ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
និស្សិតដែលសិក្សានៅក្រៅប្រទេសភាគច្រើនមិនបានត្រឡប់មកប្រទេសកំណើតវិញទេនាឱកាសពិធីបុណ្យជាតិ ឬបុណ្យប្រពៃណី ជាក់ស្ដែង និស្សិតខ្មែរដែលកំពុងសិក្សានៅសហព័ន្ធរុស្ស៉ី ពួកគេមិនបានត្រឡប់មកលេងស្រុកកំណើតក្នុងឱកាសបុណ្យចូលឆ្នាំខ្មែរឡើយ ប៉ុន្តែសមាគមនិស្សិតខ្មែរនៅសហព័ន្ធរុស្ស៉ី ដោយសហការណ៍ជាមួយអគ្គស្ថានទូតកម្ពុជាប្រចាំសហព័ន្ធរុស្សី បានរៀបចំប្រារព្ធកម្មវិធីសង្ត្រាន្តជួបជុំនិស្សិតខ្មែរ ដើម្បីអបអរ និងទទួលទេវតាឆ្នាំថ្មី ហើយក៏ឆ្លៀតបង្ហាញពីវប្បធម៌ខ្មែរទៅកាន់អន្តរជាតិផង ដោយកម្មវិធីគ្រោងនឹងប្រារព្ធឡើងនៅថ្ងៃទី១៣ ខែមេសា ឆ្នាំ២០២៥។
លោក ខ្វែង ភារម្យ ប្រធានសមាគមនិស្សិតខ្មែរនៅប្រទេសរុស្សីបានឱ្យដឹងថា កម្មវិធីជួបជុំធ្វើសង្រ្កាន្តនេះ បានរៀបចំ និងធ្វើឡើយដោយឯកឧត្ដមឯកអគ្គរាជទូត និងលោកជំទាវ ព្រមទាំងមន្ត្រីនៅស្ថានទូតកម្ពុជាប្រចាំនៅសហព័ន្ធរុស្ស៉ីជាច្រើនរូបទៀត។ ក្នុងកម្មវិធីនោះ នឹងមានការពិសារអាហារខ្មែរជុំគ្នា មានរបាំជូនពរប្រសិទ្ធពរជ័យ ការលេងល្បែងប្រជាប្រិយខ្មែរ ការរាំលេងកម្សាន្តចង្វាក់ខ្មែរ និងការស្លៀកសម្លៀកបំពាក់ខ្មែរ។ ជាមួយគ្នានេះដែរ ជារៀងរាល់ឆ្នាំ ក្រៅពីនិស្សិតខ្មែរ ក៏មានភ្ញៀវជានិស្សិតអន្តរជាតិ និងនិស្សិតរុស្ស៉ីចូលរួមកម្សាន្តផងដែរ។
បើតាមលោក ភារម្យ កម្មវិធីនៅថ្ងៃទី១៣ មេសា ខាងមុខនេះ នឹងជួយឱ្យនិស្សិតខ្មែរដែលកំពុងសិក្សានៅរុស្ស៉ី បានជួបជុំគ្នា និងបង្កើនការទំនាក់ទំនងគ្នារវាងនិស្សិតខ្មែរដូចគ្នាដែលមកពីសាកលវិទ្យាល័យ ឬមកពីតំបន់ផ្សេងៗនៃប្រទេសរុស្ស៉ី។ លើសពីនេះ អាចបង្កើតបរិយាកាសរីករាយក្នុងឱកាសបុណ្យចូលឆ្នាំថ្មី ប្រពៃណីជាតិ ត្បិតរស់នៅឆ្ងាយប្រទេសកម្ពុជា និងអាចធ្វើឱ្យពួកគាត់បាត់នឹកផ្ទះ បាត់នឹកស្រុក បានមួយកម្រិតផងដែរ។
ក្នុងនាមជាប្រធានសមាគមនិស្សិត លោក ខ្វែង ភារម្យ ពិតជារីករាយ ដែលឯកឧត្តម លោកជំទាវ និងមន្ត្រីខាងឯកអគ្គរាជទូត បានគិតគូរ និងរៀបចំកម្មវិធីជួបជុំឡើងជារៀងរាល់ឆ្នាំ ដើម្បីឱ្យសិស្សនិស្សិត និងប្រជាពលរដ្ឋខ្មែរដែលកំពុងរស់នៅសហព័ន្ធរុស្ស៉ីបានសប្បាយរីករាយ និងជួបជុំគ្នា បានសួរសុខទុក្ខ និងសំណេះសំណាលគ្នា។
“ការជួបជុំ មានការកម្សាន្ត មានអាហារសាមគ្គី និងលេងល្បែងកម្សាន្តនេះ បានបង្ហាញពីវប្បធម៌ ប្រពៃណី និងទំនៀមទម្លាក់របស់ខ្មែរទៅកាន់ភ្ញៀវបរទេស បើទោះបីជាមិនមានអ្នកស្គាល់ច្រើន ប៉ុន្តែមួយចំនួនតូចដែលចង់ស្វែងយល់ ពួកគាត់អាចទទួលបានដោយក្ដីរីករាយ”
លោក ខ្វែង ភារម្យ ប្រធានសមាគមនិស្សិតកម្ពុជាប្រចាំសហព័ន្ធរុស្ស៉ី
លោក ខ្វែង ភារម្យ ចង់ឱ្យកម្មវិធីជួបជុំនាឱកាសបុណ្យចូលឆ្នាំនេះឡើងជារៀងរាល់ឆ្នាំ ព្រោះអាចជាប្រយោជន៍ជាច្រើនសម្រាប់ពលរដ្ឋកម្ពុជាដែលរស់នៅសហព័ន្ធរុស្ស៉ី ដែលមិនបានត្រឡប់មកលេងប្រទេសកម្ពុជានាឱកាសបុណ្យចូលឆ្នាំខ្មែរ និងជាការបង្ហាញថា ប្រជាជនកម្ពុជានៅតែមិនភ្លេចអត្តសញ្ញាណជាតិឡើយ៕
