កញ្ញា អ៉ីម លីដា ជានិស្សិតខ្មែរកំពុងសិក្សាថ្នាក់បរិញ្ញាបត្រ ផ្នែកគណនេយ្យ និងព័ត៌មានវិទ្យា និងជាប្រធានសមាគមនិស្សិតខ្មែរនៅសហរដ្ឋអាមេរិក, កាលពីប៉ុន្មានថ្ងៃមុន នាង​បាន​ចូលរួម​កម្មវិធី «ដង្ហែរក្បួនទីក្រុងខ្មែរ» នៅទីក្រុងឡុងប៊ិច ដោយ​នាង​មើលឃើញថា កម្មវិធីមួយនេះ បានលើកស្ទួយផ្សព្វផ្សាយ និងរក្សាវប្បធម៌ខ្មែរដល់កូនខ្មែរដែលកំពុងរស់នៅសហរដ្ឋអាមេរិកឱ្យបានស្គាល់ពីវប្បធម៌បានកាន់តែច្រើន។

ក្នុងកិច្ចសម្ភាសន៍​ជាមួយ AMS Education កញ្ញា អ៊ីម លីដា ឱ្យដឹងថា កម្មវិធីដង្ហែរក្បួនទីក្រុងខ្មែរនេះ ជាការធ្វើឡើងលើកទី១៦ហើយដែលប្រជាពលរដ្ឋខ្មែរកំពុងរស់នៅសហរដ្ឋអាមេរិកបានធ្វើឡើង។ កម្មវិធីនេះធ្វើឡើងក្នុងគោលបំណងដើម្បីការរួបរួមសាមគ្គី ថែរក្សា និងផ្សព្វផ្សាយវប្បធម៌ប្រពៃណីខ្មែរឱ្យសិស្សនិស្សិត ជាពិសេសប្រជាពលរដ្ឋខ្មែរទាំងក្មេងចាស់ប្រុសស្រីដែលកំពុងរស់នៅសហរដ្ឋអាមេរិក និងជនបរទេសបានស្គាល់ពីវប្បធម៌ខ្មែរ។

បើតាមការរៀបរាប់របស់ កញ្ញា លីដា កម្មវិធីដង្ហែរក្បួនវប្បធម៌ខ្មែរនេះ គេមានសកម្មភាពជាច្រើនដើម្បីបង្ហាញពីអត្ថសញ្ញាណជាតិខ្មែរដូចជា ការអញ្ជើញព្រះសង្ឃសូត្រមន្តលើករាសី ពិធីក្រុងពាលី ការបង្ហាញពីប្រដាល់គុនខ្មែរ ល្បុក្កតោ ការរាំលេងកម្សាន្តនូវចង្វាក់ប្រពៃណីខ្មែរ និងមានរបាំខ្មែរជាច្រើនផ្សេងទៀតផងដែរ។ លើសពីនេះក៏មានការបង្ហាញផ្សេងៗអំពីវប្បធម៌ខ្មែរជាច្រើន​ និងមានការជួបជុំ និងមានស្តង់ម្ហូបអាហារដែលធ្វើដោយប្រជាពលរដ្ឋខ្មែររស់នៅសហរដ្ឋអាមេរិកថែមទៀត។

ក្នុងនាមជាប្រធានសមាគមន៍និស្សិតខ្មែរនៅសហរដ្ឋអាមេរិក កញ្ញា អ៉ីម លីដា ពិតជាសប្បាយរីករាយដែលបានចូលរួម និងបានឃើញមានកម្មពិធីបែបនេះនៅក្នុងទឹកដីសហរដ្ឋអាមេរិក ព្រោះកម្មពិធីនេះបានចូលរួមមួយចំណែកធំអាចឱ្យកញ្ញាបាត់នឹកផ្ទះខ្លះៗនាឱកាសបុណ្យចូលឆ្នាំប្រពៃណីខ្មែរនេះ។ ពិសេសជាងនេះ កញ្ញា ពិតជាមានចិត្តកោតសរសើរទៅដល់ប្រជាពលរដ្ឋខ្មែររស់នៅសហរដ្ឋអាមេរិកដែលនៅតែព្យាយាមថែរក្សា និងបង្ហាញវប្បធម៌ទៅកាន់ជនបរទេសឱ្យបានស្គាល់ និងអាចបង្ហាញនៅលើទឹកដីសហរដ្ឋអាមេរិក។

ស្របក្នុងឱកាសនេះ កញ្ញា អ៉ីម លីដា បានធ្វើការសំណូមពរដល់និស្សិតខ្មែរដែលកំពុងសិក្សានៅសហរដ្ឋអាមេរិកក្នុងតំបន់ ឬតំបន់ក្បែរៗគួរតែបានចូលរួមក្នុងក្នុងកម្មវិធីនេះក្នុងឆ្នាំក្រោយៗទៀត បើទោះបីជាមិនបានបង្ហាញស្នាដៃផ្សេងៗតែក៏អាចចូលរួមជាអ្នកចូលរួមបាន។

គួរបញ្ចាក់ដែរថា ក្បួនដង្ហែរទីក្រុងខ្មែរ នេះបានប្រព្រឹត្តឡើងកាលពីថ្ងៃអាទិត្យ ទី៧ ខែមេសា​កន្លងទៅនៅទីក្រុងឡុងប៊ិច នៃរដ្ឋកាលីហ្វ័រញ៉ា សហរដ្ឋអាមេរិក៕