ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
នៅសល់តែ ៤ថ្ងៃទៀតប៉ុណ្ណោះ ការប្រឡងសញ្ញាបត្រមធ្យមសិក្សាទុតិយភូមិ (បាក់ឌុប) ឆ្នាំ២០២៦ នឹងចាប់ផ្តើម។ ឧបនាយករដ្ឋមន្ត្រី និងរដ្ឋមន្ត្រីក្រសួងអប់រំ យុវជន និងកីឡា ឯកឧត្តម ហង់ ជួនណារ៉ុន បានព្រមានថា បុគ្គលណាដែលពាក់ព័ន្ធនឹងការបែកធ្លាយប្រធានវិញ្ញាសាប្រឡង នឹងប្រឈមមុខនឹងវិធានការវិន័យយ៉ាងតឹងរ៉ឹង ហើយក្នុងករណីធ្ងន់ធ្ងរ អាចឈានដល់ការបណ្តេញចេញពីក្របខណ្ឌរដ្ឋ។
ការលើកឡើងនេះ ធ្វើឡើងក្នុងសន្និសីទសារព័ត៌មានស្តីពីដំណើរការប្រឡងសញ្ញាបត្រមធ្យមសិក្សាទុតិយភូមិ (បាក់ឌុប) សម័យប្រឡងថ្ងៃទី១០-១១ ខែសីហា ឆ្នាំ២០២៦ ដែលរៀបចំឡើងនៅរសៀលថ្ងៃទី៦ ខែសីហា ឆ្នាំ២០២៦ នៅទីស្តីការក្រសួងអប់រំ យុវជន និងកីឡា។
ឯកឧត្តម ហង់ ជួនណារ៉ុន មានប្រសាសន៍ថា ក្រសួងមិនអនុញ្ញាតឱ្យមានការថត ចម្លង បង្ហោះ ឬផ្សព្វផ្សាយប្រធានវិញ្ញាសាប្រឡង មុន និងអំឡុងពេលដំណើរការប្រឡងឡើយ។ ការបង្ហោះអាចធ្វើបាន លុះត្រាតែការប្រឡងត្រូវបានបញ្ចប់ជាស្ថាពរ។ អ្នកដែលរំលោភបំពាននឹងត្រូវទទួលទោសតាមវិធានការរដ្ឋបាល ហើយបើករណីមានលក្ខណៈធ្ងន់ធ្ងរ ក្រសួងនឹងពិចារណាបណ្តេញចេញពីក្របខណ្ឌរដ្ឋ។
អ្នកដែលរំលោភលើបទប្បញ្ញត្តិនេះ នឹងទទួលទោសយ៉ាងតឹងរ៉ឹង ចាប់ពីការបញ្ឈប់ការងារ ទោសវិន័យផ្នែករដ្ឋបាល ហើយបើធ្ងន់ធ្ងរ អាចឈានដល់ការបណ្តេញចេញពីក្របខណ្ឌ យើងនឹងអនុវត្តវិធានការនេះឱ្យបានម៉ឺងម៉ាត់មិនឲ្យដូចឆ្នាំមុន ខ្ញុំខឹង !
ឯកឧត្តមក៏បានរំលឹកថា កាលពីឆ្នាំមុន មានករណីបង្ហោះប្រធានវិញ្ញាសានៅលើបណ្តាញសង្គម ដែលធ្វើឱ្យសាធារណជនមានការភាន់ច្រឡំ និងប៉ះពាល់ដល់ភាពជឿជាក់លើដំណើរការប្រឡង។
ឯកឧត្តមបានបញ្ជាក់ថា ដោយសារតែករណីនេះ ក្រសួងបានពង្រឹងការត្រួតពិនិត្យ និងសហការជាមួយអង្គភាពប្រឆាំងអំពើពុករលួយ (ACU) ដើម្បីធានាឱ្យការប្រឡងប្រព្រឹត្តទៅដោយយុត្តិធម៌ តម្លាភាព និងគ្មានការបែកធ្លាយប្រធានវិញ្ញាសា។
ជាមួយគ្នានេះ លោកបណ្ឌិត យ៉ង់ ពៅ អគ្គលេខាធិការនៃរាជបណ្ឌិត្យសភាកម្ពុជា បានប្រាប់ AMS ថា លោកអំពាវនាវឱ្យគ្រប់ភាគីពាក់ព័ន្ធទាំងអស់ចូលរួមទប់ស្កាត់ការបែកធ្លាយប្រធានវិញ្ញាសាប្រឡង ដើម្បីគាំទ្រដល់ដំណើរការកំណែទម្រង់វិស័យអប់រំ និងរក្សាសុចរិតភាពនៃការប្រឡង។
សូមជម្រាបថា ការប្រឡងសញ្ញាបត្រមធ្យមសិក្សាទុតិយភូមិ ឆ្នាំ២០២៦ នឹងប្រព្រឹត្តទៅនៅថ្ងៃទី១០ និងទី១១ ខែសីហា ឆ្នាំ២០២៦ ដោយមានបេក្ខជនចុះឈ្មោះប្រឡងសរុប ១៥១,២៣៨នាក់។ ក្រសួងបានរៀបចំមណ្ឌលប្រឡងសរុប ២៤៤មណ្ឌល ស្មើនឹង ៦,២០៧បន្ទប់ប្រឡង។
ក្រសួងអប់រំ យុវជន និងកីឡា ក៏បានបញ្ជាក់ថា បុគ្គលណាដែលប្រព្រឹត្តល្មើសនឹងការហាមឃាត់ ដោយថត ចម្លង បង្ហោះ ឬផ្សព្វផ្សាយប្រធានវិញ្ញាសា អត្រាកំណែ សន្លឹកកិច្ចការបេក្ខជន ឬសន្លឹកសម្រង់ពិន្ទុនៃការប្រឡង នឹងត្រូវទទួលខុសត្រូវចំពោះមុខច្បាប់ វិធានការវិន័យ និងបទប្បញ្ញត្តិជាធរមាន៕
