ភ្នំពេញ – ដើម្បីបណ្តុះ និងពង្រឹងស្មារតីស្នេហាជាតិឱ្យកាន់តែខ្លាំងក្លា ព្រមទាំងចូលរួមអភិរក្ស និងលើកកម្ពស់វប្បធម៌ជាតិខ្មែរឱ្យបានគង់វង្ស និងរីកចម្រើនថែមទៀតកាលពីថ្ងៃទី១៥ ខែមីនា ឆ្នាំ​២០២៣ ក្រសួងអប់រំ យុវជន និ​ងកីឡា បានចេញសេចក្តីណែនាំចំនួន៨ចំណុច ទៅ​ដល់​គ្រប់គ្រឹះស្ថានសិក្សា​ទាំង​សាធារណៈ និង​ឯកជន ក្នុងការពង្រឹង និង​លើក​កម្ពស់ការ​សិក្សា​វប្បធម៌-អរិយធម៌ខ្មែរ។

ខាងក្រោមនេះជាសេចក្ដីណែនាំ៨ចំណុចដែលចេញផ្សាយ​ដោយ​ក្រសួងអប់រំ យុវជន និង​កីឡា ៖

ទី១- គ្រឹះស្ថានសិក្សាសាធារណៈ និងឯកជនទាំងអស់ ត្រូវចាត់ចែងរៀបចំ និងរកឯកសារពាក់ព័ន្ធនឹងការពង្រីកចំណេះលើផ្នែកវប្បធម៌-អរិយធម៌ ដូចមានរាយចំណងជើងក្នុងឧបសម្ព័ន្ធខាងក្រោមដាក់នៅក្នុងបណ្ណាល័យសាលា ដើម្បីឆ្លើយតបនឹងការសិក្សារបស់សិស្ស។

ទី២- រៀបចំយន្តការចូលអាន និងសិក្សាក្នុងបណ្ណាល័យ ដោយចែកវេន ឬរៀបកាលវិភាគឱ្យបានច្បាស់លាស់និងបង្កលក្ខណៈងាយស្រួលក្នុងការអាន សិក្សា និងស្រាវជ្រាវ។

ទី៣- ជំរុញសិស្សឱ្យចូលអាន សិក្សា និងស្រាវជ្រាវ លើឯកសារទាំងនេះ ដោយមានការដឹកនាំ និងសម្របសម្រួលសិក្សា ដោយគ្រូឈរថ្នាក់ ឬគ្រូឯកទេសភាសាខ្មែរ អក្សរសាស្ត្រខ្មែរ និងសិក្សាសង្គម ព្រមទាំងមានការផ្តល់សេវាយ៉ាងល្អ និងត្រឹមត្រូវពីបណ្ណារក្ស។

ទី៤- ជំរុញសិស្សឱ្យចូលខ្ចី និងបំផុសឱ្យសិស្សរកជាវសៀវភៅទាំងនេះយកទៅអាននៅផ្ទះ ដោយគ្រូដាក់បញ្ហា ដូចជាសំណួរ ឬលំហាត់ និងធ្វើការត្រួតពិនិត្យ កែលម្អនាពេលបន្ទាប់។

ទី៥- អង្គភាពពាក់ព័ន្ធ គណៈគ្រប់គ្រងសាលា និងអ្នកទទួលបន្ទុកបច្ចេកទេស ត្រូវជំរុញ តាមដាន និងវាយតម្លៃការអនុវត្តការសិក្សាខ្លឹមសារវប្បធម៌-អរិយធម៌ខ្មែរ ឱ្យបានហ្មត់ចត់ និងមានប្រសិទ្ធភាព។

ទី៦- រៀបចំចេញវិញ្ញាសាប្រឡងប្រចាំខែ ប្រឡងឆមាស និងប្រឡងថ្នាក់ជាតិ ក្នុងមុខវិជ្ជាភាសាខ្មែរនិងអក្សរសាស្ត្រខ្មែរ និងសិក្សាសង្គម។

ទី៧- នាយកដ្ឋានអភិវឌ្ឍកម្មវិធីសិក្សាត្រូវរៀបចំគម្រោងថវិកាសម្រាប់ជាវ ឬថតចម្លង សម្រាប់ដាក់ក្នុងបណ្ណាល័យ ឆ្លើយតបទៅនឹងតម្រូវការជាក់ស្តែងរបស់គ្រឹះស្ថានសិក្សាសាធារណៈមួយចំនួន ដែលគ្មានលទ្ធភាពដើម្បីបម្រើឱ្យការសិក្សាទាន់ពេលវេលា និងមានប្រសិទ្ធភាព។

ទី៨- នាយកដ្ឋានអភិវឌ្ឍកម្មវិធីសិក្សាត្រូវសហការជាមួយអង្គភាព និងស្ថាប័នពាក់ព័ន្ធ ដៃគូអភិវឌ្ឍនានាដោយកៀរគររកមូលនិធិ ដើម្បីទ្រទ្រង់ និងបម្រើឱ្យការសិក្សាវប្បធម៌-អរិយធម៌ខ្មែរឱ្យមានគុណភាព និងនិរន្តរភាព។

សូមបញ្ជាក់ថា សេចក្ដីណែនាំនេះ តម្រូវឱ្យ មន្ទីរអប់រំ រាជធានី ខេត្ត ការិយាល័យអប់រំ ក្រុង ស្រុក ខណ្ឌ គណៈគ្រប់គ្រងគ្រឹះស្ថានសិក្សាសាធារណៈ និងឯកជន សហគមន៍ និងអ្នកពាក់ព័ន្ធទាំងអស់ ចូលរួមសហការ ផ្សព្វផ្សាយ។ ក៏ដូចជាចូលរួមអនុវត្តតាមសេចក្ដីណែនាំនេះឱ្យមានប្រសិទ្ធភាពដោយស្មារតីទទួលខុសត្រូវខ្ពស់៕