សមត្ថភាពប្រើប្រាស់ភាសាសម្រាប់កិច្ចសន្ទនា សរសេរ និងបង្ហាញពីគោលបំណងផ្សេងៗដោយប៉ិនប្រសប់របស់មនុស្សម្នាក់ៗ អាចកើតឡើងទៅបានអាស្រ័យដោយបុគ្គលនោះធ្លាប់ឆ្លងកាត់អំណាន ឬមានទម្លាប់អានសៀវភៅជាប្រចាំ ។ សមត្ថភាពប្រើប្រាស់ភាសាសន្ទនានេះ គឺសំដៅដល់ការប្រើប្រាស់ភាសាផ្លូវការនៅក្នុងការងារ និងទំនាក់ទំនងរបស់បុគ្គល ។ ថ្វីត្បិតការអានមិនផ្តល់លទ្ធផលភ្លាមៗក៏ពិតមែន ប៉ុន្តែគេអាចសម្គាល់បានយ៉ាងច្បាស់ថា អំណាននឹងហុចផលយ៉ាងច្រើនអនេកនៅក្នុងជីវភាពរស់នៅប្រចាំថ្ងៃ ព្រមទាំងជួយពង្រឹងសមត្ថភាពភាសាសន្ទនារបស់មនុស្សទៅថ្ងៃអនាគត ។

១. អំណានជួយបុគ្គលឱ្យយល់ពីរបៀបលើកដាក់សំឡេងក្នុងភាសា ៖ សំនៀង (សូរ) គ្រប់ភាសាទាំងអស់សុទ្ធសឹងតែមានលក្ខណៈពិសេសផ្សេងៗគ្នា រាល់ពេលបុគ្គលបញ្ចេញសំឡេងសន្ទនា ឬនិយាយ ។ បុគ្គលដែលអានសៀវភៅបានច្រើន នោះនឹងជួយឱ្យការសន្ទនារបស់គេកាន់តែមានភាពទាក់ទាញ មានអត្ថន័យស៊ីជម្រៅ ព្រមទាំងបង្កើតបរិយាកាសស្និទ្ធស្នាល ។ បុគ្គលអានច្រើនជួយឱ្យស្នៀងនៃភាសា ឬបែបបត់នៃការនិយាយមានភាពរស់រវ៉ើក ។

២. អំណានជួយបុគ្គលបញ្ចេញសំឡេងបានត្រឹមត្រូវ (Phonics) ៖ ពាក្យនីមួយៗនៅក្នុងភាសាអាចបញ្ចេញសំឡេងខុសគ្នា ឬបញ្ចេញសំឡេងប្រហាក់ប្រហែលគ្នា ។ ការបញ្ចេញសំឡេងឱ្យបានត្រឹមត្រូវនៅពេលសន្ទនាសំខាន់ណាស់ ព្រោះជួយឱ្យដៃគូសន្ទនាយល់កាន់តែច្បាស់ពីគោលបំណង ។ ជាក់ស្តែង ដូចជាភាសាអង្គគ្លេសជាដើម រាល់ការបញ្ចេញសំឡេង គឺអាចបញ្ជាក់ន័យនៃពាក្យដែលបានប្រើប្រាស់នោះ ។

៣. អំណានជួយឱ្យបុគ្គលចេះវាក្យសព្ទច្បាស់ (Vocabulary) ៖ អំណានជួយឱ្យបុគ្គលអាចយល់ពីអត្ថន័យពាក្យ ឬវាក្យសព្ទថ្មីៗនៅក្នុងសំណេរ ។ គេជឿជាក់ថា បុគ្គលម្នាក់ៗនឹងមិនមានពេលច្រើនអង្គុយអានពាក្យទាំងឡាយក្នុងវចនានុក្រមឡើយ ប៉ុន្តែតាមរយៈពាក្យដែលបានប្រទះនៅក្នុងទំព័រសៀវភៅកំពុងអាន នឹងជួយឱ្យបុគ្គលយល់ន័យនៃពាក្យបានលឿនរហ័ស ព្រមទាំងចងចាំពាក្យទាំងនោះដោយងាយបំផុត ។

៤. អំណានជួយឱ្យបុគ្គលអានស្ទាត់ជំនាញ (Fluency) ៖ បុគ្គលមិនមានទម្លាប់អាន ច្បាស់ជាជួបវិបត្តិអំណាន ។ អានបានតិចតួចនាំឱ្យលទ្ធភាពអានសំណេរកាន់តែលំបាក ។ ការលំបាកអំណាននេះ នៅត្រង់ថា អានមិនត្រូវតាមសូរសព្ទរបស់ពាក្យ អានមិនរួចរាល់ពេលជួបពាក្យពិបាក អានយឺតយ៉ាវ និងអានមិនមានភាពទាក់ទាញ ។ ប្រសិនបើបុគ្គលមានទម្លាប់អានច្រើន នោះលទ្ធភាពជួបការលំបាកផ្នែកអំណាននឹងមានតិចបំផុត ។ ភាពស្ទាត់ជំនាញផ្នែកអំណានជះឥទ្ធិពលដល់ការសរសេរសំណេរ (writing) និងការគិតដោយភាពឆ្លាតវៃរបស់បុគ្គល (critical thinking) ។

៥. អំណានជួយឱ្យបុគ្គលយល់សេចក្តីបានលឿនរហ័ស ៖ ថ្វីត្បិតមិនមានតួលេខបង្ហាញជាក់លាក់អំពីការគិតលឿនរហ័សកើតចេញពីផលនៃអំណាន ប៉ុន្តែតាមរយៈបទពិសោធន៍អានសៀវភៅ និងសកម្មភាពបំពេញការងារ គេអាចសន្និដ្ឋានបានថា បុគ្គលមាន ឬគ្មានបទពិសោធន៍អាន ។ អានបានច្រើន និងរក្សាទម្លាប់អានជាប្រចាំជួយឱ្យអ្នកអានយល់សេចក្តីព័ត៌មានបានលឿនរហ័ស៕