ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ភ្នំពេញ- ក្រោយលទ្ធផលបាក់ឌុបបានប្រកាសចប់រួចរាល់ សិស្សានុសិស្សដែលប្រឡងធ្លាក់អាចកំពុងពិបាកចិត្ត មានអារម្មណ៍មិនសូវសប្បាយចិត្ត ខូចចិត្ត និងពិបាកទទួលយក នៅពេលធ្វើអ្វីមួយមិន សម្រេចដូចអ្វីដែលខ្លួនគិត ។ យ៉ាងណាក៏ដោយការប្រឡងតែងតែមានធ្លាក់ និងជាប់ ដូច្នេះសិស្សដែលប្រឡងធ្លាក់ គឺពង្រឹងស្មារតីឡើងវិញ ហើយត្រូវចាប់ផ្ដើមរៀបចំផែនការ និងរៀបចំគោលដៅបន្តទៅមុខទៀត ។ ដូច្នេះ តើសិស្សដែលធ្លាក់បាក់ឌុបគួររៀនមួយឆ្នាំទៀត ឬរៀនថ្នាក់បរិញ្ញាប័ត្ររង?
សម្រាប់សំណួរនេះ លោក ភាព សុភ័ក ជាអតីតសិស្សនិទ្ទេស A ឆ្នាំ២០១៨ និងជានិស្សិតឆ្នាំទី៤ ផ្នែកអក្សរសាស្រ្តអង់គ្លេសនៅសាកលវិទ្យាល័យកម្ពុជា និងសិក្សាជំនាញពាណិជ្ជកម្ម នៅវិទ្យាស្ថានស៊ីអ៊ីអូ បាននិយាយថា ចំពោះសិស្សប្រឡងធ្លាក់បាក់ឌុបជម្រើសទី១.រៀនឡើងវិញមួយឆ្នាំទៀត, តើនៅពេលណាដែលយើងគួរតែរៀនឡើងវិញ? អ្នកដែលរៀនឡើងវិញ គឺជាមនុស្សដែលមានគោលដៅជាក់លាក់ និងត្រូវការសញ្ញាបត្របាក់ឌុប។
អតីតសិស្សនិទ្ទេស A ឆ្នាំ២០១៨ រូបនេះ បន្ថែមថា សម្រាប់សិស្សដែលរៀនឡើងវិញ ដោយសារគាត់មានក្ដីស្រមៃធំ គឺចាំបាច់ត្រូវមានសញ្ញាបត្របាក់ឌុប ដើម្បីទៅរៀននៅសាកលវិទ្យាល័យដែលចង់រៀន បន្តការសិក្សាក្រៅប្រទេស ឬប្រឡងយកអាហារូបករណ៍ក្រៅប្រទេស។ លើសពីនេះ សញ្ញាបត្របាក់ឌុបសំខាន់សម្រាប់សិស្សដែលចង់ចូលធ្វើការងាររដ្ឋដូចជា ការប្រឡងគ្រូ ឬធ្វើការតាមក្រសួងនានាដែលពាក់ព័ន្ធការងាររដ្ឋ។
លោក ភាព សុភ័ក បន្តថា ប្រសិនសិស្សានុសិស្សចង់រៀនមួយឆ្នាំទៀត ត្រូវដាក់គោលដៅ ដាក់ចិត្ត ដាក់កាយ ជាពិសេសការកែប្រែទម្លាប់ចាស់របស់ខ្លួនកន្លងមក ព្រោះមានសិស្សជាច្រើនដែលអាចធ្វើបានទោះបីជាពួកគាត់ធ្លាប់ប្រឡងធ្លាក់មួយឆ្នាំហើយក៏ដោយ គឺគាត់ដាក់ចិត្តដាក់កាយ ហើយរៀនមួយឆ្នាំទៀតរហូតទទួលបាននិទ្ទេសល្អ។
លោក ភាព សុភ័ក ជាអតីតសិស្សនិទ្ទេស A ឆ្នាំ២០១៨
“ខ្ញុំជឿជាក់ថា អ្នកដែលចង់រៀនមួយឆ្នាំទៀតអ្នកទាំងអស់គ្នាប្រាកដជាអាចធ្វើបាន។ យើងបរាជ័យមួយលើកវាជាបទពិសោធន៍ និងជាអ្វីមួយដែលយើងអាចរៀនសូត្រពីកំហុសកន្លងមកដែលយើងបានធ្វើ ហើយយើងនឹងអភិវឌ្ឍខ្លួនឯងឱ្យកាន់តែប្រសើរ”
តើអ្វីជាថ្នាក់បរិញ្ញាបត្ររង? ឆ្លើយនឹងសំណួរដែរនេះ លោក ភាព សុភ័ក និយាយថា ថ្នាក់បរិញ្ញាបត្ររង ជាកម្មវិធីសិក្សារយៈពេល២ឆ្នាំនៅសាកលវិទ្យាល័យដោយសិស្សប្រឡងធ្លាក់បាក់ឌុបក៏អាចរៀនបាន។ បន្ទាប់ពីរៀនថ្នាក់បរិញ្ញាបត្ររងបានរយៈពេល២ឆ្នាំ សិស្សានុសិស្សអាចរៀនបន្តថ្នាក់បរិញ្ញាបត្របាន រយៈពេល២ឆ្នាំបន្ថែមទៀត នឹងអាចបញ្ចប់ថ្នាក់បរិញ្ញាបត្រដោយយជោគជ័យ។
លោក ភាព សុភ័ក ជាអតីតសិស្សនិទ្ទេស A ឆ្នាំ២០១៨
“ប្រសិនបើសិស្សានុសិស្សគ្រាន់តែមានបំណងរៀនដើម្បីបានការងារធ្វើតាមក្រុមហ៊ុនឯកជន ឬអង្គការនានា គឺអាចរៀនបន្តថ្នាក់បរិញ្ញាបត្ររងបាន ឱ្យតែរៀនចេះ មានជំនាញច្បាស់ គឺមិនខ្វះការងារធ្វើនោះទេ”
អតីតសិស្សនិទ្ទេស A ឆ្នាំ២០១៨ រូបនេះ បញ្ជាក់បន្ថែមថា សិស្សានុសិស្សក៏អាចរៀនថ្នាក់បរិញ្ញាបត្ររងបណ្ដើរ អាចដាក់ស្វ័យរិន ហើយដល់ឆ្នាំប្រឡងទៅប្រឡងជាមួយសិស្សដទៃទៀត។ លើសពីនេះ នៅពេលដាក់ស្វ័យរិនយើងមានពេលវេលាដើម្បីត្រៀម ឆ្លៀតពេលតាំងពីដើមឆ្នាំបន្តិចបន្តួច បែងចែកពេលវេលាដើម្បីមើលមេរៀន នោះសិស្សានុសិស្សនឹងប្រឡងទទួលបាននិទ្ទេសល្អ។ ប្រសិនបើសិស្សានុសិស្សប្រឡងជាប់ នោះនឹងបានចូលរៀនថ្នាក់បរិញ្ញាបត្រតែម្ដង។ លោក ភាព សុភ័ក បន្តថា ការសម្រេចចិត្តរៀនឡើងវិញមួយឆ្នាំទៀត ឬរៀនថ្នាក់បរិញ្ញាបត្ររង គឺអាស្រ័យលើយុវជនទាំងអស់គ្នា ហើយសង្ឃឹមថាសិស្សដែលធ្លាក់បាក់ឌុប នៅតែមានគោលដៅបន្តទៅមុខទៀត ពីព្រោះការប្រឡងបាក់ឌុបមិនមែនជាចុងបញ្ចប់នៃជីវិតរបស់យើង ព្រោះអនាគតរបស់យើងនៅវែងឆ្ងាយទៀត៕
