បុគ្គលដែលប្រកាន់គោលការណ៍គោរពវិន័យខ្ជាប់ខ្ជួន (Self-Discipline) គឺជាបុគ្គលពឹងផ្អែកលើទេពកោសល្យ និងសំណាងតិចបំផុត ដើម្បីសម្រេចភាពជោគជ័យក្នុងជីវិត។ ពួកគេអាចបង្កើតទេពកោសល្យ និងសំណាងដោយខ្លួនឯង។ ប៉ុន្តែការអភិវឌ្ឍគោលការណ៍គោរពវិន័យខ្ជាប់ខ្ជួន (Self-Discipline) ប្រៀបដូចជាការហ្វឹកហាត់ពង្រឹងសាច់ដុំដែរ។ ប្រសិនបើអ្នកគោរពគោលការណ៍នេះបានតិចតួចនៅថ្ងៃនេះ អ្នកមិនអាចគោរពបានខ្ជាប់ខ្ជួនភ្លាមៗនៅថ្ងៃស្អែកនោះទេ។ អ្នកត្រូវការពេលវេលា ដើម្បីកសាងវាបន្តិចម្ដងៗរហូតទាល់តែក្លាយជាទម្លាប់។

យោងតាមលោក Gregg Swanson ដែលជាអ្នកជំនាញផ្នែក ពង្រឹងផ្លូវចិត្ត (Mental Performance) បានណែនាំ គន្លឺះចំនួន ៦ សម្រាប់អនុវត្ត និងពង្រឹងវិន័យលើខ្លួនឯងឱ្យកាន់តែប្រសើរឡើង៖

១. គិតចង់ធ្វើរឿងអ្វីមួយត្រូវធ្វើភ្លាមៗ ៖ យើងទាំងអស់គ្នាសុទ្ធតែមានអារម្មណ៍ពន្យារពេលរហូតទាល់តែមានអារម្មណ៍ថាចង់ធ្វើកិច្ចការអ្វីមួយ។ ទម្លាប់នេះគឺផ្ទុយស្រឡះពីគោលការណ៍គោរពវិន័យ (Self-Discipline) ព្រោះគោលកាណ៍នេះ គឺតម្រូវឱ្យធ្វើអ្វីដែលត្រូវធ្វើភ្លាមៗ និងឱ្យបានរួចរាល់ បើទោះជាអ្នកមានអារម្មណ៍ថាមិនចង់ធ្វើ ឬមិនចូលចិត្តធ្វើក៏ដោយ។

២. ចាប់ផ្ដើមពីការធ្វើរឿងតូចៗ ៖ ប្រសិនបើលទ្ធភាពគ្រប់គ្រងខ្លួនឯងរបស់អ្នកនៅមានកម្រិតទាប អ្នកអាចចាប់ផ្ដើមដោយធ្វើរឿងតូចៗ និងសាមញ្ញ។ ដូចជា ជំនួសឱ្យការអានសៀវភៅ ១០ទំព័រក្នុងមួយថ្ងៃ មកជាអាន ១ទំព័រក្នុងមួយថ្ងៃ ឬក៏ជំនួសឱ្យការចាប់ផ្ដើមទម្លាប់ហាត់ប្រាណ ៣០ នាទីក្នុងមួយថ្ងៃ ចូរចាប់ផ្តើមជាមួយ ៥ នាទីជាមុនសិន។

៣. ធ្វើកិច្ចការឱ្យចប់ចុងចប់ដើម ៖ យើងគ្រប់គ្នាមានទំនោរចង់ផ្អាកធ្វើកិច្ចការ ដែលធ្វើឱ្យយើងមានអារម្មណ៍មិនសប្បាយចិត្តនៅពាក់កណ្ដាលទី។ ជាក់ស្ដែង ដូចជា នៅពេលដែលរៀបចំផ្ទះ សម្អាតបាន៩០ភាគរយទៅហើយ ប៉ុន្តែចុងក្រោយទុក ១០ភាគរយទៀតរហូតដល់សប្ដាហ៍ក្រោយទើបបញ្ចប់ ឬមិនធ្វើតែម្ដង ប្រសិនបើមិនចាំបាច់។ ទម្លាប់បំពេញកិច្ចការអ្វីមួយឱ្យបានចប់ចុងចប់ដើម នឹងធ្វើឱ្យយើងសប្បាយចិត្ត ហើយក្រោយពីអនុវត្តបានច្រើនដង វានឹងក្លាយជាទម្លាប់មួយ ដែលល្អសម្រាប់ជីវិត។

៤. លត់ដំខ្លួនឯងឱ្យបន្តធ្វើការ បើទោះជាមិនសប្បាយចិត្ត ៖ រលកអារម្មណ៍ គឺឡើងចុះមិនស្ថិតស្ថេរនោះទេ។ ដូច្នេះយើងមិនអាចបំពេញភារកិច្ចអ្វីមួយដោយផ្អែកលើអារម្មណ៍ឡើយ ព្រោះវាអាចធ្វើឱ្យរាំងស្ទះកិច្ចការ។ ជំនួសឱ្យការខ្វល់ពីអារម្មណ៍ យើងត្រូវទទួលស្គាល់ថា ពេលនេះយើងពិតជាមិនសប្បាយចិត្ត មានអារម្មណ៍មិនល្អ ប៉ុន្តែក៏ត្រូវទទួលស្គាល់ដែរថា អារម្មណ៍នេះនឹងបាត់ទៅវិញនៅពេលណាមួយ ខណៈឥឡូវនេះយើងមានកិច្ចការដែលត្រូវធ្វើ ដូច្នេះត្រូវតែធ្វើ។

៥. បង្កើតសម្ពាធឱ្យខ្លួនឯង ដោយកំណត់ពេលវេលាសិប្បនិម្មិត ៖ ការកំណត់ពេលវេលាសិប្បនិម្មិត សម្រាប់ខ្លួនឯងនៅពេលធ្វើការ អាចជួយយើងឱ្យទាញប្រយោជន៍ពីពេលវេលានេះបានច្រើន និងបំពេញការងារបានរហ័សជាងមុន។ ព្រោះសម្ពាធពេលវេលាមានប្រសិទ្ធភាពណាស់ ក្នុងការជំរុញ និងជួយមនុស្សឱ្យផ្ដោតអារម្មណ៍បានល្អ។

៦. ចំណាយពេលខ្លះសម្រាក ៖ ការសិក្សាភាគច្រើនបានរកឃើញថា​ ការចំណាយពេល ១០នាទីសម្រាក រាល់រៀងម៉ោងអាចបង្កើនផលិតភាពការងាររបស់យើង។ ដូច្នេះយើងអាចប្រើពេលសម្រាកនេះ ដើម្បីពិសារទឹក ឬធ្វើសកម្មភាពរាងកាយជាដើម។ យ៉ាងណាក៏ដោយ អំឡុងពេលសម្រាកមិនគួរមើលវីដេអូ ឬកម្មវិធីអ្វីកម្សាន្តអ្វីមួយ ដែលធ្វើឱ្យអ្នកជក់ចិត្ត រហូតបែកអារម្មណ៍ពីការងារនោះទេ ព្រោះសកម្មភាពនេះអាចពន្យារពេលសម្រាកដែលអ្នកបានកំណត់៕