ភ្នំពេញ – កាយរឹទ្ធិជាតិកម្ពុជា នឹងរៀបចំការបោះជំរំកាយរឹទ្ធតាមរលកធាតុអាកាស និងប្រព័ន្ធអ៊ីនធឺណិត ២០២៣ (JOTA-JOTI ២០២៣) នៅខែតុលាខាងមុខ។ ជាមួយគ្នានេះ កាយរឹទ្ធិជាតិកម្ពុជាប្រកាស​បើកឱ្យចុះឈ្មោះជាសាធារណៈសម្រាប់តំណាងយុវជនកាយរឹទ្ធិឆ្នើមមកពីគ្រប់រាជធានី ខេត្តយ៉ាងតិច ២០រូប ដើម្បីមានឱកាសចូលរួម និងអភិវឌ្ឍសមត្ថភាព ចំណេះដឹងទៅលើគោលដៅអភិវឌ្ឍន៍ប្រកបដោយចីរភាព SDG បំណិន STEM ការធ្វើការងារជាក្រុម និងជាពិសេសចូលរួមសកម្មភាពប្រកួតប្រជែង ដើម្បីមានឱកាសទទួលបានបទពិសោធន៍ និង​វត្ថុអនុស្សាវរីយ៍ជាច្រើនពីកម្មវិធី។

លក្ខខណ្ឌនៃការជ្រើសរើស បេក្ខភាពដែលមានសិទ្ធិចូលរួម ត្រូវតែជាកាយរឹទ្ធិជំទង់ មានអាយុ ១៧ឆ្នាំឡើងទៅ ឬ កាយរឹទ្ធិរៀមច្បង។ អ្នកចូលរួមត្រូវមានពេលវេលាគ្រប់គ្រាន់ និងទំនួសខុសត្រូវសម្រាប់ការចូលរួមបោះជំរំ និងការប្រឡងប្រណាំង។ ក្រៅពីនេះ បេក្ខភាពដែលចូលរួមទាំងអស់ត្រូវមានកុំព្យូទ័រផ្ទាល់ខ្លួន ព្រមទាំងអាចអាន ស្ដាប់ និងសរសេរភាសាអង់គ្លេសបានល្អ។ ម្យ៉ាងទៀត កាយរឹទ្ធិទាំងពីរភេទ ត្រូវមានឧបនិស្ស័យនឹងជំនាញ STEM ការអប់រំបែបឌីជីថល មានសីលធម៌នៃការរស់នៅល្អ ចេះធ្វើការងារជាក្រុម គោរពពេលវេលា និងបទបញ្ជាផ្ទៃក្នុងជំរំ។

តំណាងកាយរឹទ្ធនៅទូទាំង ២៥រាជធានីខេត្ត ដែលមានចំណាប់អារម្មណ៍ចូលរួមកម្មវិធីនេះ អាចចុះឈ្មោះ ឬដាក់ពាក្យចូលរួម តាមរយៈប្រព័ន្ធអនឡាញ ដែលមានតំណភ្ជាប់ (https://me-qr.com/WKUnvaw5) របស់កាយរឹទ្ធិជាតិកម្ពុជា។

កាលបរិច្ឆេទនៃការទទួលចុះឈ្មោះចូលរួម ចាប់ពីថ្ងៃប្រកាសដំណឹងនេះ រហូតដល់ថ្ងៃទី ៣ ខែសីហា​ឆ្នាំ ២០២៣ វេលាម៉ោង ២៣:៥៩នាទី។

សម្រាប់ឆ្នាំ២០២៣ គណៈកម្មការពិភពលោក នៃ​ការបោះជំរំកាយរឹទ្ធិតាមរលកធាតុអាកាសលើកទី៦៦ និងប្រព័ន្ធអ៊ីនធឺណិតលើកទី២៧ (66^th JOTA-27^th JOTI) បានកំណត់យកថ្ងៃទី២១ ដល់២២ ខែតុលា ឆ្នាំ២០២៣ ជាកាលបរិច្ឆេទរៀបចំកម្មវិធីដំណាលគ្នា ជាមួយនឹងអង្គការពិភពលោកនៃចលនាកាយរឹទ្ធិ និងប្រទេសជាសមាជិកជុំវិញពិភពលោក ជាមួយនឹងមូលបទរួមគ្នាមួយ។

សូមជម្រាបជូនថា យុវជនកាយរឹទ្ធិចូលរួមកម្មវិធីនេះមានសរុបចំនួន ១០០នាក់(ស្រីយ៉ាងតិច ៥០​%) ដែលក្នុងនោះ ៨០នាក់ និងគ្រូដឹកនាំ ២នាក់នឹងត្រូវបញ្ជូនសមាសភាពក្នុងនាមបេក្ខភាពសម្ភាសន៍ដើម្បីចូលរួមមកពីមន្ទីរអប់រំ យុវជន និងកីឡារាជធានីភ្នំពេញ(៤០+១) និងខេត្តកណ្តាល(៤០+១)។ កាយរឹទ្ធិ ២០រូបផ្សេងទៀតនឹងត្រូវបានជ្រើសរើសជាសាធារណៈ ក្នុងន័យផ្តល់ឱកាសឱ្យតំណាងកាយរឹទ្ធិមកពី ២៥ រាជធានី ខេត្ត មានឱកាសសិក្សារៀនសូត្រ ផ្តួចផ្តើមគំនិតដើម្បីរៀបចំគម្រោង បណ្តុះជំនាញថ្មីតាមរយៈការចូលរួមក្នុងកិច្ចពិភាក្សា ការសង្កេត និងសកម្មភាពផ្សេងៗទៀត៕