មនុស្ស​ដែលមានអាការៈដូចជា តានតឹងចិត្តច្រើន, មានអារម្មណ៍​ដូចជាស្រូប​ដង្ហើម​មិន​បានគ្រប់គ្រាន់, មិនបាក​ក្នុងការ​គេង, មិនអាចឈប់គិតពីរឿង​ដែល​បារម្ភអ្វីមួយ ឬ​មានអារម្មណ៍ថា នឹងមានអ្វីមួយអាក្រក់នឹងកើតឡើង គឺជា​អាការៈ នៃជំងឺថប់បារម្ភ។ ការសម្រាលអាការៈថប់បារម្ភឱ្យសះស្បើយ ដោយកាត់បន្ថយ​ពីការប្រើប្រាស់ឱសថ គឺគេអាចធ្វើតាមរយៈវិធីសាស្រ្តដូចជា ធ្វើ​ឱ្យ​រាងកាយទទួលបានឱកាសចលនាច្រើន ទៅកន្លែងដែលមានបរិយាកាសធម្មជាតិ និងចូលរួមជាមួយសហគមន៍ជាដើម។

តាមរយៈគេហទំព័រ mindbodygreen បានលម្អិតជូនបន្ថែមដូចខាងក្រោមនេះ ៖

១. ចលនារាងកាយ ៖ ការធ្វើលំហាត់ប្រាណ ឬក៏ការធ្វើចលនារាងកាយក្នុងលក្ខខណ្ឌនេះ មិនសំដៅលើ ទាល់តែចូលជាសមាជិក នៃក្លឹបហាត់ប្រាណណាមួយនោះទេ ប៉ុន្តែជាការធ្វើឱ្យរាងកាយ បានធ្វើសកម្មភាពនានា ក៏ដូចជាការបញ្ចេញញើសពីរាងកាយ។ មានមនុស្សជាច្រើនពិបាកក្នុងការរក្សាទម្លាប់រាងកាយឱ្យមានភាពសកម្ម ជាពិសេសចំពោះក្រុមមនុស្សមិនទាន់រកឃើញភាពរីករាយ ក្នុងការអនុវត្តទម្លាប់លំហាត់ប្រាណជាប្រចាំ។ ស្ថិតក្នុងករណីធុញទ្រាន់ចំពោះសកម្មភាពទាំងនេះ អ្វីដែលគួរអនុវត្តន៍បន្ត គឺ ព្យាយាមសាកល្បងលំហាត់ប្រាណចម្រុះគ្នាដូចជា លើករបស់ធ្ងន់ៗ (លើកដុំដែក) ការរត់ប្រណាំងហែលទឹក ជិះកង់ រត់ដើម្បីផ្សារភ្ជាប់ទំនាក់ទនងរវាងគ្នានឹងគ្នា ឬក៏សកម្មភាពណាក៏ដោយ ឱ្យតែស្របនឹងស្ថានភាពជាក់ស្ដែង ហើយអាចប្រយុទ្ធប្រឈមនឹងស្ថានការណ៍ថ្មីៗបាន។

ត្បិតថា ការធ្វើចលនារាងកាយគឺជាឱសថក្នុងការកាត់បន្ថយអាការៈថប់បារម្ភបានមួយចំណែក ប៉ុន្តែមិនមែនបានន័យថា អ្នកត្រូវបង្ខំចិត្តខ្លួនឯងឱ្យធ្វើសកម្មភាពដែលមិនចូលចិត្តនោះទេ។ ការធ្វើចលនា ឬហាត់ប្រាណប្រចាំថ្ងៃត្រូវតែផ្សារភ្ជាប់ជាមួយសកម្មភាពដែលអាចធ្វើបាន ឬសកម្មភាពដែលខ្លួនចូលចិត្ត ទើបអាចធ្វើឱ្យទម្លាប់នៃការធ្វើចលនាមានភាពទៀងទាត់។

២. ធម្មជាតិ ៖ មនុស្សស្ទើរតែគ្រប់គ្នាសុទ្ធតែបានដឹងថា ការនៅជាមួយនឹងធម្មជាតិជះឥទ្ធិពលវិជ្ជមានទៅកាន់សុខភាពផ្លូវចិត្ត​ ប៉ុន្តែការជជែកឱ្យស៊ីជម្រៅទាក់ទិននឹងអត្ថប្រយោជន៍នៃធម្មជាតិបៃតង ការគយគន់ ឬក៏ហាត់កីឡានៅកន្លែងធម្មជាតិហាក់មិនទាន់ទូលាយនៅឡើយ ។ បរិយាកាសធម្មជាតិពេលខ្លះបានបង្ខំឱ្យអារម្មណ៍ស្ងប់ដោយឯកឯង ដូចជាការហែលទឹកសមុទ្រ គឺបានផ្តល់អារម្មណ៍ស្រស់ស្រាយដោយស្វ័យប្រវត្ត ហើយធម្មជាតិជាឱសថបន្ថយអាការៈថប់បារម្ភ។ ធម្មជាតិ មិនត្រឹមតែរួមចំណែកដល់ការពង្រឹងសុខភាពផ្លូវចិត្តប៉ុណ្ណោះទេ ទន្ទឹមគ្នានោះ ធម្មជាតិ បានធ្វើឱ្យមនុស្សមានភាពស្និទ្ធស្នាលជាមួយបរិយាកាសខាងក្រៅបន្ថែម រួមទាំងជួយរក្សាជីវិតឱ្យមានអាយុយឺនយូរ។

៣. ការចូលរួមក្នុងសហគមន៍ ៖ រាល់ការជជែកពិភាក្សាអំពីការរស់នៅមានអាយុកាលយូរអង្វែង គេពុំដែលមើលរំលងអំពីការផ្សារភ្ជាប់ទំនាក់ទំនង ឬការចូលរួមក្នុងសហគមន៍នោះទេ។ ទំនាក់ទំនងក្នុងសង្គមរឹងមាំ ជំរុញឱ្យមនុស្សទទួលបានសុខុដុមរមនាក្នុងការរស់នៅ បង្កើនបញ្ញាស្មារតី ចំណូល និងការសង្កេតតាមដានរាល់ជំនាន់នីមួយៗ។ នៅក្នុងសង្គមមួយចំនួន បានឱ្យតម្លៃខ្ពស់ ទៅលើគុណភាពនៃទំនាក់ទំនង និងការពង្រឹងសកម្មភាពឱ្យបានច្រើនចម្រុះក្នុងសហគមន៍ ដែលធ្វើយ៉ាងណាឱ្យប្រជាជនរស់នៅក្នុងតំបន់នីមួយៗ មានកិច្ចសន្ទនាទៅវិញ ទៅមក៕