ភ្នំពេញ – ក្រោយពីក្រសួងអប់រំ យុវជន និងកីឡា ណែនាំទៅដល់គ្រប់គ្រឹះស្ថានសិក្សា ស្ដីពី ការលេងល្បែងនិងរបាំប្រជាប្រិយខ្មែរ ក្នុងឱកាសត្រៀមអបអរសាទរនិងថ្ងៃប្រារព្ធពិធីបុណ្យចូលឆ្នាំប្រពៃណីជាតិ សម្តេចតេជោ ហ៊ុន សែន នាយករដ្ឋមន្រ្តី បានគាំទ្រ​ចំពោះ​សេចក្តីណែនាំនេះ ដោយថា វាជាចំណុចដ៏ល្អ ដែលកម្ពុជា​ត្រូវ​តែពង្រឹងនូវប្រពៃណីវប្បធម៌របស់ខ្លួន នៅ​ក្នុង​ដំណាក់កាលនៃសាកលភាវូពាណិជ្ជកម្ម។

សម្តេចតេជោលើកឡើងថា នៅក្នុងដំណាក់កាល នៃសាកលភាវូពាណិជ្ជកម្ម អត្តសញ្ញាណជាតិ គឺងាយ​នឹង​បាត់ ប្រសិន​បើ​យើង​ខ្ជីខ្ជារ ដូច្នេះសម្តេចស្នើដល់​លោកគ្រូអ្នកគ្រូ សិស្សានុសិស្សផ្ចិតផ្ចង់​ទៅលើបញ្ហារបាំ ល្បែង​ប្រជាប្រិយ៍ ប្រពៃណី និងវប្បធម៌របស់យើង។

សម្តេចតេជោ ហ៊ុន សែន នាយករដ្ឋមន្រ្តី

“មិន​មែនជាបញ្ហាលេងសើចទេ… នៅ​ក្នុងសាលាគួរតែបង្ហាត់បង្ហាញអំពីក្បួនខ្នាតនេះផងដែរ ប៉ុន្តែអ្វីដែលសំខាន់គេទៅលេងតាមទីវត្តអារាម កន្លែងនេះ គប្បីមានការតម្រង់ទិស… ហើយ​តាមវិទ្យុ ទូរទស្សន៍ ក៏ជា​ចំណែកមួយ​នៃការជួយដែរ”

គួរ​បញ្ជាក់ដែរថា ខណៈពិធីបុណ្យ​ចូលឆ្នាំថ្មីប្រពៃណីជាតិខ្មែរខិតជិតចូលមកដល់ ក្រសួងអប់រំ យុវជន និងកីឡា បានចេញសេចក្តីណែនាំមួយ ដោយ​ធ្វើការអំពាវនាវទៅ​ដល់គ្រប់គ្រឹះស្ថានអប់រំទាំងអស់ នាំកុមារ និងសិស្សានុសិស្សលេងល្បែង និងរបាំប្រជាប្រិយខ្មែរ នៅមុននិងក្នុងឱកាសបុណ្យចូលឆ្នាំប្រពៃណីជាតិ ដូចជារបាំ រាំវង់ រាំក្បាច់ សារ៉ាវ៉ាន់ របាំត្រុដិ។ល។ និងល្បែងប្រជាប្រិយខ្មែរ មួយចំនួន ដូចជាល្បែងបោះអង្គញ់ ចោលឈូង ដណ្តើមស្លឹកឈើ ទាញព្រ័ត្រជាដើម។

ទន្ទឹមនេះ ក្រសួងក៏បានណែនាំដល់គ្រឹះស្ថានអប់រំ ឱ្យហាមឃាត់ និងទប់ស្កាត់រាល់ល្បែងទាំងឡាយណា ដែលមិនមែនជាល្បែង ឬរបាំប្រជាប្រិយខ្មែរ និងល្បែងមួយចំនួនដែលប្រឈមហានិភ័យ អសុវត្ថិភាព និង គ្រោះថ្នាក់ ដូចជាដុត ឬបាញ់ផាវ បាញ់ទឹក ជះទឹក លាបម្សៅ។ល។ ក្រសួងក៏បានណែនាំឱ្យគ្រឹះស្ថានអប់រំសហការជិតស្និទ្ធជាមួយមាតាបិតា ឬអាណាព្យាបាលសិស្ស សហគមន៍ អាជ្ញាធរដែនដី ដើម្បីផ្ដល់និងទទួលព័ត៌មានស្តីពីការលេងល្បែងអសុវត្ថិភាពទាំងឡាយ ទាំងក្នុង និងក្រៅគ្រឹះស្ថានសិក្សា ដើម្បីរួមគ្នាទប់ស្កាត់ និងដោះស្រាយបញ្ហាទាន់ពេលវេលា៕