ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ទំនៀមទម្លាប់ នៃការអុជភ្លើងគោមនាថ្ងៃបុណ្យចូលឆ្នាំប្រពៃណីខ្មែរគឺដើម្បីឱ្យមានពន្លឺភ្លឺនាពេលយប់សម្រាប់លេងល្បែងប្រជាប្រិយ និងការជួបជុំបងប្អូនផ្សេងៗ និងជាការនាំឱ្យមានសិរីសួស្ដី មានភាពភ្លឺល្អស្អាតនៅពេលរាត្រី។ នេះបើតាមការលើកឡើងរបស់ អ្នកនាំពាក្យក្រសួងធម្មការ និងសាសនា ឯកឧត្តម ឆាត សុឆេត។
អ្នកនាំពាក្យក្រសួងធម្មការ និងសាសនា បានលើកឡើងថា តាំងពីដើមឡើយប្រជាជនខ្មែរតែងដាក់តាំងភ្លើងគោមជំនួសឱ្យនឹងការអុជចង្កៀងដែលដាក់នៅលើរនាបផ្ទះ។ ម្ចាស់ផ្ទះនីមួយៗតែងតែប្រើប្រាស់គោមដែលមានអំពូល ឬចង្កៀងនៅពីក្នុង និងតាំងព្យួរគោមនៅទីខ្ពស់ ឬមុខផ្ទះដើម្បីឱ្យមានពន្លឺភ្លឺនៅពេលយប់ និងអាចលេងល្បែងប្រជាប្រិយនានានៅពេលយប់ផងដែរ។ លើសពីនេះ គោមផ្កាយក៏ត្រូវបានពេញនិយម និងមានការតាំងព្យួរនៅតាមទីការិយាល័យ អគារ តាមដងផ្លូវ ឬទីវត្តអារាមជាហូរហែរផងដែរ។
បើតាមឯកឧត្តម ឆាត សុឆេត មកដល់បច្ចុប្បន្នប្រជាជនខ្មែរយើងមានភាពច្នៃប្រឌិត ដោយបានកែច្នៃនូវវត្ថុមួយចំនួនធ្វើជាគោមសម្រាប់ព្យូរដូចជា គោមធ្វើពីឬស្សី និងក្រម៉ាដែលមានជារូបរៀងស្អាតៗ និងប្លែកពីគ្នារួមមាន គោមរូបផ្កាយ គោមរូបផ្ការំដួល និងរូបភាពផ្សេងៗជាច្រើនទៀត។ ឯកឧត្តម ឆាត សុឆេត បន្ថែមថា ចំណុចនេះហើយដែលជួយលើកស្ទួយជីវភាពដល់ប្រជាពលរដ្ឋដែលប្រកបរបរដែលទាក់ទងនឹងការផលិតគោមឡើង។ របរដែលទាក់ទងនឹងការផលិតគោមរួមមាន អ្នកលក់គោម អ្នកកាប់ឬស្សី និងអ្នកត្បាញក្រម៉ាជាដើម ព្រោះក្រម៉ាខ្លះត្រូវបានផលិតឡើងដោយមានបិតបន្ថែមក្រម៉ាឱ្យមើលទៅកាន់តែស្រស់ស្អាតថែមទៀត។
«ក្រម៉ាខ្មែរយើងពិតជាមានសារប្រយោជន៍ច្រើនខ្លាំងណាស់ អាចយកទៅប្រើប្រាស់បានច្រើនទម្រង់ដូចជា សម្រាប់ស្លៀកពាក់ សម្រាប់ចង់សម្ភារៈ និងអាចច្នៃជាសម្ភារៈប្រើប្រាស់ផ្សេងៗ ដែលទាំងនេះហើយជាការបង្ហាញ និងលើកឡើងថាក្រម៉ាខ្មែរដែលដូនដាបន្សល់ទុកឱ្យមានតម្លៃខ្លាំងណាស់»
ឯកឧត្ដម ឆាត សុឆេត អ្នកនាំពាក្យក្រសួងធម្មការ និងសាសនា
ជាមួយគ្នានេះ ឯកឧត្ដម ឆាត សុឆេត បានបញ្ជាក់ដែរថា ការតាំងគោមផ្កាយ ឬគោមដែលមានរូបរាងផ្សេងៗមិនមែនជាការកំណត់ឱ្យប្រជាពលរដ្ឋគ្រប់រូប ឬគ្រប់ផ្ទះត្រូវតែទិញយកតាំងនោះទេ ដោយអាចធ្វើទៅតាមលទ្ធភាព បើមិនមានថវិកាក៏មិនគួរចំណាយដែរ ដោយគ្រាន់តែប្រើភ្លើងនៅផ្ទះធម្មតាក៏បាន៕
