយចំណងជើងដែលយើងអាចមកអានបានដោយឥតគិតថ្លៃ និងគួរឱ្យចាប់អារម្មណ៍សម្រាប់អ្នកចូលចិត្តអាន។ លោក តុន ច័ន្ទរឹទ្ធិ បន្តថា ពិព័រណ៍សៀវភៅដ៏ធំដែលធ្វើនៅលើនាវា គឺជាបរិយាកាសមួយផ្សេងដែលមិនធ្លាប់ជួប ហើយប្រសិនបើយើងមិនបានមកទទួលបទពិសោធន៍ផ្ទាល់នោះទេ គឺគួរឱ្យសោកស្ដាយបំផុត។

លោក តុន ច័ន្ទរឹទ្ធិ បន្ថែមថា លោកពិតជាចង់ឱ្យប្រទេសកម្ពុជា មាននាវាបណ្ណាល័យចល័តបែបនេះ ហើយធ្វើដំណើរតាមដងទន្លេ គឺពិតជាអាចចូលរួមជំរុញការអាន បង្កើតចំណេះដឹង និងការកម្សាន្តផ្សេងៗដល់ប្រជាជនខ្មែរផងដែរ។ លោក តុន ច័ន្ទរឹទ្ធិ ក៏បានលើកទឹកចិត្តដល់យុវជនផ្សេងទៀត គួរតែមកទទួលយកបទពិសោធន៍ដ៏អស្ចារ្យមួយនេះ ពីព្រោះនេះជាព្រឹត្តិការណ៍មួយដែលមិនធ្លាប់មាននៅទីក្រុងភ្នំពេញ។

កញ្ញា សុធារ័ត្ន ដែលជាអាជីករវ័យក្មេង​មួយរូប ក៏​បាន​មក​អានសៀវភៅ​នៅលើនាវានេះដែរ ដោយថា កញ្ញាចាប់អារម្មណ៍មកចូលរួមទស្សនា នាវាបណ្ណាល័យចល័ត Doulos Hope នេះ ដោយសារវាជាព្រឹត្តិការណ៍កម្រមាន និងមានសៀវភៅចម្រុះជាច្រើនប្រភេទ។ កញ្ញា បន្តថា ដំបូងឡើយកញ្ញាមកចូលរួមព្រោះចង់ស្វែងយល់ ប៉ុន្តែក្រោយមកក៏ចាប់អារម្មណ៍ចង់ទិញសៀវភៅទៅអានផងដែរ។

កញ្ញា សុធារ័ត្ន បន្ថែមថា សម្រាប់កម្ពុជា គឺជារឿងល្អដែលកន្លងមកមានការលើកកម្ពស់ការអាន តាមរយៈបណ្ណាល័យចល័ត នៅតាមទីសាធារៈ រថយន្តបណ្ណាល័យចល័ត នៅតាមភ្នំពេញ និងបណ្ដាខេត្តដែលជួយឱ្យអ្នកដែលគ្មានលទ្ធភាពបានអានសៀវភៅ។ លើសពីនេះ ប្រសិនបើកម្ពុជាអាចមាន នាវាបណ្ណាល័យចល័តបែបនេះ ក៏កាន់តែរួមចំណែកលើកកម្ពស់ការអាន និងទេសចរណ៍កម្ពុជាផងដែរ។

អ្នកបើកអាជីវកម្មផ្ទាល់ខ្លួនរូបនេះ បន្ថែមថា កញ្ញាក៏នឹងចូលរួមផ្សព្វផ្សាយអំពី នាវាបណ្ណាល័យចល័ត Doulos Hope នេះនៅតាមបណ្ដាញសង្គម ដើម្បីឱ្យមិត្តភក្ដិបានមកចូលរួមទស្សនា ព្រោះវាបានផ្ដល់អារម្មណ៍រំភើបជាមួយអាកាសធាតុល្អ និងអាចរកបានសៀវភៅដែលយើងពេញចិត្ត។

កញ្ញា ទ្រី ជូអ៊ិញ ជានិស្សិតឆ្នាំទី១ ជំនាញទំនាក់ទំនងអន្តរជាតិ នៃសាកលវិទ្យាល័យភូមិន្ទភ្នំពេញ និយាយថា កញ្ញាទទួលបានអារម្មណ៍ថ្មីមួយទៀតនៅពេលបានចូលទស្សនានាវាបណ្ណាល័យចល័ត Doulos Hope នេះ។ កញ្ញា ទ្រី ជូអ៊ិញ បន្តថា សម្រាប់សៀវដែលចាប់អារម្មណ៍ និងស្វែងរកទិញនៅទីនេះ​ គឺជាប្រភេទសៀវភៅដែលទាក់ទងទៅនឹងប្រវត្តិសាស្រ្តពិភពលោក។

និស្សិតឆ្នាំទី១ ជំនាញទំនាក់ទំនងអន្តរជាតិ នៃសាកលវិទ្យាល័យភូមិន្ទភ្នំពេញ បន្ថែមថា រូបគេមានអារម្មណ៍សប្បាយចិត្ត នៅពេលបានឃើញសៀវភៅជាច្រើននៅលើនាវានេះ។ កញ្ញាបន្តថា សម្រាប់សៀវភៅជាភាសាខ្មែរដែលធ្លាប់អានកន្លងមក មានស្នាដៃល្អៗជាច្រើន ប៉ុន្តែចាំបាច់ត្រូវជំរុញយុវជនឱ្យចាប់អារម្មណ៍ការអានឱ្យបានច្រើន។ ជាពិសេស ការបង្កើតឱ្យមានការតាំងពិព័រណ៍សៀវភៅនៅលើនាវាបណ្ណាល័យចល័តបបែបនេះ។

កញ្ញា ទ្រី ជូអ៊ិញ ក៏បានលើកទឹកចិត្តឱ្យយុវជនចូលរួមនាវាបណ្ណាល័យចល័ត Doulos Hope នេះ មកស្វែងយល់បន្ថែមអំពីការរៀបចំពិព័រណ៍សៀវភៅនៅលើនាវា ដើម្បីចូលរួមអភិវឌ្ឍសៀវភៅរបស់ខ្មែរ ក៏ដូចជាលើកកម្ពស់ការអានផងដែរ។

លោក ខុម ពុទ្ធិ ជានិស្សិតឆ្នាំទី៣ ជំនាញគ្រប់គ្រងពាណិជ្ជកម្មអន្តរជាតិ នៃសាកលវិទ្យាល័យភូមិន្ទភ្នំពេញ លើកឡើងដែរថា រូបគេចូលទស្សនានាវាបណ្ណាល័យចល័ត Doulos Hope នេះ ក៏ព្រោះតែរូបគេចូលចិត្តអានសៀវភៅ ក៏ដូចជាចង់ដឹងអំពីសៀវភៅថ្មីៗ។ លោក ខុម ពុទ្ធិ បន្តថា ការអានសៀវភៅ ពិតជាមានសារៈសំខាន់ក្នុងការផ្ដល់ចំណេះដឹងថ្មីៗជាច្រើនតាមរយៈអ្នកនិពន្ធ ដែលអាចជួយដល់ការសិក្សា និងការបំពេញការងារ។

និស្សិតឆ្នាំទី៣ ជំនាញគ្រប់គ្រងពាណិជ្ជកម្មអន្តរជាតិ នៃសាកលវិទ្យាល័យភូមិន្ទភ្នំពេញ រូបនេះ ក៏បានលើកទឹកចិត្តដល់យុវជនខ្មែរត្រូវចូលរួមអានសៀវភៅឱ្យបានច្រើន និងចែករំលែកចំណេះដឹងដែលបានមកពីការអានសៀវភៅ តាមរយៈការនិពន្ធស្នាដៃថ្មីៗឱ្យបានច្រើន។

លោក អ៊ុក ង៉ែត ប្រធានផ្នែករដ្ឋបាល នៃកំពង់ផែស្វាយយ័ត្នភ្នំពេញ មានប្រសាសន៍ថា ការដឹកនាំសៀវភៅជាច្រើនប្រភេទរបស់នាវាបណ្ណាល័យចល័ត Doulos Hope មកដល់ប្រទេសកម្ពុជា គឺជារឿងល្អប្រសើរមួយ ខណៈបច្ចុប្បន្នយុវជនក៏មានការចាប់អារម្មណ៍អានសៀវភៅច្រើន ហើយការដឹកនាំសៀវភៅមកក្នុងគោលបំណងចែករំលែកចំណេះដឹងមកក្នុងប្រទេសកម្ពុជា ពិតជាមានសារៈសំខាន់ចំពោះយុវវ័យ។

ប្រធានផ្នែករដ្ឋបាល នៃកំពង់ផែស្វាយយ័ត្នភ្នំពេញ បញ្ជាក់បន្ថែមថា លោកចង់ឱ្យយុវវ័យ ក៏ដូចជាប្រជាពលរដ្ឋទូទៅ ចាប់អារម្មណ៍ទៅលើការបើកឱកាសឱ្យនាវាបណ្ណាល័យចល័ត Doulos Hope មកដល់ប្រទេសកម្ពុជា ដើម្បីជំរុញការអាន ផ្ដល់ចំណេះដឹង រីកចម្រើនផ្នែកខួរក្បាល និងចង់ស្វែងយល់អ្វីដែលថ្មី។

គួរជម្រាបជូនថា ប្រជាពលរដ្ឋខ្មែរ អាចចូលរួមទស្សនានាវាបណ្ណាល័យចល័ត Doulos Hope ចាប់បីថ្ងៃទី៥ ដល់១៦ មិថុនា និងថ្ងៃទី២២ មិថុនា ដល់ថ្ងៃទី៤ កក្កដា ឆ្នាំ២០២៤ នៅចំណតផែពហុបំណង TS3 របស់កំពង់ផែស្វយ័តភ្នំពេញ ក្បែរគល់ស្ពានជ្រោយចង្វារ។ ក្នុងនោះ ការទស្សនាពិព័រណ៍ចាប់ពីថ្ងៃអង្គារដល់ថ្ងៃអាទិត្យចន្លោះម៉ោង ១២:៣០រសៀល ដល់ម៉ោង ៧:៣០យប់ ដោយសម្រាកនៅថ្ងៃចន្ទ៕