មនុស្សតែងមានការផ្សារភ្ជាប់ទំនាក់ទំនងជាមួយអ្នកជុំវិញខ្លួន ព្រោះវាបានផ្តល់នូវអារម្មណ៍គាំទ្រគ្នាទៅវិញទៅមក។ តែយ៉ាងណា ការមានទំនាក់ទំនងល្អជាមួយខ្លួនឯង ក៏ជាចំណែកមួយពុំអាចខ្វះបានក្នុងការឆ្លុះបញ្ចាំងអំពីភាពលូតលាស់ផ្ទាល់ខ្លួនដែរ។ ការនៅម្នាក់ឯងហើយមានសកម្មភាពជាក់លាក់ក្នុងការអនុវត្តបានផ្តល់នូវភាពវិជ្ជមានជាច្រើន ដោយសកម្មភាពទាំងនោះមានដូចជា ទៅមើលកុន ដើរកម្សាន្ត ញ៉ាំអាហារនៅខាងក្រៅ ចំណាយពេលនៅផ្ទះ និងការចាប់ផ្តើមសកម្មភាពដែលស្ថិតក្នុងចំណូលចិត្តផ្ទាល់ខ្លួន។ ការមានទំនាក់ទំនងជាមួយខ្លួនឯង គឺជាដើមចមនាំឱ្យយើង​មាន​សុខភាព​ផ្លូវ​ចិត្ត​ល្អ​ប្រសើរ​ជាង​មុន មានសមត្ថភាពគ្រប់គ្រាន់ក្នុងការប្រឈមនឹង​ភាព​តានតឹង និងដឹងពីរបៀបថែទាំខ្លួនឯង។

តាមរយៈគេហទំព័រ The Ipaper បានបង្ហាញសកម្មភាពដែលមានប្រសិទ្ធភាព៥ចំណុច គួរធ្វើពេលនៅម្នាក់ឯង ដើម្បីជំរុញសុខភាពផ្លូវចិត្តឱ្យកាន់តែរឹងមាំ។

១. ទៅមើលភាពយន្ត ៖ ធ្លាប់មើលកុនម្នាក់ឯងទេ? ចំពោះអ្នកទម្លាប់ដើរមានគ្នា ការទៅមើលកុនម្នាក់ឯងពុំមែនជាសកម្មភាពគួរឱ្យរីករាយពេកទេ យ៉ាងណាវាជាការអនុវត្តមួយដែលផ្តល់នូវមេរៀនជីវិត។ ភាពក្លាហានក្នុងការដើរហើរ និងជាពេលនាំឱ្យស្គាល់អ្វីទៅជាប្រភេទរឿងស្ថិតនៅក្នុងចំណង់ចំណូលចិត្ត មានភាពម្ចាស់ការដើម្បីទិញសំបុត្រ និងការជ្រើសទីតាំងដែលស្របនឹងតម្រូវការផ្ទាល់ខ្លួន កត្តាទាំងនេះកាន់តែធ្វើឱ្យស្គាល់ខ្លួនឯងច្រើនជាងមុន ហើយផ្តល់ភាពងាយស្រួលក្នុងការសម្រេចចិត្តជ្រើសរើសអ្វីមួយដែលជារបស់ខ្លួនឯង។

២. ចេញក្រៅផ្ទះ ឬដើរកម្សាន្ត ៖ មិនថាឆ្ងាយ ឬជិតទេ ការចេញក្រៅផ្ទះ ឬការដើរកម្សាន្តម្នាក់ឯង តែងផ្តល់អត្ថប្រយោជន៍លើសពីភាពរីករាយ ដូចជាការស្គាល់កន្លែងថ្មីៗ ដឹងពីវប្បធម៌ចម្រុះ បង្កើតអនុស្សាវរីយ៍ បង្កើនភាពបត់បែន ការសម្របខ្លួន ដែលជារួមគឺការដើរទៅក្រៅពុំមែនគ្រាន់តែជាការកម្សាន្តទេ ប៉ុន្តែជាការវិនិយោគចំពោះបទពិសោធន៍ជីវិត។ បន្ថែមពីនោះ ការចេញក្រៅ គឺជាឱកាសជួបមនុស្សថ្មីៗ ផ្លាស់ប្តូរបទពិសោធន៍ជាមួយមនុស្សដែលមានសក្តានុពលខុសៗគ្នា ក៏ដូចជាជំនាញក្នុងការយល់ពីអ្នកដទៃផងដែរ។

៣. ទទួលទានអាហារក្រៅផ្ទះ ៖ នៅក្នុងបរិបទខ្លះ ផ្នត់គំនិតសង្គមបានដាក់សម្ពាធទៅកាន់ក្រុមមនុស្សដែលចេញទៅបរិភោគខាងក្រៅថា ជាក្រុមមនុស្សឯកោ ទាំងដែលកាពិតជាក់ស្ដែងការទទួលទានម្នាក់ឯង ឬទទួលទានមានគ្នា សុទ្ធសឹងតែជាជម្រើសរបស់មនុស្សម្នាក់ៗ។ កាលដែលមានឱកាសទទួលទានអាហារម្នាក់ឯង ជាកត្តានាំឱ្យមានពេលវេលាគ្រប់គ្រាន់ក្នុងការសង្កេតបរិយាកាសជុំវិញខ្លួន ជាឱកាសក្នុងការទៅទីកន្លែងដែលខ្លួនពេញចិត្ត កាត់បន្ថយភាពក្រែងចិត្តពីសំណាក់អ្នកដទៃ និងជាពេលវេលាមួយក្នុងការស្វែងរកចំណង់ចំណូលចិត្តមុខម្ហូបផ្ទាល់ខ្លួន។​

៤. ចំណាយពេលនៅផ្ទះ ៖ ​ការរស់នៅប្រចាំថ្ងៃ ពោរពេញទៅដោយការរំខានពីមជ្ឈដ្ឋានចម្រុះ ដែលតម្រូវឱ្យត្រូវចំណាយពេលខ្លះនៅកន្លែងមួយដែលមានភាពស្ងប់ស្ងាត់ ហើយទីតាំងដែលមានសុវត្ថិភាព និងជាស្ងប់បំផុតគឺផ្ទះ ឬទីស្នាក់អាស្រ័យផ្ទាល់ខ្លួនតែម្តង។ ការផ្តល់ឱកាសឱ្យខ្លួនឯងសម្រាកនៅផ្ទះពេញមួយថ្ងៃ បាននាំឱ្យស្មារតីមានការផ្តោត និងផ្ចង់ជាមួយខ្លួនឯងខ្ពស់ជាងមុន។

៥. បង្កើតសកម្មភាពបន្ថែម ៖ មានសកម្មភាពច្រើន ដើម្បីធ្វើឱ្យរាងកាយកាន់តែរវល់ ដែលជាចំណែកមួយជួយឱ្យស្ថិតនៅក្នុងបច្ចុប្បន្នភាព ហើយដើម្បីឱ្យការចំណាយពេលម្នាក់ឯងកាន់តែមានប្រសិទ្ធភាពបន្ថែម គប្បីធ្វើសកម្មភាពដែលជាចំណូលចិត្តផ្ទាល់ខ្លួន ទោះវាមិនផ្តល់ជាចំណូលភ្លាមៗ ឬវាមិនពាក់ព័ន្ធនឹងការងារស្នូលក៏ដោយ។ ការមានពេលខ្លះធ្វើសកម្មភាពឆ្លើយតបនឹងចំណង់ផ្ទាល់ខ្លួន ជាការបំពេញបន្ថែមនូវសុភមង្គល ក៏ដូចជាការបង្កើនភាពច្នៃប្រតិដ្ឋបន្ថែមទៅក្នុងការងារនិងការសិក្សា៕